Пауэрлифтингийн мастерсын дэлхийн аварга, “Стронг” клубийн тамирчин, спортын дэд мастер Зоригийн Мөнхзаяатай ярилцлаа. Тэрбээр 2023 онд пауэрлифтингийн УАШТ-ээс алтан медаль хүртсэн. 2023 онд мастерсын ДАШТ-д 63 кг-ын жинд түрүүлж,  дэлхийн аварга хэмээх цолыг хүртэж байлаа.

-Манай уншигчдад өөрийгөө танилцуулахгүй юу?

          -Намайг Зоригийн Мөнхзаяа гэдэг. Одоо 42 настай.

 -Одоо ямар клубийн, спортын ямар зэрэг, цолтой тамирчин бэ?

        -Пауэрлифтинг спортын “Стронг” клубийн тамирчин. Спортын дэд мастер цолтой.

-Бага, залуу байхдаа спортын ямар төрлөөр хичээллэж байсан бэ?

        -Хүүхэд байхдаа 1990-ээс 2010 он хүртэл үндэсний тулааны “Монгол-Зо” урлаг буюу “Монгол карате”- гаар хичээллэж байсан.  

 -Анх эрүүл мэндийн шалтгаанаас болоод гүйж эхэлсэн гэв үү?

     -2010-2014 оны хооронд амьдралын шаардлагаар спортоос түр хугацаанд хөндийрсөн юм.  Спортоо орхисны улмаас болоод биеийн илүүдэл жинтэй болж, нойр муудаж , зүрхний асуудал үүсэж эхэлсэн. Ингээд алхаж эхэлье гэж шийдээд бага ,багаар алхсаар сүүлдээ бага зэрэг шогшиж, тэгээд л гүйдэг болсон доо.

 -Хоёр жил гүйгээд 82 кг-аас 50 кг хүртэл жингээ хасаж чадсан гэсэн. Одоо гүйлтээрээ хичээллэж байгаа юу?

        -Сүүлийн хоёр жил пауэрлифтингийн спортоор хичээллэж байгаа. Гэхдээ гүйлтээ бол орхиогүй бага зайнд гүйсээр л байгаа. Гүйлт нь бүх спортын суурь юм.

-Яагаад “Power Lifting”-ээр хичээллэх болов?

       -2022 оны арваннэгдүгээр сард өөрийн ихэрийнхээ зөвлөснөөр пауэрлифтингийн спортоор хичээллэх болсон. Манай ихэр, хүргэн хоёр маань энэ спортоор олон жил хичээллэж байгаа, спортын мастер тамирчид байдаг юм.

-Марафон гүйлт болон “Power Lifting”-ээр гаргасан амжилтаа сонирхуулахгүй юу?

      -2023 онд пауэрлифтингийн УАШТ-ээс алтан медаль хүртсэн. Тэгээд дэлхийн аварга шалгаруулах тэмцээнд орох эрх авсан.  2023 оны аравдугаар сард болсон мастерын ДАШТ-д -63 кг-ын жинд түрүүлж,  дэлхийн аварга хэмээх цолыг хүртэж, алтан медаль хүртсэн. ДАШТ-ээс алтан медаль хүртсэн амжилтаараа спортын дэд мастер цол тэмдгийн болзолыг хангаж хүртсэн байгаа. Мөн 2024 онд “Биеийн тамир спортын тэргүүний ажилтан” болж байлаа. Марафон гүйлтээр 2023 онд 21 км-ийн хагас марафон зайнд шагналт есдүгээр байрт шалгарсан амжилтыг үзүүлж байсан.

-Гүйлт, хүчний спорт хоёр хооронд харшлах спортын төрлүүд  биш үү?

       -Тийм ээ, таны асуулт яг зөв байна. Гүйлт, хүчний спорт хоёр яг харшилдаг юм байна лээ. Энэ спорт руу ороод гүйлтээ эрс багасгасан. Одоо маш бага зайнд хөнгөхөн гүйлт хийдэг болсон байгаа.

-Гүйлтээр анхлан хичээллэхэд хамгийн чухал анхаарах зүйл юу байдаг вэ?

       -Гүйлтээр анхлан хичээллэхэд миний бодлоор хамгийн чухал зүйл бол хэт их оргилд яарахгүйгээр байх. Гүйж эхлэхийн өмнө ба гүйж дууссаны дараах бие халаалт болон сунгалтын дасгалуудыг тогтмол хийж хэвших.

-Анх гүйж эхлэх үедээ шантарч, мохох үе гарч байсан уу?

         -Анх гүйж эхлэхэд надад мохох зүйл гарч байсан. Мэдээж бусад хүний адил, ажил амьдралтай учир гүйлтийг өглөө маш эрт бүр 04 цагт босож гүйдэг байлаа Анх 30 минутын алхалтаас эхэлсэн. Ингээд л 10 минут алхаж, 10 минут гүйх ,10 минут алхаж 10 минут гүйх жишээгээр явсан. Яагаад гэвэл их сэргэг үе дээрээ мөн утаа бага, хүний хөдөлгөөн бага байх үед гүйдэг байв. Тэр үед  “Мөнхзаяа чи тэвч итгэ тэгвэл чи ялна” гэдэг үгийг байнга дотроо бодож гүйдэг байлаа.

 -Спортоор хичээллэх зорилгодоо хүрэхийн тулд цаг зав, гүйх бэлтгэл хийх орчин хэрхэн бий болгож байв?

          -Би гэрийнхээ ойролцоо Сэлбэ голын хөвөөгөөр гүйдэг байлаа. Мөн Чингисийн талбай, “Үндэсний цэцэрлэгт хүрээлэн” гээд, энэ гурван газраар голчлон гүйлтээ хийдэг байсан даа.

-Спортоор хичээллэх, гүйх сонирхолтой хүмүүс олон байдаг ч, хэзээ хаанаас яаж эхлэхээ мэдэхгүй, хэн нэг бэлтгэл хийх хамтрагчийг хайгаад байх нь бий. Тэр хүмүүст хандаж ямар зөвлөмжийг өгөх вэ?

       -Гүйж эхлэх гэж байгаа хүмүүст хэлэхэд хэн нэгнийг битгий хайгаарай. Та өөрөөсөө л эхлээрэй гэж хэлмээр байна. Хамтрагч хайгаад байхлаар нэгдүгээрт олдохгүй. Хоёрдугаарт тухайн хамтрагч нь өөрөөс нь илүү хурдтай гүйдэг байж болно. Ажил төрөл, цаг зав нь хүртэл зөрөөд байдаг. Ингэхлээр ганцаараа гэрээсээ орчныхоо үүдэн дээр өглөө эрт гараад үзээрэй. Та хувцсаа өмссөн байхад эргээд гэрлүүгээ орно гэж байдаггүй юм.

-Ер нь ганц гүйлт гэлтгүй ахмадуудын бусад спортын төрлөөр хичээллэх сонирхол, хандлага нь их болсон. Гэтэл яг ахмадуудад зориулсан заал, танхим,  дугуйлан, клубууд ховор байдаг. Энэ талын мэдээллийг хаанаас авах вэ?

       -Ахмадуудад маань одоо харьцангуй спортын орчин нь гайгүй болсон юм шиг санагддаг. Дүүргийн спорт хороогоор дамжуулаад асуувал, заал танхим хичээллэх газрууд байдаг болсон сонсогдсон шүү.  Би бол яг одоогоор өөрөө тэнд очиж үзээгүй болохлоор бас сайн хэлж мэдэхгүй байна.