Канад, Монголын “Мерит” төслийг Канад Улсын “Каталист плас” (Catalyste+) олон улсын байгууллагаас 2025-2030 оны хооронд нийт таван жилийн хугацаанд орон нутгийн иргэдийн хэрэгцээнд нийцсэн, иргэн төвтэй төрийн албыг төлөвшүүлэх, төрийн үйл ажиллагааны чанарыг нэмэгдүүлэх, төрийн албан хаагчдыг чадавхжуулах зорилгоор хэрэгжүүлж эхэллээ.

    Энэ хүрээнд “Каталист Плас” байгууллагын олон улсын хамтын ажиллагаа хариуцсан захирал Женнифер Адамс, Канад, Монголын “Мерит” төслийн ёс зүйн зөвлөх, Түвшинбаярын Туул, Канад, Монголын “Мерит “ төслийн жендэрийн зөвлөх Эрик Карлсон нар хүрэлцэн ирж төслийг нээлээ.

    Уг төсөл нь Монгол Улсын Төрийн албаны зөвлөл, Засгийн газрын Хэрэг эрхлэх газар, төсөл хэрэгжих дөрвөн аймгийн Засаг даргын Тамгын газар, Хүний эрхийн үндэсний комисс, Жендэрийн үндэсний хороо, Удирдлагын академи зэрэг төрийн болон орон нутгийн байгууллагуудтай хамтран ажиллах юм.

    Төслийг хэрэгжүүлэхдээ Монгол Улсын төрийн албаны өнөөгийн нөхцөл байдал, эрэлт хэрэгцээнд тохирсон шилдэг туршлага, арга аргачлалыг нэвтрүүлнэ.  Монгол Улсын Засгийн газар төрөөс иргэдэд үзүүлэх үйлчилгээг үр ашигтай, ил тод, боловсронгуй болгож, уул уурхайн засаглалыг бэхжүүлэх зорилгоор “Каталисте Плас” байгууллагатай 2016–2024 онд “Канад–Монголын Мерит-1” төслийг амжилттай хэрэгжүүлсэн. Ийнхүү энэ оноос эхлэн Сүхбаатар, Дундговь, Увс, Дархан-Уул аймагт "Канад-Монголын Мерит-2” төслийг хэрэгжүүлэхээр санамж бичигт гарын үсэг зурлаа.