Алдартай жүжигчин болохын тулд заавал мэргэжлээр нь суралцах, үгүй бол ийм төрлийн сургалтад хамрагдах хэрэгтэй гэж олон хүн үздэг. Гэхдээ мэргэжлийн бус ч төрөлх авьяас билиг, хөдөлмөр  чадвараараа нэрд гарч, амжилт олсон жүжигчин ч цөөнгүй. Жүжигчний мэргэжил эзэмшээгүй ч энэ салбарт чамгүй өндөр амжилт гаргасан  Холливудийн  “A” зэрэглэлийн жүжигчдийг танилцуулж байна.

Жим Керри

Керриг ахлах сургуулийн нэгдүгээр дамжаанд сурч байхад  аав нь ажилгүй болж, гэр бүлийнхэнтэйгээ хамт Торонто дахь дугуйн үйлдвэрт хамгаалагч, жижүүрээр ажиллахаас өөр аргагүй болжээ. Карри 16 насандаа гэр бүлээ тэжээхийн тулд ахлах сургуулиасаа гарч,  өөрийн хүссэн мэргэжлээрээ ажиллахын тулд сонгон шалгаруулалтад орж, туслах дүр бүтээдэг байв. Хожим "Амьдралын өнгө" олон ангит кинонд  дүр бүтээснээр түүний карьер огцом өсч, инээдмийн киноны алдартай жүжигчин болжээ. Энэ бүх хугацаанд тэрбээр жүжигчний мэргэжлээр суралцахын тулд нэг ч доллар зарцуулж байгаагүй.

Том Круз

Тэрээр кино урлагт дуртай нэгэн байсан ч мэргэжлийн сургуульд суралцаагүй. Том ахлах сургуульд байхдаа нэгэн жүжиг дээр ажилласан  нь түүний амьдралыг өөрчилсөн хувь тохиол болов. Жүжигт тоглосныхоо дараа тэрбээр жүжигчний карьераа үргэлжлүүлэхээр Нью-Йоркийг зорьсноор кино урлагт хөл тавьжээ.Тэрбээр 1990-ээд онд хамгийн их ашиг орлоготой жүжигчин болсон юм.

Мэг Райн

Мэг төрсөн нутгаа орхин Нью-Йорк руу сэтгүүлч мэргэжлээр суралцахаар нүүж ирсэн нэгэн. Тэрээр Нью-Йоркт байхдаа хэд хэдэн зар сурталчилгаа, телевизийн шоунд оролцсон бөгөөд улмаар уран сайхны кинонд туслах дүр бүтээх боломж олдсон. Тэрбээр дүрийн сонгон шалгаруулалтад азтай байдаггүй ч нөр   хичээл зүтгэлтэй жүжигчин. Тиймээс ч хүсэл тэмүүлэлдээ хөтлөгдөн ажиллаж,  алдартай олон бүтээлд дүрээ мөнхөлсөн билээ. Мэг Райан кино урлагт өнөөг хүртэл зүтгэхдээ жүжиглэх сургалтад хамрагдаагүй.

Камерон Диаз

Камерон Диаз Калифорнид амьдарч байх үед түүн дээр алдарт гэрэл зурагчин Жефф Дунас ирсэн гэдэг. Гэрэл зурагчин түүнтэй хамтран ажиллах санал тавьж, төлөөлөгчтэй нь танилцахыг хүссэн байна. Жефф Дунас нэрийн хуудсаа өгч, холбоо барихыг хүссэнээр Камерон “Elite modeling” агентлагийн загвар өмсөгч болов. Төдөлгүй  түүнд хэд хэдэн кинонд тоглох урилга ирж, Холливудийн үзэсгэлэнт, авьяаслаг, цог жавхаатай жүжигчдийн тоо нэгээр нэмэгдсэн билээ.

Брэд Питт

Тэрбээр 325 доллар халааслан Миссуригээс Холливуд руу жүжигчин болохоор  хөдөлжээ. Лос Анжелес руу хөдлөх үед  түүнд ердөө 225 доллар үлдсэн байв. Питт Макдональдст   хоол захиалаад хүлээж суухдаа  киноны туслах дүрд жүжигчин сонгон шалгаруулж байгааг тухай зар  олж харав. Төдөлгүй хэд хэдэн кинонд туслах дүр бүтээж,  улмаар тэрбээр Америкийн хамгийн эрэлттэй жүжигчдийн нэг болсон юм.

Жонни Депп

Жонни Депп 12 нас хүртлээ 20 гаруй “нутаг” сэлгэж нүүдэллэн  амьдарчээ. Тэрбээр Флоридагаас Калифорни руу  хөгжимчин болохоор очсон гэдэг. Түүнийг ийнхүү ажиллаж байх хугацаанд  кинонд тоглох санал хэд хэд ирснээр жүжигчний замнал нь эхэлжээ.

Эдди Мерфи

Эдди Мерфи бага наснаасаа хүнд хэцүү амьдралыг туулжээ. Түүнийг бага байхад эцэг эх нь салж, хожим түүний ээжийн бие муудсны улмаас эмнэлэгт хэвтэхээр болжээ. Эдди Мерфи ахынхаа хамт асрамжийн газарт очсон бөгөөд тэндээ жил гаруй амьдарсан. Эдди эргэн тойрондоо болж буй хүнд хэцүү зүйлсээс зугтахын тулд урлагт хүч үзэхээр шийдсэн юм. Тэрбээр наймдугаар ангид сурч байхдаа стэнд ап хошин урлагийн жүжигчнээр тоглож эхэлсэн төдийгүй хошин урлагийн алдартай жүжигчин болсон юм.