Дархан-Уул аймгийн “Хөгжлийн бэрхшээлтэй хүний хөгжлийн төв” нь төрөлхийн болон олдмол хэлбэрийн бие махбодийн хөгжлийн онцлогтой хүмүүст хөдөлгөөн засал, хөдөлмөр засал, хэл засал, урлаг засал, сэтгэл заслын сургалт явуулж эхэллээ. Мөн бага насны хүүхдийн хоцрогдол арилгах портеж хөтөлбөр зэрэг олон төрлийн үйлчилгээг нэг дороос үзүүлдэг байна.

     Үүнээс гадна нумтай болон өндөрлөгөөтэй улавч хийх, таяг, тэргэнцрийн тохируулгыг хийдэг бичил үйлдвэрлэлийг ч явуулдаг аж. Тус төвөөр аймгийн хэмжээнд бүртгэлтэй таван мянга гаруй хөгжлийн бэрхшээлтэй иргэдийн ихэнх нь үйлчлүүлдэг байна.

    Энд мэргэжлийн баг хамт олноос гадна шаардлагатай зарим тоног төхөөрөмжийг нэмж суурилуулчихвал хөгжлийн бэрхшээлтэй 10 гаруй хүн ажлын байраар хангагдан, өрхийн амьжиргаагаа дээшлүүлэх боломж ч байгааг төвийн ажилтнууд гадаадын төлөөлөгчдөд танилцууллаа.

     “GUBA” Group “Holdings Inc USA” компанийн төлөөлөгч, Төлөөлөгчийн зөвлөлийн дарга, мөн “King Charles III Charitable Fund UK” байгууллагын засаглал ба үйл ажиллагааны удирдагч Йвонн Абба болон “CaraDem” байгууллагын гүйцэтгэх захирал, үүсгэн байгуулагч, Ирландын Иргэдийн мэдээллийн зөвлөлийн дарга Кэтрин Хини нар Улаанбаатар хотноо зохион байгуулагдсан Дэлхийн эмэгтэйчүүдийн энтрепренерүүдийн форумд оролцохоор ирэх үеэрээ Дархан-Уул аймагт ажиллан “Ахмадын хөгжлийн төв”, “Хөгжлийн бэрхшээлтэй хүний хөгжлийн төв”-ийн үйл ажиллагаатай танилцсан юм.

     Тэд засаглал, хүмүүнлэгийн зөвлөх үйлчилгээ үзүүлэх, бизнесийн үйл ажиллагаа болон засаглалын стандартуудыг сайжруулах чиглэлээр олон улсын төсөл хөтөлбөрүүдийг амжилттай удирдсан олон арван туршлагатай аж. Тиймээс дээрх төвүүдийн үйл ажиллагааг илүү сайжруулах, иргэдийн оролцоог нэмэгдүүлэх, нийгмийн хэрэгцээг дэмжих чиглэлд аймаг орон нутгийн удирдлагуудтай уулзан, нээлттэй ярилцан хамтран ажииллахад бэлэн байна гэлээ.