УИХ-ын чуулганы нэгдсэн хуралдаанаар Уул уурхайн биржийн тухай хуулийн төслийг хэлэлцүүлж байна. Хэлэлцэж буй асуудалтай холбоотой УИХ-ын гишүүд асуулт асууж, хариулт авлаа.

УИХ-ЫН ГИШҮҮН Ж.МӨНХБАТ: "Чалко" компанитай хийсэн гэрээ одоо болтол дуусаагүй юм уу. 350 сая ам.долларын гэрээг Ж.Эрдэнэбатын Засгийн үед дуусгаж байлаа. Одоо дахиад таван жилээр сунгасан гэсэн энэ арай дэндлээ. Нууцын зэрэглэлтэй бол үүнийг гарга. Юу гэж 12 жил төлдөг 17 хувийн хүүтэй гэрээ гэж байх вэ.

УУХҮ-ИЙН САЙД Ж.ГАНБААТАР: Түр журмаар бид зөвхөн нүүрсээ тестэлж үзнэ. Уул уурхайн биржээ тусад нь байгуулна. Эсвэл хөрөнгийн биржийн харъяанд байгуулна. Шууд Уул уурхайн бирж байгуулахад хөрөнгө мөнгө их шаардана. Бид түр журмаар Эрдэнэс Тавантолгойн нүүрсний 30 хувийг долдугаар сарын 1 гэхэд биржээр зардаг тестийг бий болгох ёстой. Тийм зорилт тавьж байгаа юм. Хил нөхцөлөөр зарна гэсэн үг. "Чалко"-гийн гэрээг сунгасан нь үнэн. Тиймээс Засгийн газар БЭТ тавьсан.