Нүүрсний хулгайн асуудлаар Төрийн ордонд нээлттэй сонсгол хийж байна. Энэ үеэр УИХ-ын гишүүн А.Адъяасүрэн мэдээлэл өглөө. Тэрбээр "Би нүүрс тээврийн салбар ажиллаж байсан нь үнэн 1990 оноос эхэлж, бизнесийн салбарт хөл тавьсан. 40 мянган жолоочийг ажлын байртай болгож, 20 мянган гаруй иргэнийг ажлын байранд бэлтгэсэн бизнес эрхлэгч байсан. Би ганц нүүрс тээвэр хийгээгүй ээ. Олон мянган жолоочоо ажлын байртай болгохын тулд ачаа тээврийн салбарт үйл ажиллагаа явуулж эхэлсэн.

      Улмаар 2016 оноос нүүрс тээврийн чиглэлд орсон. Ханги мандлын чиглэлд тээвэр хийж эхэлсэн. Монгол Улсын хэмжээнд 20 орчим тээврийн жолооч, 400 гаруй тээврийн компанийн төлөөлөл болж УИХ-д орж ирсэн. Гэтэл яагаад миний эрхлэж байгаа бизнесийг энэ хулгайтай холбож байгаа юм. Би энд үгээ хэлэх гэж ирсэн. Үнэн мөнийг тогтоолгохоор ирсэн. Намайг яагаад холбож байгааг гайхаж байна. Хууль шүүхийн байгууллагаас намайг дуудаж шалгасан зүйлгүй. 2020 онд мэдүүлэг өгч байсан. Би сонгуульд нэр дэвшихэээс өмнө шалгуулж байсан. Тухайн үед би үүнийг сонгуулийн пи-ар гэж бодож байсан. Гэтэл өнөөдрийг хүртэл үргэлжиллээ.

    Би өнөөдөр шалгуулна гэж бодож байгаа. УИХ-д сууж байгаа гишүүд ч хэрэг хийгээгүй бол шалгуулах хэрэгтэй. Тээврийн компаниуд гэрээ хийсэн компанийнхаа нүүрсийг нэг цэгээс нөгөө цэгт хүргэдэг. Ямар ч хулгай хийх боломжгүй. Ямар ч эрх мэдэлгүй. Би тээвэрлэлтийн бизнес эрхлэдэгээ нуугаагүй. Хаана эрх мэдэл байна тэнд хулгай байдаг. Тэгэхээр эрх мэдэлтнүүд хулгайгаа нуухын тулд жолооч нар руу хэргээ хийж байна" гэв.