Ж.ЭРДЭНЭБАТ ХОРИХООС СУЛЛАГДЛАА, ГИШҮҮНИЙ ТАНГАРАГАА ХЭЗЭЭ ӨРГӨХ ВЭ

Б. Бадралмаа:
Улс төр

2021-03-04, 2087

-ШҮҮХИЙН ШИЙДВЭРЭЭР ТЭР ӨЧИГДӨР СУЛЛАГДЛАА-

Монгол Улсын 29 дэх Ерөнхий сайд Ж.Эрдэнэбат “аавын хаалга” татаад есөн сар гаруй хугацаа өнгөрчээ. УИХ-ын ээлжит сонгууль дөнгөж эхэлж байхад кампанит ажлынх нь үеэр нь баривчилж, хорьсон гайхмаар үйл явдал өнгөрсөн оны зургадугаар сард өрнөсөн. Гайхмаар гэж тодотгосны учир УИХ-ын гишүүний бүрэн эрх нь хэрэгжиж, Сонгуулийн ерөнхий хороо УИХ-д нэр дэвших эрх олгочихсон байхад барьж хорьсон нь олны дургүйцлийг хүргэв. Угтаа бол Монгол Улсын хууль тогтоомжийг хуулийнхан өөрсдөө зөрчлөө хэмээн олон хүн эсэргүүцэж байсан ч Ерөнхий сайд асан Ж.Эрдэнэбат есөн сар “хэцүү нэрт”-д суулаа.

Энэ хугацаанд УИХ-ын ээлжит сонгуульд хорих ангиас оролцож, тойрогтоо ялалт байгуулснаар хорих ангиас гишүүн болсон анхны хүн болов. Харин өчигдөр Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүх Ж.Эрдэнэбат нарын гурван хүнийг суллах өмгөөлөгчдийн хүсэлтийг хэлэлцээд түүнийг суллах шийдвэр гаргасан байна.

Тэгэхээр Ерөнхий сайд асан Ж.Эрдэнэбат өнөөдөр “хэцүү нэрт”-ээс гарчихсан, дараагийн тактикаа боловсруулаад гэртээ амарч байгаа гэсэн үг. Түүнийг өнгөрсөн долоо хоногт “Хорих ангиас суллагдаж, Сэлэнгэд амарч байгаа” мэдээлэл цахим орчинд гарсан ч түүний ээж үүнийг нь үгүйсгэсэн удаатай.

Ямартай ч шүүхийн шийдвэрээр Ж.Эрдэнэбатад холбогдох хэрэг прокурорт буцаж, хэргийг дахин шалгахаар болоод буй. Цаашлаад УИХ-ын гишүүний тангаргаа өргөх эрх зүйн үндэслэлтэй болж байгаа юм.

Хэрэг ингэж эхэлсэн:

Ж.Эрдэнэбатыг Монгол Улсын Ерөнхий сайдын үүрэг гүйцэтгэгчээр ажиллаж байхдаа Засгийн газрын 2017 оны 256 дугаар тогтоолоор “Элбэг орд” ХХК-д нөхөн төлбөрийн зориулалтаар олгосон ашигт малтмалын тусгай зөвшөөрлийг өөрийн дүүтэйгээ хамтран эзэмшдэг “Хэрх илч” ХХК-д шилжүүлэн авсан.

Мөн тогтоолоор “Азаргын гол чонот” ХХК-д нөхөн төлбөрийн зориулалтаар ашигт малтмал хайх найман тусгай зөвшөөрөл олгож, тус компанид давуу байдал бий болгосон гэх асуудлаар буруутгагдсан юм. Тодруулбал, Нийслэлийн прокурорын газраас түүнийг Эрүүгийн хуулийн 22.1 дэх заалт буюу Эрх мэдэл, албан тушаалын байдлаа урвуулан ашигласан гэх зүйл заалтаар буруутгаж, яллах дүгнэлт үйлдсэн гэсэн үг.

2020 оны долдугаар сард түүнд холбогдох анхан шатны шүүх хуралдаан Сүхбаатар дүүргийн Эрүүгийн хэргийн анхан шатны шүүхэд хоёр өдөр үргэлжилж, эрх мэдэл албан тушаалын байдлаа урвуулан ашиглаж, зохион байгуулагчаар оролцсон гэм буруутайд тооцсоноор нийтийн албанд томилогдох эрхийг зургаан жилийн хугацаатай хасаж, зургаан жилийн хорих ял ногдуулсан байдаг.

Мөн оны есдүгээр сард түүнд холбогдох хэргийн давж заалдах шатны шүүх хурал болж, Нийслэлийн Эрүүгийн хэргийн давж заалдах шатны шүүхээс анхан шатны шүүхийн шийдвэрийг хэвээр үлдээсэн юм.

Давж заалдах шатны шүүх хуралдааны үеэр Ж.Эрдэнэбат шүүгч нарт хандаж “Эрхэм шүүгч нар та бүхэн намайг цагаатгаж анхан шатны шүүхийн шийдвэрийг хүчингүй болгох шийдвэр гаргавал та бүхний гаргасан шийдвэр зөв байсан юм байна гэдгийг би нотолж, 15 хавтаст хэргийн материалаар нотлогдсон гэж үзээд байгаа шүүгч, прокурор нартай хэвлэл мэдээллийн өмнө нээлттэйгээр мэтгэлцэж, гэм буруугүй гэдгээ нотолж чадна гэдгээ харин нүүр бардам хэлэх байна. “Нээлттэй мэтгэлцэх боломж олгож өгөөч” гэсэн хүсэлтийг би гаргаж байна” хэмээж байв.

Улмаар энэ оны нэгдүгээр сарын 15-нд Улсын Дээд шүүхийн хяналтын шатны эрүүгийн хэргийн шүүх хуралдаанаар Ж.Эрдэнэбат нарт анхан шатны шүүхийн шийтгэх тогтоол, давж заалдах шатны шүүхийн магадлал нь хуулийн шаардлага хангаагүй гэсэн үндэслэлээр хүчингүй болгож, хэргийг прокурорт буцаасан. Хэргийг прокурорт буцаасан тул өмгөөлөгчийн зүгээс түүнийг суллах хүсэлт гаргаж, Баянзүрх, Сүхбаатар,Чингэлтэй дүүргийн Эрүүгийн хэргийн анхан шатны шүүхээс Ж.Эрдэнэбат нарын гурван хүнийг суллах шийдвэр гаргаад буй юм.

Ж.ЭРДЭНЭБАТ ХОРИХООС СУЛЛАГДЛАА, ГИШҮҮНИЙ ТАНГАРАГАА ХЭЗЭЭ ӨРГӨХ ВЭ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 1

Сэтгэгдэл үлдээсэн: 2021-03-04 23:33:51

Новшийн жэко юу хүрэлсүг үү: Энэ 60 тэрбумчинг хэн ингэж давруулаад байгаа юм бэээээээ

Шинэ мэдээ

Нийтлэлчид