ХБНГУ-ын Ерөнхийлөгч Франк-Вальтер Штайнмайер Канцлер Олаф Шольцын гаргасан хүсэлтийн дагуу тус улсын парламент болох Бундестагийг тарааж, 2025 оны хоёрдугаар сарын 23-нд парламентын ээлжит бус сонгууль явуулахаар шийдвэрлэснээ мэдэгджээ.

Ерөнхийлөгч Ф.В.Штайнмайер парламентыг тараахаар төлөвлөж байгаагаа энэ сарын 20-ны өдөр мэдэгдэж байсан юм. Тэрбээр тухайн үед “парламентад тогтвортой олонхийг бүрдүүлэх ямар ч боломжгүй болсон” гэдгийг дурдаж байв. Энэ сарын 16-нд Германы парламентад болсон санал хураалтаар гишүүдийн олонх нь (394 депутат) Канцлер О.Шольцын тэргүүлсэн засгийн газарт итгэл үзүүлэхгүй гэсэн санал өгсөн байна. 

Эрх баригч эвслээс Чөлөөт ардчилсан нам гарсны дараа одоогийн засгийн газар Бундестагийн гишүүдийн олонхийн дэмжлэгийг алдсан юм. Социал-демократ намаас сонгогдсон Канцлер О.Шольц арваннэгдүгээр сарын 6-нд Сангийн сайд Кристиан Линднерийг албан тушаалаас нь огцруулсны дараа либерал сайд нар бүгдээрээ сайн дураараа огцорно гэдгээ мэдэгджээ.  Ингэснээр Социал-демократ нам, Чөлөөт ардчилсан нам, Ногоон намаас бүрдсэн эрх баригч “гэрлэн дохионы эвсэл” задрахад хүрсэн юм.

Эрх баригч эвсэл задран унаж, засгийн газар хямарснаас үүдэн Бундестагийн ээлжит бус сонгуулийг 2025 оны есдүгээр сарын сүүлчээр хийхээр төлөвлөж байсан бол Ерөнхийлөгч Штайнмайерын шийдвэрээр ийнхүү хоёрдугаар сард явуулахаар төлөвлөжээ.