АНУ-ын Ерөнхийлөгчөөр хоёр дахь удаагаа сонгогдоод буй Дональд Трамп Зүүн Европт өрнөж байгаа дайнтай холбоотой асуудлаар ОХУ-ын Ерөнхийлөгч Владимир Путин, Германы канцлер Олаф Шольц нартай утсаар ярьжээ.

Тухайлбал, Д.Трампыг АНУ-ын Ерөнхийлөгчийн сонгуульд ялалт байгуулсны дараахан ОХУ-ын Ерөнхийлөгч В.Путин “Украины асуудлаар Д.Трамптай хэлэлцэхэд бэлэн” тухайгаа мэдэгдсэн. Улмаар В.Путины “урилга”-ыг Д.Трамп хүлээн авч, урьдчилсан мэдэгдэл, төлөвлөгөөгүйгээр утсаар ярьсан гэнэ. Одоогийн байдлаар Д.Трампын утсаар юу ярьсан нь тодорхой бус байгаа бөгөөд “The Post” сонины эх сурвалжуудын мэдээллээр ОХУ-ын Ерөнхийлөгч Владимир Путин утсаар ярихдаа АНУ-ын Европт үзүүлж байгаа дэмжлэг их, Украинд америк цэргүүд олон байгааг онцолж, Украины дайныг “нэг тийш” болгох асуудал ярьсан байна.

Цагаан ордныг дахин дөрвөн жилийн хугацаанд удирдах Дональд Трампын хувьд, сонгуулийн кампанит ажлынхаа үеэр одоогийн АНУ-ын Ерөнхийлөгч Жо Байдены засаг захиргаа Украинд их хэмжээний цэрэг, санхүүгийн дэмжлэг үзүүлж байгааг буруушааж, өөрөө төрийн тэргүүн болбол дайныг хурдан дуусгахаа амлаж байв. Гэсэн ч Д.Трампын “Дайныг хурдан дуусгах” амлалт нь хэрхэн өрнөж, ямар үйл ажиллагаа явуулах талаар тодорхой мэдээлэлгүй байгаа юм.