“Кристиано Роналдо бол төгс хүний жишээ”

-Алекс Фергюсон

40 шүргэж яваа ч дахиад л рекорд эвдэж, түмнийг цэнгүүлж, түүхээ бичиж байна даа, Роналдо. Катарын дэлхийн аваргаас нүдэндээ нулимстай буцсан ч Европын аваргад хүчтэй гэгч нь эргэн ирж, цэнгэлдэхэд цугласан фанатуудаа баярлуулж, дуулуулж, уйлуулж нэг тоглож байна.

Хүн төрөлхтөний хамгийн том спорт гэгддэг хөл бөмбөгийн түүхэн дэх хамгийн шилдэг тоглогчдын нэг Кристиано Роналдо 1985 оны хоёрдугаар сарын 5-нд Португалийн Фуншал гэх жижигхэн боомт хотод төржээ. Тухайн үед аав нь дөнгөж армиас халагдаж ирээд ажилгүй, ээж нь үйлчилгээний газарт цэвэрлэгч хийдэг ядруухан нэгэн гэр бүл байсан ч аав, ээж хоёр нь бага хүүдээ АНУ-ын Ерөнхийлөгч агсан Роналд Рейганы нэрийг бэлгэдэж Роналдо нэр өгсөн нь өдгөө дэлхийн хэдэн зуун сая, магадгүй тэрбум хүний мэддэг Кристиано Роналдо болсон түүхтэй.

                              Армиас халагдаад удаагүй байсан аав нь архинд орж, гэр бүлээ тэжээх бараг боломжгүй болоход Роналдогийн ээж Мария цэвэрлэгчийн зэрэгцээ зоогийн газарт тогоочоор ажиллаж, дөрвөн хүүхдээ арай ядан өсгөжээ. Хэдий дутуу, хоосон байсан ч Мария хүүхдүүддээ баярыг нь чадах ядахаараа тэмдэглэж өгдөг байсан бөгөөд бага хүүдээ зул сарын баяраар хөл бөмбөгийг бөмбөг бэлэглэсэн нь Роналдо уг спортыг сонирхох шалтгаан болсон гэдэг. Аав нь хотынхоо хөл бөмбөгийн “Андоринья” клубт ажилладаг байсан ч ажил руугаа зорихоос илүүтэй уушийн газарт очдог байсан учир Роналдо ээжийгээ хүлээн ганцаар бөмбөгтэй наадсаар үеийнхнээсээ гоцгойрч, сайн бөмбөг эзэмшдэг, сайн тоглодог болжээ.

Улмаар Кристиано ердөө наймхан настайгаасаа эхлэн хотынхоо “Андоринья” клубийн хүүхдийн багт тоглож эхэлсэн. Хэдий ээж нь давхар ажил хийдэг ч хүүгийнхээ тоглолтыг заавал үздэг, байнга дэмждэг байсан нь Роналдод урам өгч, хүү удалгүй багаа сэлгэж, Португальдаа томоохонд тооцогддог “Насьональ”, “Спортинг” клубт элссэнээр хамгийн шилдэг хөл бөмбөгч, рекорд эвдэгч хэмээн олноо танигдсан түүний амжилтын гараа эхэлсэн юм.

-АМЖИЛТЫН ЭХЛЭЛ БУЮУ АЛДАРТ ДОЛОО НОМЕРОО АВСАН ТҮҮХ-

Португалийн хөл бөмбөгийн “Спортинг” клубт тоглох болсноосоо хойш Роналдо техник, ур чадварын хувьд ахмад туршлагатай тоглогчдоос дутахааргүй сайн тоглож эхэлжээ. Түүнчлэн хурд, хүчээрээ ч баргийн тоглогчид гүйцэгдэхээргүй тэрбээр удалгүй клубийнхээ гол тоглогч болов. Улмаар 2003 онд “Спортинг” клуб Европын тэмцээний хүрээнд Английн Премьер лигийн алдарт “Манчестер Юнайтед” клубтэй тоглоход Кристиано Роналдо өөрийн сайн тоглолтоо үзүүлж, эсрэг багийн, Европын топ багуудын боссуудын анхааралд өртжээ. Хэдий тоглолтын үр дүн 3:0-ээр “Манчестер Юнайтед” клубийн ялалтаар өндөрлөсөн ч улаан чөтгөрүүд нэрээрээ дэлхийд танигдаж, Европын топ түвшинд тоглож байсан тэдний эсрэг дутах юмгүй сайн тоглосон Роналдог “Юнайтед”-ын Ерөнхий менежер Алекс Фергюсон анзаарч, тоглолтын дараа багтаа тоглохыг урьсан байдаг. Мөн тухайн үед “Манчестер Юнайтед”-аас гадна Премьер лигийн “Ливерпүүл” клуб ч Кристианод санал тавьж байсан тухай спортын сэтгүүлчид бичиж байв.

