Д.Трамп шинэ багаа бүрдүүлж байна

2024-11-14,   592

АНУ-ын Ерөнхийлөгчөөр сонгогдоод буй Дональд Трамп шинэ засаг захиргааныхаа гол албан тушаалтнуудыг томилж эхэлжээ.

Тухайлбал, АНУ-аас Израилд суух Элчих сайдаар Бүгд найрамдах намын гишүүн, Арканзас мужийн захирагч асан Майк Хакабиг томилсон байна. Майк Хакаби нь Эвангелийн тууштай консерватив үзэлтэн бөгөөд Израилын талыг дэмждэг гэдгээрээ алдартай гэнэ. Тэрбээр Израилд суух Элчин сайдаар томилогдсоныхоо дараа “Ойрх Дорнодод энх тайвныг тогтоохын төлөө шаргуу ажиллах болно” гэж мэдэгджээ. Мөн Ойрх Дорнод дахь тусгай төлөөлөгчөөр хуучны анд, гольфийн хамтрагч Стивен Виткоффыг томилов. Флорида мужийн үл хөдлөх хөрөнгийн хөрөнгө оруулагчаар ажилладаг Стивен Виткофф нь өдгөө Д.Трампын тангараг өргөх ёслолыг хариуцсан хороон даргаар ажиллаж байгаа юм.

Түүнчлэн Д.Трамп Тагнуулын төв газрын даргад Жон Рэтклиффийг нэр дэвшүүлсэн бөгөөд “Жон манай улсын тагнуулын байгууллагын хамгийн өндөр хоёр албан тушаалыг хашсан анхны хүн болохыг би тэсэн ядан хүлээж байна” гэж мэдэгджээ. Харин Пентагоныг удирдах Батлан хамгаалахын сайдаар Д.Трамп “Fox news” сувгийн хөтлөгч Пит Хегсетийг томилохоор болсон байна. Үүнээс гадна Д.Трампыг Ерөнхийлөгчийн сонгуульд дэмжиж ажилласан дэлхийн толгой баян Элон Маскийг шинээр байгуулагдах Засгийн газрын үйл ажиллагааг хянах яамыг удирдах үүрэг өгч, сайдаар томилох гэнэ.

АНУ-ын Ерөнхийлөгчийн сонгуулийн үр дүн гарсны дараагаас Д.Трампын Бүгд Найрамдах нам Сенатыг хяналтдаа аваад буй бөгөөд Төлөөлөгчдийн танхимд ч олонх болоход ойрхон байгаа юм байна.

 

 


Д.Трамп шинэ багаа бүрдүүлж байна
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188
ergelt.mn@gmail.com