УИХ-ын гишүүн Т.Доржханд цаг үеийн асуудлаар мэдээлэл хийлээ.

     Тэрбээр “Өчигдөр дэлхийн хөлбөмбөгийн аварга шалгаруулах тэмцээний финалын сүүлийн тоглолтын үеэр нүүрсний хэрэгт хамгийн их холбоотой хүн болох Ерөнхийлөгч асан Х.Баттулга хилээр гарчээ. Үүнд хэн нэгэн хариуцлага тооцох хэрэгтэй. Бид 2022 оны арванхоёрдугаар сарын 21-ны өдөр нүүрсний олборлолт, тээвэрлэлт, экспортын асуудлаар  ерөнхий хяналтын сонсгол явуулах саналыг гаргаж байсан. Ингэхдээ УИХ-ын найман гишүүн, Ардчилсан найман гишүүн гээд нийт 16 гишүүнээр гарын үсэг зуруулаад, хяналтын сонсголыг нээлттэй хийхээр ярьсан. Ажлын хэсэгт ярьж тохирсон зүйл бол үүнд холбогдолтой бүх албан тушаалтан, эрх мэдэлтэй улс төрчдийг, шалгагдахаар зарлагдаад байгаа 17 хүнийг хүртэл авчраарай гэсэн хүсэлтийг тавьсан. Тухайлбал, Х.Баттулга гэх хүнээс мэдүүлгийг нь авья гэж ярьсан. Гэтэл эхнээсээ зугатаачихлаа. Үндэслэл нь эрүүл мэндийн шалтгаанаар гэсэн байна. Ард түмэнд  хүдэр чийрэг биетэй, хэр баргийн өвчин тусахааргүй Ерөнхийлөгч гэж имиж бүрдүүлсэн шүү дээ. Гэтэл хэрэг гарахаар эмчлүүлэх зорилгоор явлаа гэдэгт эргэлзэж байна. Өмнө нь АТГ-аас шалгагдаж байгаа хүмүүсдээ хилийн хориг тавиарай гэсэн шаардлага тавьсан. Гэтэл зугтаачихлаа. Иймээс хилийг хориг тавихгүй бол зугатаагаад дууслаа" гэв.