                                       Ингээд Кристиано Роналдо Английн хөл бөмбөгийн “Манчестер Юнайтед” клубийн нэг хэсэг болох шийдвэр гаргаж, Манчестер хот руу нүүсэн бөгөөд анх клубээс долоо дугаарын өмсгөл өгөхөд нь дургүйцэж байсан гэнэ. Улаан чөтгөрүүдийн төлөө тоглосон эхний хэдэн тоглолтдоо багийн удирдлагуудаас 28 номерыг гуйж авч тоглосон Роналдо удалгүй долоо дугаараа эргэн өмсөж тоглосон юм. Хэдий залуу, туршлагагүй тоглогч гэгдэж байсан ч 2005 оны улирлын чухал тоглолтын үеэр аавынхаа нас барсан гэдгийг сонссон ч нүдэндээ нулимстай тоглолтоо үргэлжлүүлж, ялалт байгуулсныг нь түүний дэмжигчид өдгөө ч мартаагүй биз ээ.

-ХӨЛ БӨМБӨГИЙН ДОМОГ, ТҮҮХ БОЛЖ ҮЛДЭХ КРИСТИАНО РОНАЛДО-

Удалгүй Кристиано Роналдо гэх нэр дэлхий даяар цуурайтаж, “Шилдэг залуу хөл бөмбөгч”, “Оны шилдэг хөл бөмбөгч”, “Алтан бөмбөг”-ийн эзэн болсон түүнийг Испанийн алдарт “Реал Мадрид” клуб 2009 онд түүхэн дээд үнээр худалдан авсан байдаг. Түүнээс хойших Кристианогийн нэр “Реал Мадрид” клубтэй хамт 10 жил дараалан түүх бүтээж, Роналдо “Аваргуудын лиг”-ийн таван удаагийн аварга, “Аваргуудын лиг”-ийн бүх цаг үеийн мэргэн бууч, Европын аварга шалгаруулах тэмцээний аварга, оны шилдэг хөл бөмбөгчид олгодог “Алтан бөмбөг”-ийн шагналыг дахин дөрвөн удаа хүртсэн түүхтэй. Явсан газар болгонд нь нэр нь цуурайлж, бүх цагийн үеийн шилдэг хөл бөмбөгч, рекорд эвдэгч, агуу нэгэн хэмээн фанатууддаа өргөмжлөгдсөн тэрбээр хөл бөмбөгийн нэгэн арваныг Аргетиний шигшээ баг болон "Барселона" клубийн нэрт тоглогч Лионель Месситэй хуваан эзэгнэсэн юм.

                                   Кристиано Роналдо өөрийн домог, түүхээ бүтээсэн “Реал Мадрид” клубийг 2018 онд орхиж, Италийн “Ювентус” клубийн төлөө тоглож байгаад эргэн Манчестер хотын улаан чөтгөр “Манчестер Юнайтед” багтаа нэгдэж, хоёр улирлыг өнгөрөөсөн. Гэсэн ч тухайн багийн удирдлагуудтай таарамжгүй харилцаатай байсны улмаас баг сэлгэж, Саудын Арабын “Аль Насср” клуб руу шилжин өдгөө тус клубт хоёр дахь улиралдаа тоглож байна.

Өдгөө 39 настай нэрт хөл бөмбөгч Кристиано Роналдо таван хүүхдийн аав болж, Саудын Араб дахь тансаг эдлэндээ аз жаргалтай амьдарч буй. Түүнийг чөлөөт цагаа гэр бүлдээ, эхнэр, үр хүүхдэдээ зориулдаг сайн аавын жишээ гэх нь бий. Хэдий ядуу гэр бүлээс гаралтай, ээж нь гэр бүлээ тэжээх гэж давхар ажил хийдэг байсан ч өөрт олдсон ганц боломжоо тултал нь ашиглаж, өөрийгөө, өөрийнхөө ирээдүйг гайхамшгаар цогцлоож, бүтээсэн нэгэн бол Кристиано, бидний мэдэх Роналдо билээ.