“Ганц дайчин ганцаардахгүй”-н үлгэрээр хамаг юмаа дотооддоо л аргалчих гээд ваффле, гурил, будаагаа зарж, импортын бүтээгдэхүүн үгүй, гаднын хөрөнгө оруулалт байхгүй мөн ч их ганцаардаж байна даа, ОХУ.

-Дэлхийн түүхэнд хамгийн олон хориг арга хэмжээгээр “шийтгүүлсэн” орон ОХУ болжээ-

Дээр дурдсанчлан “Ганц дайчин ганцаардахгүй” гэхээр оросууд уурсаж мэднэ. Учир нь, “Ганц дайчин ганцаардахгүй” нэртэй роман нь Украин зохиолчийнх юм л даа. Өнгөрсөн жилийн өдийгөөс хойш Украины хилийн бүс орчимд цэргийн хүчээ хуримтлуулсан хоёрдугаар сарын 20-нд Донбассаар дамжин Украины нутагт халдсан нь дэлхийн дахины шүүмжлэлийг дагуулав. Чечень, Сири, Гүрж рүү цэргээ оруулж байсан үеэс ч илүү.

Украин руу цэргүүдээ оруулах үеэрээ ОХУ-ын Ерөнхийлөгч Владимир Путин “ОХУ-Украины дайнд хөндлөнгөөс оролцсон бүх улсад цохилт өгнө. Энэ нь тухайн улсын түүхэнд амсаж байсан хамгийн том хохирол ч байж болно” гэж мэдэгдэл хийсэн нь дэлхийн олон ч орныг айлгав бололтой. “Хэрэв ОХУ цэргүүдээ Украин руу оруулбал хариу цохилт өгнө” гэж мэдэгдээд байсан орнууд “сураггүй” болсон үе. Харин НҮБ-ын журмын дагуу жилийн өмнөөс л ОХУ-ын эсрэг хориг арга хэмжээ авч, байсан нь өдгөө Оросыг барих ганц “гав” болж байна.

                Тухайлбал, ОХУ-ыг дамжин өнгөрөх Европын дамнасан хамгийн том байгалийн хийн хоолойн төсөл “Хойд урсгал-2”-ыг царцааж, газрын тос, байгалийн хийн импортыг хориглож, олон улсын гүйлгээний систем SWIFT-ээс ОХУ-ын нэр бүхий томоохон компанийг хассан юм.

Дэлхийн хамгийн их хоригтой байгаа орнууд.

Тэгвэл энэ зэрэг дэлхийн орнуудаас ОХУ-ын эсрэг авсан хориг хэмжээний тоо 10 мянга давж, ОХУ дэлхийн түүхэн дэх хамгийн их хориг арга хэмжээгээр “шагнуулсан” улс болжээ. Украин руу дайрахаас өмнө гэхэд л гаднын 2754 хоригтой байсан ОХУ-д өнгөрсөн хоёрдугаар сарын 20-ноос хойш 7826 шинэ хориг нэмэгдсэн байна.

ОХУ-ын эсрэг хамгийн их хориг тавьсан орнуудын жагсаалт.

ОХУ-ын эсрэг дэлхийн орнуудаас зарласан хориг арга хэмжээнүүдийг харвал, АНУ хамгийн ихийг нь буюу 1244, Их Британи 1037, Швейцарь 1030 хориг арга хэмжээ зарлажээ. Зүүн Европт ОХУ-Украины дайнд эхэлсээс хойш олон нийтэд зарласан нийт хориг арга хэмжээний дийлэнх хувийг нь ОХУ-ын иргэнд, үлдсэн хувь нь байгууллага, хуулийн этгээд байна.

                Украины дайн эхэлснээс хойш тавигдсан хоригуудын дийлэнх хэсэг нь хувь хүмүүст, үлдсэн хэсэг нь байгууллага, хуулийн этгээдүүд рүү чиглэжээ.

“ОХУ-Д ИМПОРТЫН БАРААНЫ ҮНЭ ХЭД ДАХИН НУГАРЧ, ОДОО БҮР “ҮЗЭГДЭХЭЭ” БОЛЬЖЭЭ”

ОХУ-аас Украинд цэргийн тусгай ажиллагаа хийсэнтэй холбоотойгоор дэлхийн маш олон кмопани ОХУ-д үйл ажиллагаа явуулахаа больж, хөрөнгө оруулалтуудаа бүрэн зогсоосон. Европын сансрын агентлаг, “Oracle”, “BMW”, “Apple”, “MAERSK”, “Airbus” компаниас эхлүүлээд бүр түргэн хоолны “McDonald’s” сүлжээ ресторан 847 салбараа хаасан.

Орос арми Украин руу дайрсан эхний өдөр ОХУ-ын бараг бүхий л импортын бүтээгдэхүүний үнэ 20 гаруй хувиар өсжээ. Түүнээс төд удалгүй бүрэн тасалдсан импортын цахилгаан бараа, “Apple”-ийн бараа, бүтээгдэхүүний үнэ нэг нугарсан гэнэ. ОХУ-д байсан хамгийн сүүлийн импортын бараанууд хэд дахин нугарсан үнэтэй зарагдаж байгаад сүүлийн үеэс үзэгдэхээ байсан талаар иргэд цахим сүлжээнд мэдээлээд эхэлжээ. ОХУ-Украины дайн эхэлснээс хойш дөрвөн сарын хугацаанд “гол зогоосон” Оросын хамгийн сүүлийн импортын бүтээгдэхүүнүүд дууссан гэж таамаглаж байгаа юм.

-“ОХУ ЛИТВА, ЭСТОНИ РУУ ДАЙРНА” ГЭВ-

Одоо АНУ болон НАТО-гийн гишүүн орнуудын зүгээс ОХУ-ыг Европт дахин шинэ дайн гаргахгүйд онцгойлон анхаарч ажиллаж байна. Гэсэн ч сүүлийн үед цахим сүлжээгээр “цуураад” байгаа мэдээ биелэлээ олж, ОХУ НАТО-гийн гишүүн орон руу довтолбол асуудал өөр тийш эргэнэ.

                Дэлхийн улстөр шинжээчдийн “В.Путины талын хүн”, “Өв залгамжлагч” гэх зэргээр нэрлээд байгаа ОХУ-ын Аюулгүй байдлын зөвлөлийн Нарийн бичгийн дарга Николай Патрушев “Литва Улсын иргэд шангаа хүртэнэ” гэж мэдэгджээ. Учир нь, ОХУ-ын Калининград боомт хот руу гардаг тээвэрлэлтийн төмөр замд Литва Улс хориг тавьжээ. Олон улсын томоохон нэгдэл, байгууллагын төлөөлөгчдийн зүгээс Литва Улсын эрх баригчдад хандан “НАТО-гийн гишүүн орон учир тайван сууж болно” гэж хэлсэн. Гэсэн ч, өчигдөр ОХУ-ын арми дотооддоо Эстони Улс руу дайрах бэлтгэлээ базааж байгаа гэх мэдээлэл цацагдлаа.

Литва, Эстони хоёул НАТО-гийн гишүүн орон. Хэрэв ОХУ дээрх хоёр орны аль нэг рүү цэргээ оруулбал НАТО-гийн батлах хамгаалах гэрээний дагуу тус холбооны бүх гишүүн орон ОХУ руу л дайрах нөхцөл бүрдэх гэнэ. Одоо дэлхий даяар Оросын хариуг хүлээж байна.