Казахстан Улсын Боловсролын яам мэргэжлийн болон техникийн боловсролын хөтөлбөрөөс Исламын судлал, теологи, хадис судлал зэрэг шашны чиглэлийн хичээлүүдийг хасах асуудлыг хэлэлцэж байна. Энэ асуудал нь иргэн Ассел Таухан тус яаманд гомдол гаргаснаас үүдэлтэй бөгөөд тэрээр эдгээр хичээлүүдийг техникийн боловсролын жагсаалтад оруулсан нь Үндсэн хууль болон Боловсролын тухай хуульд харшилж байна гэж үзжээ. 

Казакстан Улсын боловсролын яамны мэргэжлийн болон техникийн боловсролын газрын дарга Асет Муханбетов “Энэ асуудлыг хэлэлцэж байгаа бөгөөд 2018 онд батлагдсан тушаалын дагуу эдгээр хичээлүүдийг техникийн боловсролын жагсаалтад оруулсан” гэв. Казахстан Улс мусульман шашинтай орон боловч шашны боловсролыг хатуу хянаж, ерөнхий боловсролын сургалтын хөтөлбөрт шашны агуулгыг багтаахыг хязгаарладаг. 2021 оны байдлаар нийт хүн амын 86.6% нь өөрийгөө шашинтай гэж тодорхойлсон бөгөөд үүнээс 69.3% нь исламын шашин шүтдэг гэсэн байна. Хэрэв Исламын судлал зэрэг хичээлүүдийг мэргэжлийн боловсролын хөтөлбөрөөс хасвал, эдгээр чиглэлээр суралцаж буй оюутнууд төрийн санхүүжилтээс хасагдаж, элсэлт буурах, ирээдүйд исламын боловсролын хөгжилд сөргөөр нөлөөлөх магадлалтай гэж зарим гишүүн үзэж байгаа юм. Энэхүү шийдвэр Казахстаны боловсролын салбар дахь шашны агуулгын байр суурь, секуляр бодлогын хэрэгжилт, хүний эрхийн асуудлуудыг дахин хөндөж байгаа юм. Тус улсын эрх баригчид олон улсын стандарт, үндэсний соёл, шашны эрх чөлөөний тэнцвэрийг хадгалах шаардлагатай гэж үзэж байна. Боловсролын яамны ажлын хэсгийн дүгнэлт 2025 оны наймдугаар сарын эцсээр гарах бөгөөд  шинэ хичээлийн жилийн төрийн санхүүжилттэй сургалтын хөтөлбөрт өөрчлөлт оруулах эсэхийг шийдвэрлэх юм.