МАН-тай тохироонд хүрсэн гэх Ардчилсан намын хувь заяа дахиад л дээсэн дөрөөн дээр дэнжигнэж эхэллээ. Өнгөрсөн хугацаанд намын даргаар сонгогдсон Л.Гантөмөр “Сөрөг хүчний үүргээ гүйцэтгэж, Ардчилсан намын улс төр эхэллээ” хэмээн сүржин зарласан ч начир дээрээ хоёр хэсэг хуваагдаж, муудсанаасаа ч долоон дор болчихлоо тэд. Хоёр хуваагдсан байхдаа адаглаад тамгаа, өрөөгөө булаалцалдаад олны анхаарал байсан бол одоо хүн тоож, нохой ч шиншлэхгүй гэгч л болов. Өнөөдөр тэд нийслэлийн намын даргаа сонгоно. Нийслэлийн АН-ын сунгаанд М.Тулгат, Т.Батцогт, Д.Бадарсан нар нэр дэвшсэн. Тодруулбал, Л.Гантөмөр Д.Бадарсанг, Х.Баттулгын талаас Т.Батцогтыг нэр дэвшүүлсэн бол М.Тулгат Ц.Элбэгдоржийн талаас дэвшиж байгаа гэх.

       Өнгөрсөн намар баахан дэд дарга нар томилж, фракцуудын төлөөллөө хангаж байгаа гэж сурталчилсан  ч үнэн хэрэг дээрээ Ардчилсан доод зодооноо дийлэхгүй, намаа бүрэн дүүрэн нэгтгэж чадахгүй байгаа нь илт байна. Өөрөөр хэлбэл, Лу.Гантөмөр С.Баярцогтой хүч хавсраад ч намаа хөл дээр нь босгож чадахгүй болсон бололтой. Адаглаад намын генсекээ ч томилж чадахгүй л сонгуультай золгох дээрээ тулчихлаа АН.

     Дарин дээр давс гэгчээр тун удахгүй Ардчилсан намынхан гишүүд ч үгүй дэмжигч ч үгүй хоосон болж хоцрох гээд хоолойд нь хутга тулгаснаас ялгаагүй болсон сурагтай. Ухаандаа өнгөрсөн намраас хойш Хөх туг мандуулж, МоАХ-ны хууччуултай нэгдэж, орон даяар хөндлөн гулд явсан Ерөнхийлөгч асан Х.Баттулга шинэ нам байгуулах гээд Ардчилсан намынхныг сандаргаж эхэлжээ. Ингэхдээ хуучин МоАХ-ны суурин дээр байгуулах гээд шинэ намаа зарлаж, улсын бүртгэлд бүртгүүлэх бэлтгэл ажлаа базаасан гэнэ. Хэрэв зээ Ерөнхийлөгч асан Х.Баттулга МоАХ-ны гишүүдээр дэмжүүлж, шинэ нам байгуулвал одоогийн Ардчилсан нам ёстой л өвдгөөрөө сөхөрч унах нь тодорхой болоод байна.

     Өөрөөр хэлбэл, одоогийн Ардчилсан намын гишүүдийн 70 орчим хувийг МоАХ-ны гишүүд эзэлж буй. Тиймээс өнгөрсөн хугацаанд Л.Гантөмөр тэргүүтэй Ардчилсан намын улстөрчид Х.Баттулгад найр тавьсан ч тэд ойлголцолд хүрч чадаагүй бололтой.

     Тэр байтугай Ерөнхийлөгч асан Х.Баттулга сая Чингис хааны төрсөн өдрөөр намынхаа нэрийг зарлах гээд Ардчилсан намыг сандрагасан гэх.

       Ерөнхийлөгч асан Х.Баттулга Ардчилсан намаас өрх тусгаарлаж, шинэ нам байгуулах бэлтгэл ажилдаа хэдийнэ орсон бололтой. Ингэхдээ ардчилсан хувьсгалыг анх эхлүүлсэн МоАХ-ны туган дор шинэ баг бүрдүүлж эхэлсэн нь түүний хийж буй үйлдэл, хэлж байгаа үгсээс улам бүр тодорхой болж байна.

     Магадгүй энэ Х.Баттулга ба түүний багийнхны сүүлчийн хөзөр ч байж мэдэх. Ухаандаа нүүрсний хулгайн хэрэгт холбогдсон тэрбээр өнгөрсөн хэдэн сарын хугацаанд хууль хяналтын байгууллагын үүд сахиж, буруу хөдөлвөл “ачигдаж” ч мэдэх цаг хугацааг өнгөрөөсөн. Харин одоо хэсэгтээ амьсгаа авах тэнхээтэй болж, даруй өөрийгөө, хамгийн ойрын гишүүдээ хамгаалах сүүлчийн сумаа тавьж байгаа нь энэ байв.

       Хоёр удаагийн сонгуульд үнэмлэхүй ялагдал хүлээж, хоёр дарга, хоёр тамгатай болтлоо хагарсан Ардчилсан намыг хөл дээр нь босохдоо гишүүд нь Ардын намыг түшиж гарч ирсэн нь нууц биш. Тийм дээ ч тэд ирэх сонгуульд ялалт байгуулах нь битгий хэл сөрөг хүчнийхээ үүргийг ч гүйцэтгэж чадахгүй байж мэдэхээр байна. Өөрөөр хэлбэл, Ардчилсан намын хөл дээр нь босгохдоо Ардын намынхан тохироонд хүрч, ирэх сонгуулиар цөөн хэдэн суудал өгөх яриа хийсэн гэх нь ч бий. Нэгэнт амь тавьж буй АН-д экс Ерөнхийлөгч орсон ч, байсан ч хувь заяа нь нэгэнт тодорхой болсон.

       Нэгэнт Ардчилсан нам МАН-ын онгуулын “штаб” болох дээрээ тулчихсан учраас одоо Ерөнхийлөгч асан Х.Баттулгад энэ нам сонин байхаа больсон нь тодорхой байна. Тиймдээ ч тэрбээр дараагийн нүүдлээ хийж, хөг туганы дор хуучин гишүүдээ, нэгтгэж, улс төрийн шинэ өргөө өрж эхлэв. Мэдээж энэ удаад Х.Баттулга тэргүүтнүүдэд ингээд ч болов улс төрийн хайчнаас амьд үлдэх нь юу юунаас илүү чухал байгаа биз.

     Тиймдээ ч МоАХ-ны туган доор гишүүдээ нэгтгэх том агуулга тээж яваа болж таарлаа. Ухаандаа Х.Баттулга нам байгуулаад эхэлбэл, ардчилсан намын гишүүд дэмжигчдээ цөөнгүй нь түүний туганд нэгдэж, цагтаа сөрөг хүчний үүрэг гүйцэтгэж, Засгийн эрхийг атгалцаж явсан Ардчилсан нам дахин хуваагдах дээрээ тулах нь.

        Баярцогт, Л.Гантөмөр нар Ардчилсан намыг Ардын намд “өргөн барьсны” хариуг тэр төв хийтэл барьж ч байж мэднэ. Өөрөөр хэлбэл, Ардчилсан намаас хэлтэрхийг нь ч болох нь аваад үлдэх хамгийн боломжит хувилбар нь МоАХ-г түших юм.