Солонгосын “Jeju Air” компанийн зорчигч тээврийн онгоц “Муан” олон улсын нисэх онгоцны буудалд газардах үедээ осолдож, олон хүн амиа алдсан ноцтой осол гарсан. Тодруулбал, орон нутгийн цагаар арванхоёрдугаар сарын 29-ний 09:05 цагт онгоц осолдсон бөгөөд 175 зорчигч, нислэгийн багийн зургаан хүнээс ердөө хоёр нь амьд үлдээд байгаа билээ. Үүнтэй холбоотойгоор БНСУ-ын Ерөнхийлөгчийн үүргийг түр орлон гүйцэтгэгч орон даяар гашуудал зарлаж, Өмнөд Солонгос даяар нэгдүгээр сарын 5-ны өдөр хүртэлх олон нийтийн арга хэмжээ, баяр ёслолуудаа цуцлаад байна.

179 хүн амиа алдсан онгоцны ослыг урьдчилсан шалгалтаар онгоц газардах үед дугуйнд нь гэмтэл гарч, онгоцыг элгээр нь газардуулах үйлдэл хийсэн ч өндөр хурдтай байсан учир нисэх зурвасын хана мөргөж, осолдсон гэж үзсэн. Улмаар орон нутгийн аврагчид, холбогдох байгууллагууд бүх хүчээрээ ослын газарт ажиллаж байгаа бөгөөд талийгаачдын цогцсыг танихад хүндрэл учирч байгаа, урьдчилсан дүгнэлтийг ослын үндсэн шалтгаан гэж үзэх нь буруу байж болох зэрэг асуудал тулгарч байгаа аж.

“Муан” олон улсын нисэх онгоцны буудалд осолдсон онгоцыг эзэмшигч “Jeju Air” компанийн хувьд Өмнөд Солонгостоо эхний гуравт орох томоохон компани бөгөөд хямт өртгөөр нислэг үйлддэгээрээ алдартай гэнэ. Осолтой холбоотойгоор тус компанийн удирдлагууд албан ёсны мэдэгдэл хийж, шууд дамжуулалтын үеэр толгой бөхийлгөж, уучлалт хүсэн гашуудаж буйгаа илэрхийлсэн байна.