Нүүрсний хулгайн хэрэгт холбогдсон УИХ-ын гишүүдээс мэдүүлэг авчээ. АТГ-аас нүүрсний хулгайн хэрэгт холбогдуулан 35 хүнийг яллагдагчаар татаж, шалгаж байгаа талаараа мэдээлсэн. Тодруулбал, хахууль авах гэмт хэрэгт долоо, хахууль өгөх гэмт хэрэгт 16, албан тушаалын байдлаа урвуулсан хэрэгт найм, үндэслэлгүйгээр хөрөнгөжсөн гэмт хэрэгт хоёр хүнийг яллагдагчаар татаж, мөрдөн шалгах ажиллагаа явуулж байгаа гэсэн юм. Мөн АТГ-аас нүүрсний хулгайн хэрэгт эхний ээлжийн 17 хүний нэрийг зарласан байдаг.

Мөрдөн шалгах ажиллагааны хүрээнд нүүрсний хулгайн хэрэгт дараах албан тушаалтанууд шууд болон шууд бусаар холбогдсон гэсэн юм. Үүнд:

1.Ерөнхийлөгч асан Х.Баттулга,

2.Ерөнхийлөгчийн Тамгын газрын даргаар ажиллаж байсан Ө.Шижир,

3.Зам тээврийн хөгжлийн сайд асан Д.Ганбат,

4.УИХ-ын гишүүн А.Адъяасүрэн,

5.УИХ-ын гишүүн Д.Бат-Эрдэнэ,

6. УИХ-ын гишүүн Ц.Анандбазар,

7. УИХ-ын гишүүн Н.Наранбаатар,

8.УИХ-ын гишүүн Б.Баттөмөр

9. УИХ-ын гишүүн Ш.Раднаасэд,

10. Өмнөговь аймгийн Засаг дарга Р.Сэддорж,

11.Өмнөговь аймгийн ИТХ-ын төлөөлөгч,Б.Эрдэнэ-Очир

12. Өмнөговь аймгийн дарга асан Б.Бадраа

13. Ерөнхийлөгчийн Тамгын газрын дарга асан З.Энхболд

14. ЭТТ ХК-ийн дарга асан А.Ариунболд,

15. УИХ-ын гишүүн Ц.Сэргэлэн

16.ЭТТ ХК-ийн дарга асан Б.Ганхуяг,

17. Өмнөговь аймгийн МАН-ын дарга Х.Мандахбаяр

Тэгвэл АТГ-аас УИХ-ын гишүүн Ц.Анандбазар, Ц.Сэргэлэн, Ш.Раднаасэд, Н.Наранбаатар, Б.Баттөмөр нарыг дуудаж, байцаалт авсан талаар эх сурвалж мэдээллээ. Эх сурвалжийн бидэнд өгсөн мэдээллээр “Төрийн ордон болон хууль хяналтын байгууллагын гадна талбайд хэвлэлийн бага хурал зарлаж, мэдээлэл өгсөн таван гишүүнээс мэдүүлэг, байцаалт авсан. Дээрх таван гишүүн  нь 2020 оны УИХ-ын сонгуулиар сонгогдсон учраас УЕП-оос гишүүдийн бүрэн эрхийг түдгэлзүүлэн шалгах саналыг УИХ-д оруулж болзошгүй” гэлээ.