Хүн амын тоогоороо дэлхийд дөрөвт жагсдаг Индонез Улс сүүлийн жилүүдэд хүчээ авч байгаа “БРИКС” бүлэгт бүрэн эрхт гишүүн орноор элссэн талаар тус бүлгийг даргалагч Бразилын Засгийн газраас мэдэгджээ. Тухайлбал, Индонез Улсыг “БРИКС”-т элсүүлэх шийдвэрийг тус бүлгийн гишүүн орнууд бүлгийн хүрээг өргөжүүлэх зөвшилцөлд үндэслэн баталсан бөгөөд нэгдүгээр сарын 1-ний өдрөөс эхлэн бүрэн эрхт гишүүн орон нь болж байгаа юм.

     “БРИКС” бүлэгт гишүүнээр элсэх Индонез Улсын хүсэлтийг 2023 онд ӨАБНУ-ын Йоханнесбург хотод болсон дээд хэмжээний уулзалтын үеэр баталсан боловч тус улс Ерөнхийлөгчийн сонгуулийн дараа элсэх үйл явцыг дуусгана гэж мэдэгдэж байв. Индонезийн Ерөнхийлөгчөөр сонгогдсон Прабово Субианто нь өнгөрсөн аравдугаар сард тангараг өргөсөн юм.

Ташрамд дурдахад, Индонез Улс “БРИКС” бүлгийн бүрэн эрхт гишүүн орон болсон талаар Бразилын Засгийн газрын мэдэгдэлд, "Индонез Улс бүлгийн бусад гишүүний хамт дэлхийн засаглалын шинэчлэлийг дэмжиж, дэлхийн өмнөд бүсийн орнуудын хамтын ажиллагааг гүнзгийрүүлэхэд нааштай хувь нэмэр оруулж байна" гэж онцолжээ.