Сонгуульд тавьсан бооцоо: Хэн алдаж, хэн хожсон бэ

Х. Одончимэг:
Дэлхий дахинд- Эдийн засаг

2020-11-10, 1078

АНУ-ын сонгуулийн кампани эхэлсэн цагаас тэрбумтнууд хоёр нэр дэвшигчдийг санхүүгийн хувьд дэмжихээс гадна муж, бүсийн захирагчийн сонгуульд хүч үзэх, хуулийн төслүүдийг дэмжих, санаачилга хэрэгжүүлэхэд чамгүй хөрөнгө хаясан. Дональд Трамп, Жо Байден нар, цаашлаад Ардчилсан болон Бүгд найрамдах намын бодлого, төсөл, санаачилгад хамгийн их дэмжлэг үзүүлсэн тэрбумтнуудаас хэн нь алдаж, хэн нь хожсон бэ?

Жим Жастис

( 1.2 тэрбум ам.долларын хөрөнгөтэй)

Баруун Виржини мужийн захирагчаар улиран сонгогдсон Жим Жастис сонгуульд хамгийн их бооцоо тавьж, тэр хэрээр “хожсон” тэрбумтан. “Associated Press”-ийн мэдээлж буйгаар тэрбээр өрсөлдөгчөөсөө илт давуу ялалт байгуулсан бөгөөд ингэхийн тулд 1.8 сая ам.долларыг кампанит ажилдаа зарцуулжээ.

Нүүрс, ашигт малтмалын салбараас төрсөн тэрбумтан Жим Жастис 2016 онд Ардчилсан намаас нэр дэвшихээр зэхэж байсан ч зургаан сарын дараа бодлоо өөрчилж Бүгд найрамдах намд элссэн юм.

Шелдон Адельсон

(32.2 тэрбум ам.долларын хөрөнгөтэй )

Сенатыг “улаан” хэвээр үлдээхийн тулд хамгийн их хөрөнгө хаясан тэрбумтнуудын нэг бол казиногийн магнат Шелдон Адельсон. Бүгд найрамдах намын Сенатын манлайллын санд 60 сая ам.долларын хандив өгсөн тэрбээр Өмнөд Каролинагаас гарсан сенатч Линдси Грэмийг ч дахин сонгогдоход зориулан нэг сая ам.долларын хандив өгсөн юм.

Рид Хастингс, Пэтти Квиллин

(5.1 тэрбум ам.долларын хөрөнгөтэй)

“Netflix”-ийг үүсгэн байгуулагчдын нэг, тэрбумтан Рид Хастингс болон түүний эхнэр Пэтти Квиллин Калифорни мужийн 12 хуулийн төслийн тавыг нь дэмжихэд 4.7 сая ам.долларын хандив өгчээ. Пэтти Квиллин гэмт хэрэгтнүүдэд өршөөл үзүүлэн хугацаанаас нь өмнө суллах, ийм хүмүүст сонгуульд оролцох эрх олгох, ялгаварлан гадуурхахыг зогсооход чиглэсэн төсөлд хөрөнгө оруулсан бөгөөд тэдний зарим нь мужийн оршин суугчдын дэмжлэгийг хүлээж байгаа юм.

Марк Цукерберг

(105.5 тэрбум ам.долларын хөрөнгөтэй)

Марк Цукербергийн үндэслэсэн сайн үйлс, хүний эрхийг хамгаалахын төлөөх “Chan Zuckerberg Initiative”, “Chan Zuckerberg Institute” зэрэг байгууллага 14.6 сая ам.долларыг сургууль, орон нутгийн удирдлагад санхүүжилт үзүүлэхэд зориулан томоохон компаниудын хөрөнгөд татвар ногдуулах “15-дугаар санал” төсөлд хандивласан. Гэсэн ч энэхүү төсөл дэмжигдсэнгүй.

Стив болон Конни Балмер

(73.5 тэрбум ам.долларын хөрөнгөтэй)

“Microsoft” ерөнхий захирал асан Стив Балмер болон түүний эхнэр Конни нар Калифорнид хуулийн хоёр төслийг дэмжиж гурван сая ам.долларын хандив өргөсөн бөгөөд нийгмийн тэгш байдлыг хангах, эрүүгийн хуулийн шинэчлэлд чиглэсэн энэ хоёр төсөл хэрэгжихгүй нь тодорхой болж байна.

Майкл Блүүмберг

(54.9 тэрбум ам.долларын хөрөнгөтэй)

“Bloomberg”-ийг үүсгэн байгуулагч Майкл Блүүмберг Ардчилсан намаас нэр дэвшигч Байдены Флорида, Техас, Огайод явуулсан кампанит ажилд 100 сая ам.доллар хандивласан билээ. Хэдийгээр дээрх мужид Бүгд найрамдах намаас нэр дэвшигч Дональд Трамп ялалт байгуулсан ч түүний дэмжсэн нэр дэвшигч дараачийн Төрийн тэргүүнээр тодорлоо.

Канье Уэст

(1.3 тэрбум ам.долларын хөрөнгөтэй )

АНУ-ын Ерөнхийлөгчийн сонгуульд нэр дэвшигч, рэпер 12 мужийн саналын хуудсанд нэр нь гарсан юм. Тэрбээр сонгуулийн кампанит ажилдаа хөрөнгөөсөө 10 сая ам.доллар зарцуулсан ч ялагдсан.

Эх сурвалж: Forbes

Сонгуульд тавьсан бооцоо: Хэн алдаж, хэн хожсон бэ

Шинэ мэдээ

Нийтлэлчид