Зарим оронд сарын тэмдгийн үеэр эмэгтэйчүүдийг амраахыг хууль, тогтоомжоороо зохицуулсан байдаг. Япон Улсад сарын тэмдгийн амралтыг хуульчлан заасан ч Сачими Мочизүки хорь гаруй жил нэг ч удаа уг амралтыг авч үзээгүй байна. Магад Мочизүкигийн сарын тэмдэг асуудалгүй ирдэг байсантай холбоотой биз. Тийм хэдий ч Япон Улсад олон жил хуулиар зохицуулагдаж буй энэхүү амралтыг тэр авахыг хүссэн ч дээд албан тушаалтан нь ихэвчлэн эрэгтэйчүүд байсан тул хэлж чадалгүй өдийг хүрсэн тухайгаа ярьжээ. “Японд сарын тэмдэг бол маш хувийн, нэгэн төрлийн ярихад цээртэй зүйл. Бид энэ тухай ямар ч эрэгтэй хүнд хэлэхийг хүсдэггүй” хэмээн Мочизүки хэлжээ.

            Япон Улсын Сарын тэмдгийн амралтын тухай зохицуулалт 70 гаруй жилийн турш хүчин төгөлдөр хэрэгжиж буй бөгөөд Япон нь уг зохицуулалтыг хэрэгжүүлдэг Азийн ганц орон биш. Тодруулбал, Өмнөд Солонгост 1953 оноос хойш энэхүү зохицуулалтыг хэрэгжүүлж байна. Мөн Хятад, Энэтхэгийн зарим мужийн компаниуд эмэгтэй ажилчдадаа сарын тэмдгийн амралт олгодог ажээ. Харин дэлхий нөгөө талд Америк, Англи, Европын орнуудад ийм зохицуулалт бараг үгүй.

Зарим оронд сарын тэмдгийн амралт байвч феминистүүд эмэгтэйчүүдийн эрхийн асуудал болгон хоёр талд хуваах тал бий гэнэ. Зарим нь “Энэ үеэр амралт зайлшгүй шаардлагатай” гэж үздэг бол нөгөө хэсэг нь “Энэ бол эрэгтэй, эмэгтэй хүмүүсийн ажлын байран дахь ялгаварлан гадуурхалтыг үүсгэх зүйл” хэмээн эсэргүүцдэг.

Амралт авах боломжтой ч бараг хэрэглэдэггүй

Хамгийн анх 1965 онд Японы дотоод хэвлэлд дурдсанаар нийт эмэгтэй ажилчдын 26 хувь нь уг амралтыг эдэлж байв. Харин 2017 онд хийсэн судалгаагаар ажиллах эсэх сонголтоо өөрсдөө хийдэг болсноос хойш нийт эмэгтэй ажилчдын 0.9 хувь нь энэхүү амралтыг авсан судалгаа гарчээ.

Өмнөд Солонгосын судалгаагаар 2013 онд 23.6 хувь нь сарын тэмдгийн амралтаа авч байсан бол 2017 онд 19.7 хувь хүртлээ буурчээ. Энэ нь хэд хэдэн шалтгаантай. Японд компаниуд амралтаа авсан хүмүүст ажиллаагүй өдрийнх нь цалинг өгөх эсэх нь компанийн дотоод журмын асуудал тул зарим нь олгодоггүй байна. Түүнчлэн дийлэнх компани эмэгтэйчүүддээ “Ийм амралт байдаг. Чи ч мөн авах эрхтэй” гэж анхааруулдаггүйтэй холбоотой.

Харин ийм хууль хэрэгждэг орны эмэгтэйчүүд “...Тухайн хууль, тогтоомж нь уг амралтыг хэрэгжүүлэхгүй байсан ч ичиж зовох, эрхийг нь хаах, эвгүй байдалд оруулалгүйгээр зохицуулагдах ёстой” хэмээсэн байдаг.

Эх сурвалж: cnn.com