Солонгосын алдарт “2NE1” охидын хамтлаг эргэн ирэлтээ зарлаж, ойн баяраараа тоглолт хийх болжээ.

К-попын хоёр дахь үеийн шилдэг хамтлагуудын нэг гэгддэг “2NE1” хамтлаг 2017 оноос хойш идэвхтэй уран бүтээл хийхээ больсон. Өмнөд Солонгосын хэвлэлүүдээр тус охидын хамтлагийг эргэн ирнэ гэсэн мэдээлэл гардаг байсан ч “2NE1” болон “YG Entertainment”-аас албан ёсоор мэдээлэл өгдөггүй байв. Тэгвэл өнгөрсөн өдөр тус байгууллагаас “2NE1” хамтлаг эргэн ирж, тоглолт хийх болсон талаар мэдээлжээ.

Тухайлбал, “2NE1” хамтлаг үүсгэн байгуулагдсан 15 жилийн ой ирэх аравдугаар сард тохиож буй. Үүнтэй холбоотойгоор хамтлаг эргэн ирж, Сөүлд тоглолт хийх бөгөөд үргэлжлүүлэн Японы Токио, Осака хотод тоглолт хийх гэнэ. Мөн “YG Entertainment”-ийн ахлах продюсер Ян Хён Сукын мэдээлснээр хамтлаг Япон, Солонгост хийх тоглолтоо ирэх онд үргэлжлүүлж, дэлхийг тойрон аялан тоглолт хийх юм байна.

Ташрамд дурдахад, “2NE1” хамтлаг 2009 онд байгуулагдаж, тухайн онд “Fire” нэртэй дуугаараа дебютээ хийж байсан бөгөөд түүнээс хойш "I Don't Care", "I Am the Best", "Lonely", "I Love" зэрэг олон шилдэг дуу гаргаж, к-поп урсгалын нэгэн том төлөөлөл болсон хамтлаг юм.