Тэр бидний амьдардаг ертөнцөөс модод  тэнгэрт ургадаг, шувууд нь газарт явдаг гэж сэтгэдэг ганц хүн. Монголын яруу найргийн мөнгөн үеийн  төлөөллийн нөлөө бүхий эрхэм. Өөрөөсөө өмнө орших олон зохиолчийг бүдгэрүүлж, араасаа олон яруу найрагчыг дагуулж яваа эмэгтэй. Төрсөн он цагтаа сэтгэхүй, мэдрэмжээрээ өөр байж,  “Үзэхийн хязгаар”, “Тэнгэрт ургадаг модод”, “Эрх чөлөөтэй байх урлаг буюу шинэ ном”, "Миний гунигийн түүх", "Ганцаардлын дасгал" “Төсөөллийн ертөнцөд”, “Хотын үлгэрүүд”, "Нүдний шилэнд үлдсэн зургууд","Толинд туссан будда", "Хараацай зогсолт" зэрэг номуудыг төрүүлж, хорьдугаар зуун гэх он цагт шүлэг, зохиолын өөр салхиар салхилсан уран бүтээлч. Тэр өнөөдөр яг 50 нас хүрч байна. Бидний ертөнцөд амьдраад хэдийн тавин жил болжээ.

   Тэгээд өөрөөр сэтгэх, өөр байхын том үлгэр байж, эгэл энгийн оршиж байгаа. Тэр бол яруу найрагч, зохиолч Лувсандоржийн Өлзийтөгс.  Уншигч таны, миний, бидний хайртай зохиолч. Зохиол бүтээл, бүтээсэн, туурвиснаараа тэр маргааш руу түрүүлж очихыг хүсдэг нэгэн. Ингээд түүний үл хүрэм, гэхдээ бас хүрч очиж болох зам, жимтэй ертөнцөд уншигч таныг урья. Зарим хүн түүнийг бидэнтэй хамгийн ойр хэрнээ хол хүн хэмээн тодорхойлох нь ч бий. Магад тийм ч байж мэдэх. 

   Энгийн ахуй амьдрал, юмс үзэгдлийг нэг л өөрөөр хардаг, арай л өөрөөр илэрхийлчихдэг ийм нэг эмэгтэй Монголын утга зохиолд саарал гэмээр ч юм уу нэг тийм этгээд өнгө аясыг оруулж ирсэн.  Мэдээж анх уншиж эхлэхдээ түүнийг үг, өгүүлбэр бүрээр нь шүтэн биширдэг байсан бол их сургуулийн уран зохиолын ангид суралцаад арай өөрөөр дүгнэж, зохиолыг нь дахин уншихад дахин нэг өөр Өлзий зохиолчийг харж байсныг энд онцлох нь зүйтэй болов уу. Хэнийг харснаа дараагийн хэсэгт өгүүлье.

     Яруу найрагч, зохиолч Л.Өлзийтөгсийн дотор яруу найрагч жаахан охин байдаг гэдэгтэй уншигч та санал нийлэх болов уу.

     Шүлэг бичиж, юмсын эргэцүүлж, тэмтэрч, мэдэрч явсан жаахан яруу найрагч охин үргэлжилсэн үгийн зохиол руу орсноор "том охин" болсон.

  Дээр өгүүлсэн бүхэн нийлээд Л.Өлзийтөгс гэх эмэгтэйг бүтээж байгаа юм. Түүнийг ойлгож, ойртож, дотоод ертөнц рүү нь өнгийх ганц зам бол зохиол бүтээлийг нь унших. Тэр өнөө хүртэл бидэнтэй ерөөс шүлэг, зохиолоороо л уулзаж байсан.

  "Талархлаа, баярлалаа эрхэм зохиолч оо" гэсэн сэтгэгдэл түүнд олон хаяглагдаж байсан байх. Гэхдээ түүний шүлэг, бүтээл, зохиол байгаа болохоор бид амьдарч, зарим талаараа утгаа алдсан үедээ дахин сэхэж, эсвэл шаналж, эдгэрч, шархаа эргэн сэдрээж, догдолж, байгалийн үзэгдэлд түүний шүлгийг уншин алхаж, хаашаа ч хамаагүй явмаар эрх дураараа, өөрөөрөө, хэнээс ч хамааралгүйгээр, эмээхгүйгээр оршиж чаддаг юм шүү. Дэндүү энгийн, хэдхэн жил амьдрахад  л бүгд ойлгомжтой болж, уйдаж эхлэм энэ ертөнцөд цааш удаан амьдрах, урт өдөр хоногуудыг утгатай туулах боломжийг Л.Өлзийтөгсийн зохиол бидэнд өгсөн, одоо ч өгсөөр, энэ ертөнцөд шинээр мэндэлж байгаа нэгэнд ч өгнө гэдэгт итгэлтэй байна. Түүнд төрсөн өдрийн халуун мэнд хүргэе. Бидний ертөнцөд төрсөнд баярлалаа...