ШИНЭ ЖИЛИЙН ГОЁЛЫН ДААШИНЗ 69 МЯНГААС, НҮҮР БУДАЛТ, ҮС ЗАСАЛТ БАГЦААРАА 150 МЯНГАН ТӨГРӨГӨӨС ЭХЭЛЖ БАЙНА

2025-12-07, 782

Арванхоёрдугаар сар хэдийнэ айлчлан ирж, албан байгууллага, хамт олон, найз нөхдийн шинэ жилийн тов гарч, эрэгтэйчүүд нь ганган хослол, эмэгтэйчүүд нь гоёлын даашинзны эрэлд гарч, үс засалт, хумс, нүүр будалт гээд хаа сайгүй бужигнан, салон, газруудын захиалга дүүрээд эхэлжээ. Энэ ч утгаар бид гоёлын даашинз, хумс, нүүр будалт, үс засалтын багц үнэ, ресторан, газруудын захиалга, айл бүрт дулаан, гэгээн уур амьсгал оруулдаг гацуур мод ямар үнэтэй байгааг сурвалжиллаа.

ГОЁЛЫН ДААШИНЗ 69 МЯНГАН ТӨГРӨГӨӨС ЭХЭЛЖ БАЙНА

Охид, эмэгтэйчүүдийн хувьд шинэ жилийн үдшийн даашинзаа сонгох бол хамгийн чухал ач холбогдол өгдөг сонголт. Цөм л өөр өөрсдийн биеийн галбир, өндөр, намд тааруулан ганган, гоёмсог, ер бусын гоёл сонгохыг эрмэлздэг. Тэгвэл шинэ жилийн даашинз материал, хийц, чимэглэлээсээ шалтгаалан ондоо үнэтэй байх бөгөөд хамгийн багадаа 69 мянгаас эхэлж байгаа аж. Мэдээж энгийн, даавуун, даруухан загвартай нь 39, 45, 55 мянга гэхчлэн үнэтэй байх ч илүү хээнцэр, тансаг нь багадаа л 69 мянга, түүнээс дээш сая гаруй төгрөг хүртэлх үнэтэй байна. Одоо ч тэгээд утсаа гүйлгэж байгаад л хамгийн гоёыг нь сонгож, хүссэнээ авах боломжтой болсон шүү дээ.

НҮҮР БУДАЛТ, ҮС ЗАСАЛТ БАГЦААРАА БАГАДАА 150 МЯНГАН ТӨГРӨГ БАЙНА

Гоё хумс, хөөрхөн нүүр будалтгүйгээр шинэ жилийн үдэш охид, эмэгтэйчүүдийг төсөөлшгүй. Цөм л хамгийн үзэсгэлэнтэйгээрээ гэрэлтэж, гоёцгоодог. Тэгвэл тэдний нүүр будалт дангаараа 100 мянга, үс засалттай багц болоод ирэхээрээ 150 мянган төгрөгөөс эхэлж байна. Хумс харин энгийн будалт нь 30 мянга, хумс хийлгэлт 50-100 мянган төгрөгийн үнэтэй байна. Ихэнх салон, газрууд хэдийнэ уртасгасан цагаар ажиллаад эхэлжээ. Энэ долоо хоногоос л амжиж захиалгаа өгөхгүй бол шинэ жил дөхөх тусам салон, газруудын цаг дүүрэхээр байгааг мөн дуулгамаар байна. Зарим газар урьдчилгаа багахан мөнгө авч, цагийг нь баталгаажуулчихдаг байна.

200-800 ХҮНИЙ БАГТААМЖТАЙ ШИНЭ ЖИЛИЙН ЗАХИАЛГА АВЧ БАЙГАА ГАЗАР НЭГ ХҮНИЙ 188 МЯНГАН ТӨГРӨГӨӨС ЭХЭЛЖ БАЙНА

Байгууллага, хамт олны шинэ жилийн захиалга авч байгаа газрууд хэдийнэ захиалгаа аваад, дүүрэх дөхжээ. Ихэвчлэн 200 хүн, түүнээс дээш хүний багтаамжтай газар байх бөгөөд багцын сонголт, хүний тооноос хамааран өөр өөр үнэтэй байна. Өндөр тааз, баганагүй орчин, зочдын хангалттай багтаамжтай, 360 камер, Led тайз гээд цөмийг л нэг дор багтаажээ. Мэдээж хоол, уух юмны багц, өвлийн өвөө, цасан охин ч багтах байна. Шинэ жил тэмдэглэх газраа амжиж захиалга өгөхгүй бол цагууд нь дүүрч байгаагаа илтгэж, сул өдрүүдээ зарласан байна.

ГАЦУУРЫН ҮНЭ 150 МЯНГАН ТӨГРӨГӨӨС ЭХЭЛЖ БАЙНА

Айл бүрд, албан байгууллага болгонд шинэ жилийн баярын дулаан, дотно уур амьсгал төрүүлэх нэг гол зүйл бол ганган гацуур. Энэ жилийн хувьд гацуурын үнэ өндөр, загвараасаа хамаараад 150 мянган төгрөгөөс эхэлж байна. Энгийн жижиг буюу нэг метртэй гацуур 150 мянга гэх бол 10 метрийн өндөртэй гацуур 10 хүртэлх сая хүртэл борлуулагдаж байгаа аж. Иргэдийн хамгийн их худалдан авдаг гацуур нь 1.5-2.1 метрийн өндөртэй гацуур байх бөгөөд 150, 165, 189 мянга гэхчлэн үнэтэй, түүнээс дээш байна. Иргэдийн дунд ихэнхдээ чанартай, 2-3 жилийн эдэлгээ даах ганган, сүрлэг, чимэглэхэд амар, авсаархан гацуур эрэлттэй байх бөгөөд гацуур угсарч, чимэглэхэд цаг алдахгүй нь амар байгааг онцолжээ.

Ийнхүү шинэ жилийн баярыг тойрсон үнэ ханш ийм байх бол нэг уут бэлэг 20 мянган төгрөгөөс эхэлж, цаашлаад ширээн дээр тавих чихэр жимс, зуушанд орох хүнс гээд үнийн хувьд цөм баяр болох гэж байгаатай холбоотойгоор нэмэгдсэн байх нь ч бий байна.

ШИНЭ ЖИЛИЙН ГОЁЛЫН ДААШИНЗ 69 МЯНГААС, НҮҮР БУДАЛТ, ҮС ЗАСАЛТ БАГЦААРАА 150 МЯНГАН ТӨГРӨГӨӨС ЭХЭЛЖ БАЙНА

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.