24-хөн насандаа хэдэн тэрбум хүний нүдэнд гялалзсан “од” Мбаппегээс өөр үгүй байх. Хэрэв Мбаппегээс “тод” нэгэн гарч ирвэл тэр бүр ч илүү “гэрэлтэж” чадна.

                  Килиан Мбаппе Лоттен 1998 оны арванхоёрдугаар сарын 20-нд Парист төржээ. Аав нь Камерун, ээж нь Алжир гаралтай гэдэг. Зургаан насандаа хөл бөмбөгт дурлаж, тоглож эхэлсэн түүнийг 15 хүрэхэд нь хоёр ч улс нэр нүүрээ болгох санал тавьсан нь Франц, Камерун байжээ. Тухайн үед аав Камерунаас тоглоосой хэмээн хүсэж байснаа нэгэн ярилцлагадаа дурдсан байдаг. Гэсэн ч төд удалгүй Мбаппег өөрийнх нь төрж, өссөн Франц Улсын төлөө тоглохыг нь дэмжсэн аж.

                   14 настайдаа Монакогийн хөл бөмбөгийн “Монако” клубтэй гэрээ байгуулаад байсан Мбаппе зургаан жилийн дотор нэрд гарч, 2018 оны хөл бөмбөгийн дэлхийн аваргаар өөрийгөө харуулсан юм. Тухайн дэлхийн аваргаар Мбаппегийн гараанд гарч тоглосон Францын шигшээ баг тэргүүлж, Мбаппе тус тэмцээнд зургаан гоол оруулсныхаа нэгийг нь аваргын төлөөх тоглолтод толилуулж байв. 20-хон настай Мбаппе дэлхийн аваргын түүхэн амжилтуудыг шинэчилж эхлэх тэр үеэр Бразилын домогт тамирчин Пеле “Мбаппе ингээд миний амжилтуудыг эвдээд байвал хөгшин би гутлынхаа тоосыг арчих болох нь” гэж байлаа. Килиан Мбаппе оролцсон анхныхаа дэлхийн аваргаар хэд хэдэн шинэ амжилт тогтоон дэлхийн аваргын шилдэг залуу тоглогчийн шагналыг хүртсэн юм.

Гэсэн ч түүний амжилт үүгээр зогссонгүй. Ердөө 2018 оны дэлхийн аварга дуусаад байтал Францын “Парис Сент-Жерман” клуб түүнийг гэрээг хөл бөмбөгийн түүхэнд эхний хоёрт орох өндөр үнээр худалдан авч байв. “Парис Сент-Жерман” клубт элссэн эхний жилээсээ зүүн жигүүрийн байрлалд гараанд гарч, хоёр жилийн дотор Франц “League1”-ээс эхлээд “Аваргуудын лиг”-ийн амжилтуудыг эвдэж эхэлжээ. Мбаппе “Аваргуудын лиг”-т 2016-2017 оны улиралд дебютээ хийснээс хойш 22 нас хүртлээ хөл бөмбөгийн домог болсон Самуэль Это’О, Кака, Уэйн Рүүни нараас олон гоол, гоолын дамжуулалт өгсөн билээ.

                       Ид 20 гаруйхан насандаа гялалзаж яваа Мбаппе 2022 оны дэлхийн аваргаар өөрийн “гэрэл”-ээ илүү тод болгосон доо. Өмнөх дэлхийн аваргаас ялгаатай нь насандаа баймгүй чадвар, туршлагатай болсон Мбаппе 2022 онд Францын шигшээгээ ахалсан гэхэд хилсдэхгүй. Аваргын төлөөх тоглолтод хэт-трик толилуулж, зөвхөн Франц гэлтгүй дэлхийг цэнгүүлж чадсан юм. Түүний 2022 оны аялал Аргентинтай хийсэн аваргын төлөөх тоглолтод зогссон ч түүний түүх, ирээдүй, нэр алдар хэдэн арван жил үргэлжлэхийг хөл бөмбөгийн хэдэн тэрбум фанат дэлхийн аваргаар харлаа, хүлээн зөвшөөрлөө. Одоо түүний агуу түүхийг цаг хугацаа гэрчлэхийг л бид харах үлдлээ.