АНУ-ын Калифорни мужийн Лос-Анжелес хотод хүчтэй салхины улмаас ой хээрийн түймэр дэгдэж, хэдэн мянган барилга, байшин галд автаж, шатаад байгаа талаар бид мэдээлсэн. Тэгвэл шинэ мэдээллээр Холливудын толгодыг бүрхээд байсан гал нийт 40 мянган акр талбайг хамраад байгаа бөгөөд галын улмаас амиа алдсан хүний тоо 24-т хүрчээ. Хэдий Лос-Анжелес хот болон ойролцоох хотуудаас гал унтраагч, аврагчдыг дайчлан ажиллуулж байгаа ч галыг бүрэн унтрааж чадахгүй байгааг барууны хэвлэлүүд онцолжээ. Түүнчлэн 40 мянган акр талбайг хамраад байгаа түймрээс учирсан гамшгийн хохирол 50 тэрбум ам.доллар даваад байгаа аж.

Мөн ой хээрийн түймэр гараад байгаа Лос-Анжелес хотоос урьдчилан сэргийлэх зорилгоор 130 мянга гаруй иргэнийг нүүлгэн шилжүүлсэн. Харин галд өртөж болзошгүй байрлал дахь хүнгүй барилга, байшингуудыг тоносон хэрэг гарах болсон бөгөөд энэ төрлийн хэрэгт холбогдуулан 20 хүнийг баривчлаад байгаа юм байна.