УИХ-ын гишүүн Ц.Анандбазарыг охид, эмэгтэйчүүдэд бэлгийн дарамт үзүүлдэг гэх үндэслэлээр шалгаж, Эрүүгийн хуулийн тусгай ангийн 12.1 буюу хүчингийн хэрэгт яллагдагчаар татаж байсан. Харин түүний холбогдох хэргийг нийслэлийн Прокурорын газраас хэрэгсэхгүй болгож, хаасан гэх мэдээлэл бий. Энэ талаар Улсын Ерөнхий Прокурорын Олон нийттэй харилцах албаны мэргэжилтнээс тодрууллаа.

      Тэрбээр “УИХ-ын гишүүн Ц.Анандбазарт холбогдох хэргийг мөрдөх байгууллагаас хэрэгсэхгүй болгох саналтай Нийслэлийн прокурорын газарт ирүүлснийг прокурор хянаж, мөрдөгчийн саналыг үндэслэлтэй хэмээн үзэж хэргийг хэрэгсэхгүй болгож шийдвэрлэсэн. Нийслэлийн Прокурорын газраас гаргасан дээрх тогтоолыг хэргийн оролцогч нарт танилцуулж байгаа. Хэрэв оролцогч нар тогтоолыг эс зөвшөөрвөл гурав хоногийн дотор гомдол гаргах эрхтэй. Энэ нь хувь хүний нууцтай холбоотой учир дэлгэрэнгүй мэдээлэл өгөх боломжгүй байна” гэсэн юм.