Адууны өв соёл, уламжлалаа эртнээс өнөөг хүртэл хадгалан тээж ирсэн нүүдэлчин, морьтон ард түмний хувьд Монгол Улс энэ үнэт өвөө дэлхий нийтэд таниулахад онцгой ач холбогдол өгч байна. Энэ хүрээнд Монгол Улсын Ерөнхийлөгчийн санаачилгаар жил бүрийн долдугаар сарын 11-ний өдрийг “Дэлхийн адууны өдөр” болгон тэмдэглэх тухай НҮБ-ын Ерөнхий Ассамблейн тогтоолын төслийг дэвшүүлж батлуулсан билээ.

    Уг санаачилгыг олон нийтэд таниулах, адууны соёлын үнэ цэнийг сурталчлах хүрээнд Монгол Улсаас Бүгд Найрамдах Франц Улсад суугаа Онц бөгөөд Бүрэн эрхт Элчин сайд У.Нямхүү Францын “MASH” холбооны тэргүүн, мэргэжлийн тамирчин, дасгалжуулагч Бенуа Буанэзтай уулзалт хийв.

    Уулзалтаар Үндэсний их баяр наадмын үеэр Хүй долоон худагт Франц Улсаас гаралтай  “Horseball”  буюу “Хөлөгт бөмбөг”-ийн спортын үзүүлэн тоглолтыг наадамчин олон, гадаадын зочдод толилуулах боломжийн талаар мэдээлэл, санал солилцов.

    Тус холбоо нь өмнө нь Япон, Киргиз зэрэг Азийн орнуудтай хамтран ижил төрлийн арга хэмжээ зохион байгуулж байсан туршлагатай юм. Энэхүү санаачилга нь адууны өв соёлоор дамжуулан Монгол, Францын соёл, спортын солилцоог өргөжүүлэхийн зэрэгцээ дэлхийн адууны өдрийг сурталчлах, адууны соёлын үнэ цэнийг олон нийтэд таниулах ач холбогдолтой юм.