Байдаг л нэг оройн хоол идсэн, кино үзсэн болзооноос уйдаж байна уу? Тэгвэл болзооны хөгжилтэй, сонирхолтой, романтик, шинэлэг санаануудыг танд санал болгож байна. Туршаад үзээрэй.

1. Оньсон өрөө. Хамтдаа оюун ухаанаа уралдуулан, янз бүрийн даалгавартай өрөөний нууцыг тайлаарай. Дэлгэрэнгүй мэдээллийг onis room
2. Шинэ жор зохиох. Сайн тогооч биш байсан ч гэсэн хамтдаа шинэ төрлийн, сонирхолтой хоолны жор зохиож үзээрэй. Жишээ нь, будаатай салад, өргөст хэмхтэй зайрмаг ч байж болно.

3. Бүтээл хийх. Хайртай нэгэнтэйгээ юм бүтээх нь илүү сэтгэл ханамжийг үүсгэдэг. Та мэргэжлийн биш байсан ч санаа зовох хэрэггүй. Зарим зүйлс төгс бус байхдаа илүү сайхан байдаг. Бие биенийхээ зургийг зурах, хамт ваар хийх гэх мэт зүйлс орно.
4. Технологиос нэг өдөр холдох. Ямар ч  утас, зурагт, чихэвчгүйгээр нэг өдрийг хамтдаа өнгөрүүлж үзээрэй. Хамтдаа олон зүйлийн талаар ярилцаж, амьд харилцааг бүтээгээрэй.  
5. Цэцэг тарих. Нэгнийхээ дуртай цэцгийн үрийг цэцгийн саванд тарьж, нахиалсных нь дараа бие биендээ бэлэглээрэй.

6. Бүжгээр хичээллэх. Хамтдаа бүжгийн сургалт эсвэл өөрсдөө бие дааж бүжиг сураарай. Дараа нь та хоёр аль нэг бүжгийн талбайд ярианы сэдэв болж ч магадгүй юм.
7. Сайн дурын ажил хийх. Хамтдаа нийгэмд хувь нэмрээ оруулж, бусдад тусалбал мартагдашгүй болзоо болно.

8. Цаг хугацааны бортого. Жижигхэн төмөр хайрцаганд дурсгалтай зүйлс хийгээд хаа нэгтээ нуух юм уу, булж орхиод яг жилийн дараа хамт нээхээр тохиролцовол ямар вэ. 
9. Хэзээ ч өмсөхгүй гэж боддог хувцсаа өмсөх. Хамтдаа дэлгүүр хэсэхдээ л хэрэгжүүлж болно. Хэн хэнийхээ хэзээ ч өмсөхгүй гэж боддог хувцсаа өмсөж үзэж, хөгжилдөж болох юм.
10. Гэрэл зургийн зугаалга. Сонирхолтой газруудыг сонгон авч, өөрийн үзэл бодлыг дарсан зургаараа дамжуулан бие биетэйгээ хуваалцаарай.

11. Бие биенээсээ сонирхолтой асуулт асуух.

• Чиний хувьд хамгийн их нөлөөлөл авдаг хүн хэн бэ? Яагаад?
• Хамгийн том айдас чинь юу вэ?
• Чиний хайрын хэл юу вэ? (Хүрэлцэх, ярилцах, хамт байх гэх мэт)
• Уурлаж, гомдсон үедээ чи яаж тайтгардаг вэ?
• Ямар үед өөрөөрөө хамгийн их бахархдаг вэ?
• Өөрийгөө гурван ширхэг үгээр дүрсэлбэл?
• Гэр бүлээс гадна хамгийн дотно санагддаг хүн чинь хэн бэ?
• Цор ганцаараа байх үедээ л хийдэг үйлдэл бий юу?
• Хэний ч мэдэхгүй чиний тухай нэг баримт?
• Авч байсан хамгийн гоё бэлэг чинь юу вэ? Юу нь хамгийн гоё байсан бэ?
• Амьдралд чинь тохиосон хамгийн сайхан зүйл юу вэ?
• Чиний сонсож байсан хамгийн сайхан магтаал гэвэл?
• Намайг анх хараад төрсөн сэтгэгдэл?

12. Дугуй унах. Хамтдаа унадаг дугуйгаар зугаалж, хотын гудамж эсвэл хотоос гадуурх байгалийг сонирхоорой.

13. Яруу найргийн тэмцээн. Нэгнийхээ тухай сонирхолтой, хөгжилтэй шүлэг бичиж, хамтдаа инээлдээрэй. Хамгийн их инээлгэсэн нь ялна.
14. Эвлүүлдэг тоглоомын сорилт. Рубик шоо, оньсон тоглоомоор бооцоотой тоглож, хамтдаа учрыг нь олоорой.
15. Хамтдаа гүйх: Цэцэрлэгт хүрээлэн, гэрийнхээ ойролцоо эргэн тойронд цаг тохирон болзож, эрч хүчтэй гүйлтээр өдрийг хамтдаа эхлүүлээрэй.
16. Номтой болзоо. Номын дэлгүүрт орж, уншсан, таалагдсан номныхоо завсарт ирээдүйн уншигчдад нь зориулсан үг хавчуулж үлдээгээрэй.

17. Галт тэрэгтэй аялалд явах. Амралтын өдөр эртлэн уулзаад галт тэрэгний цагийн хуваариас хамгийн эхэнд байгааг нь сонгоод л явчих. Буцах тасалбараа хамт авахаа мартуузай. 
18. Амьтны кафед хамт очих. Хоёулаа амьтанд хайртай бол бүр ч гоё. 
19. Сэтгүүл зүйн адал явдал. Нэг өдрийн турш сэтгүүлч шиг аашил. Арга хэмжээнд оролцох, бие биенээсээ ярилцлага авах, эсвэл өөрийн туршлагын талаар бие биетэйгээ хуваалцаарай.
20. Амьд хөгжмийн фестиваль, тоглолтод цуг явах. Удахгүй хүйтрээд ирэхээр тоглолтууд цөөрчихдөг шүү. 

Б.Сувданцэцэг