Жүжигчин Х.Баярмаагийн төрсөн өдөр өнөөдөр тохиож байна. Түүнийг бид "Сүүлчийн бүжиг", "Аюултай харилцаа", "Нинжин сэтгэл", "Хиртээгүй сарнай", "Баян боол" зэрэг олон сайхан киноны дүрээр нь мэднэ. Мөн "Орфей" театрын найруулагч М.Батболдын 2021 онд тайзнаа найруулан тавьсан Оросын алдарт зохиолч Ф.М.Доестовскийн "Гэм зэм" пост драмын жүжгийн Дунягийн дүрийг бүтээсэн билээ. Аав, ээжийгээ даган кино натурт очдог байсан бага наснаасаа тэр урлагт дурлаж, жүжигчин, найруулагч болохоор шийджээ. Тиймдээ ч АНУ-д таван жил зохиолч, найруулагч мэргэжлээр сурч, өдгөө олон сайхан бүтээлд ажиллаж байна. Түүнээс гадна ямагт өөрийгөө сорих дуртай эл уран бүтээлч "Яг түүн шиг-2022" шоунд оролцож дуулах авьяасаа дэлгэсэн. Мөн "Бурхны авралаар чи ирлээ" шоуны уран бүтээлчээр ажилласан билээ.

           Тэрбээр манай сайтад өгсөн "Хэчнээн авьяастай байлаа гээд хөдөлмөрлөхгүй бол хэзээ ч амжилтад хүрэхгүй"  ярилцлагадаа "Миний хувьд хамгийн сайхан бүсгүй, хамгийн сайн найз бол ээж. Ээжээсээ алхам тутамдаа үлгэр дуурайл авч, бахархан суралцдаг. Эмэгтэй хүний  гоо үзэсгэлэн дотроосоо гэрэлтдэг гэж боддог. Дотроо үргэлж сайн, сайхан бүхнийг боддог, бусдад сайхныг хүсдэг хүн хамгийн сайхан. Эмэгтэй хүн болгон дэлхий ертөнцийг чимэх гэж ирсэн үзэсгэлэнтэй цэцэгс. Зөв, уужуу сэтгэлээр хатууг зөөллөж чаддаг эмэгтэй жинхэнэ гоо үзэсгэлэнтэй" гэсэн байдаг. Түүний ярилцлагыг бүрэн эхээр нь дээрх гарчиг дээр дарж уншаарай. Мөн "Гэм зэм" жүжигт тоглох үеэрээ "Гэм зэм" пост драмын жүжигт сонгогдсон минь том хувь завшаан" гэх ярилцлагыг дэлгэж байв. Түүнд төрсөн өдрийн мэнд хүргэж, уран бүтээлийн өндөр амжилт хүсье.