Словак Улсын Гадаад хэрэг, Европын асуудал эрхэлсэн яамнаас 2025 оны дөрөвдүгээр сарын 21-ний өдөр шинээр томилогдсон Өргөмжит консул Р.Энхтуяад экзекватурыг нь гардуулан өгснөөр Словак Улсын Братислав, Нитра, Трнава болон Тренчин тойрогт шинээр байгуулж буй Монгол Улсын Өргөмжит консулын газар албан ёсоор нээгдэв.

    Элчин сайд Д.Гансүх тэргүүтэй ЭСЯ-ны төлөөлөгчид  дөрөвдүгээр сарын 22-нд болсон Өргөмжит Консулын газрын нээлтэд оролцож, Өргөмжит консул Р.Энхтуяатай уулзаж, Монгол Улсын Гадаад харилцааны сайдын баталсан Өргөмжит Консулын мөрдөх журмыг танилцуулжээ.

    Словак Улсад аж төрж буй иргэдийнхээ хууль ёсны эрх ашгийг хамгаалах, хоёр улсын худалдаа, эдийн засгийн хамтын ажиллагааг хөгжүүлэх, бизнес эрхлэгчдийн хооронд хэлхээ холбоо тогтооход дэмжлэг үзүүлэх, соёлын харилцааг өргөжүүлэх, улс орноо сурталчлахтай холбоотой асуудлаар ярилцаж, заавар зөвлөмж өгсөн байна.

    Өргөмжит консулаар томилогдсон манай иргэн Р.Энхтуяа нь Словакийн Техникийн Их сургуульд суралцаж төгссөн, тус улсын ДХЯ-ны албан ёсны эрхтэй Словак-Монгол хэлний хэлмэрч, орчуулагчаар ажилладаг, ажлын арвин туршлагатай хүн юм.

    Мөн Словак Улсын зүүн бүсийн тойрогт суугаа Өргөмжит консул П.Славиктай уулзаж, түүний ажиллах хугацааг сунгахаар шийдвэрлэснийг мэдэгдэхийн зэрэгцээ ирэх жилүүдэд хэрэгжүүлэх ажил, арга хэмжээний талаар заавар чиглэл өгөн Хамтын ажиллагааны гэрээг шинэчлэн байгуулахаар тогтов.