Өнгөрсөн долоо хоногт болсон Парламентын сонгуулийн дараа Киргиз Улсад төрийн хямрал үүсээд байна. Киргизийн Ерөнхийлөгч Сооронбай Жээнбеков тус улсын нийслэл Бишкек хотод онц байдал тогтоож, хотод дэг журам сахиулах зорилгоор цэрэг оруулах тухай зарлиг гаргажээ. Учир нь, аравдугаар сарын 9-ны орой Бишкек хотод улс төрийн хүчнүүдийн дэмжигчдийн хооронд мөргөлдөөн болжээ. Киргизийн парламентын сонгуулийн дараа болсон эсэргүүцлийн ажиллагааны үеэр Засгийн газрын байруудыг эзлэн авч, сайд, дарга нар огцорсны дараа тус улсын байдлыг хэн хянаж байгаа нь тодорхойгүй хэвээр байна.

Киргизийн Ерөнхийлөгч Сооронбай Жээнбеков “Улс орон нь хууль ёсны зам руугаа буцаж орсны дараа огцорно” гэдгээ энэ сарын 9-ний өдөр мэдэгдсэн билээ. Тэрбээр мөн Ерөнхий сайд Кубатбек Бороновыг огцруулж, дараа нь аравдугаар сарын 21 хүртэл Бишкект онц байдал тогтоох тухай зарлигт гарын үсэг зуржээ.