Орон сууц, өрөө, зочид буудал түрээслэдэг бизнесийн зах зээл хямарч байна. Дэлхий даяар тархаж, олон зуун мянган хүний амийг авч одоод буй цар тахлын улмаас энэ зах зээлд ч  хүнд нөхцөл үүсээд байгаа юм. Коронавирусийн голомт болоод буй АНУ, ОХУ, Бразил, Европын орнуудад тогтоосон хөл хорио, айдас болгоомжлолоос үүдэн түрээсийн бизнес эрхлэгчдийн ашиг эрс буурч байгааг эдийн засагчид онцолжээ. 
Нөгөө талаар, арьс өнгө, иргэншлээс нь шалтгаалан байр, өрөө түрээслэх хүсэлтэй иргэдийг гадуурхах хандлага ч газар авлаа. АНУ-ын Калифорнийн их сургуулийн судлаач  Дуглас Кэмпбеллийн ахалсан багийнхны судалгаанаас үүнийг харж болно. Аялагчдын хамгийн хэрэглэдэг “Airbnb” цахим хуудсанд тэд хуурамч бүртгэл үүсгэж, сууц түрээслэх хүсэлт гаргасан бөгөөд цар тахлын голомт болоогүй, халдвар төдийлэн тархаагүй улс орнуудын иргэдийн 87 хувийн хүсэлтийг түрээслэгчид хүлээн авч байна. Харин Ухань хотын оршин суугч гэсэн бүртгэлтэй хүний хүсэлтийг түрээслэгчдийн 57 хувь нь хүлээж аваагүй бол Итали, ОХУ-ын иргэдэд ч татгалзсан хариу өгөх нь олон байв. 
Цар тахлын улмаас улс орнууд агаарын болон хуурай газрын хилээ хааж, аялал жуулчлалын бизнес зогсонги байдалд орсон нь “Airbnb”-гийн үйл ажиллагаанд ч нөлөөлж байна. Захиалга, үйлчилгээ нь эрс хумигдсаны улмаас тус компани 1.9 мянган ажилтнаа халсан нь багийнхаа дөрөвний нэгийг цомхотгоход хүрсэн гэсэн үг юм. 
Мөн тус цахим хуудсаар дамжуулан байр сууцаа хөлсөлдөг байсан үл хөдлөх хөрөнгө эзэмшигчид богино хугацааны түрээслэгчдээс илүү урт хугацаагаар хамтран ажиллах үйлчлүүлэгчдийг түлхүү сонгож эхэлжээ. Тухайлбал, Дублин, Барселон хотын түрээслүүлэгчдийн 49 хувь, Лондоных 56 хувь, Мадридынх 67.1 хувь нь урт хугацааны гэрээ хийж, сууцаа хөлслүүлэх хүсэлтэйгээ илэрхийлж байна. 
Түрээсийн бизнесийн зах зээл хямралд орж буйн бас нэгэн шалтгаан нь эдийн засаг хүндэрч, иргэдийн орлого буурч буйтай холбоотой. АНУ-д хийсэн судалгаанаас харвал одоогоор 40 орчим сая өрх орон сууцны түрээсээ төлөхөд хүндрэлтэй нүүр тулж буй. Өнгөрсөн гуравдугаар сарын байдлаар түрээсээ төлж чадаагүй, хугацаа хэтрүүлсэн өрхийн тоо нэмэгдсэн байна. 
Түрээслүүлэгчдийн зарим нөхцөл байдлыг харгалзан үнэ хөлсөө хямдруулах, хэсэгчлэн төхлөх зэрэг хувилбарыг үйлчлүүлэгчдэдээ олгож байгаа аж. Үүний зэрэгцээ орон сууцны түрээсээ төлж чадахгүй байгаа ганц бие эмэгтэйчүүд, өрх толгойлсон эхчүүд бэлгийн дарамтад өртөх магадлал ихсэж байгааг Канадын хууль сахиулагчид мэдэгдэж байгаа бөгөөд ийм тохиолдолд иргэдэд туслах шууд утасны үйлчилгээг нэвтрүүллээ.