Бразилын Рио-де-Жанейро хотод “20-ийн бүлэг”-ийн дээд хэмжээний уулзалт эхэлж байна. Тухайлбал, энэ удаагийн дээд хэмжээний уулзалтад дэлхийн 40 гаруй орны төрийн тэргүүн, Засгийн газрын тэргүүн нар оролцож байгаа талаар Бразил Улсын Ерөнхийлөгч Луис Инасио Лула да Силва мэдэгджээ.

Тэрбээр "Дээд хэмжээний уулзалтад 42 орон оролцож байгаа нь чухал. Бид өлсгөлөн, ядууралтай тэмцэх талаар ярилцахаас гадна эрчим хүчний шилжилтийн талаар, мөн дэлхийн засаглалын тухай ярилцах болно. НҮБ-ын шийдвэрийг дагаж мөрдөнө гэдэгт баталгаа гаргахын тулд шинэчлэл хийх шаардлагатай байна" гэж тэрбээр олон нийтийн “X” сүлжээнд бичжээ.

Лула да Силва дээд хэмжээний уулзалтад оролцохоор хүрэлцэн ирсэн Анголын Ерөнхийлөгч Жоау Лоуренсу, Вьетнамын Ерөнхий сайд Фам Минт Тинь, Египетийн Ерөнхийлөгч Абделл Фаттах ас-Сиси, Малайзын Ерөнхий сайл Анвар Ибрагим, Туркийн Ерөнхийлөгч Режеп Эрдоган, ӨАБНУ-ын Ерөнхийлөгч Сирил Рамафоза нартай, мөн Европын Комиссын дарга Урсула фон дер Ляйен, АНЭУ-ын төлөөлөгчидтэй ням гарагт уулзжээ.

Түүнчлэн БНХАУ-ын дарга Ши Жиньпин, АНУ-ын Ерөнхийлөгч Жо Байден, Өмнөд Солонгосын Ерөнхийлөгч Юн Сог Ёль, Францын Ерөнхийлөгч Эммануэл Макрон, Аргентины Ерөнхийлөгч Хавьер Милей, Колумбын Ерөнхийлөгч Густаво Петро нар дээд хэмжээний уулзалтад оролцохоор Бразилд хүрэлцэн иржээ. ОХУ-ыг Гадаад хэргийн сайд Сергей Лавров төлөөлөн оролцоно.