"Гэгээн муз-18" наадмын драмын төрлийн шилдэг найруулагчаар "Про" театрын найруулагч О.Итгэл шалгарсан билээ. Тэрбээр А.Дюмагийн "Шадар гурван цэрэг" жүжгээрээ ийнхүү шилдэг найруулагчийн шагнал хүртсэн юм. Бид түүний “PRO” ТЕАТРЫН НАЙРУУЛАГЧ О.ИТГЭЛ: ОХУ-Д СУРЧ БАЙХДАА "ШАДАР ГУРВАН ЦЭРЭГ"-ИЙГ ЖҮЖИГ БОЛГОН ТАВИХЫГ МӨРӨӨДДӨГ БАЙЛАА ярилцлагаас онцлох эшлэлийг хүргэж байна.

• ОХУ-д сурч, туялзуур сэлмээр хичээллэж байхдаа хэзээ нэг өдөр боломж тохиовол “Шадар гурван цэрэг” жүжигт тоглоно доо, эсвэл найруулан тавих сан гэж мөрөөддөг байлаа. Мөрөөдлөө биелүүлэхээс гадна “Шадар гурван цэрэг” бол манай театрын тоглох бүтээлийн нэг яах аргагүй мөн.

• Өмнө нь драмын театрт байхдаа моно болон хоёр хүний жүжгийн найруулагчаар ажиллаж байсан.

• Юунд ч баригдахгүйгээр, өөрийн ертөнцөөр бүтээлээ дэлгэхийг зорьдог. Түүнээс үзэгч ийм зүйлд дуртай, ийм байвал хүнд таалагдана гэж боддоггүй.

• Харин “Шадар гурван цэрэг” жүжиг улс төр, нийгмийн байдал гэхээс илүү хүний үнэнч, шударга зан чанарыг дуугарч байгаагаараа онцлогтой. Зохиолд шадар цэрэг болохын төлөө хэрхэн амьдралыг сөрж, туулж, зорьж, хичээж, унаж, бүдэрч явж байгааг өгүүлдэг.

• Миний хувьд өөрийгөө бүтээчих юм сан гэж зогсохгүйгээр зорьж байна.

• Гоё театртай болоод "Эдний театрынхан ийм уран бүтээлийг хийдэг шүү" гэж үзэгчид ярьж, хүлээдэг байгаасай. Хаа хүрэхийг, хаана очоод зогсохыг би мэдэхгүй. Гэхдээ эцсийг нь үзнэ гэж бодож байна.

• Миний хүүхэд нас бол тэр чигтээ Соёлын төв өргөөнд өнгөрсөн. Хошин урлагийн продакшнуудын хошин тоглолт болон “Хувьсал” продакшны жүжгийг үзэж өссөн.

• Эхнэрээрээ би гоёх ч дуртай. Аль болох өөрийнх нь хүссэнээр байлгаж, хайрцаглахыг хүсдэггүй.