Завхан аймгаас цэрэгт татагдсан залуусыг тээвэрлэж явсан автомашин осолджээ. Тодруулбал, энэ сарын 17-нд Завхан аймгаас Баян-Өлгий аймаг дахь Зэвсэгт хүчний 340 дүгээр ангид цэргийн алба хаахаар татагдсан залуусыг тээвэрлэж явсан автомашины зүүн урд дугуй саатаж, автомашин замын хажуу руу орсон байна.

     Ослын улмаас цэрэгт татагдсан залуусийн биеийн байдал ямар байгаа талаар тус сумын Эрүүл мэндийн төвийн дарга С.Чанцал-Очирмаагаас тодрууллаа. Тэрбээр “Энэ сарын 17-ны 22:00 цагт манай эмнэлэгт цэрэгт татагдсан залуус тээвэрлэж явсан автомашин осолдсон гэх дуудлага, мэдээлэл ирсэн. Дуудлагын дагуу манай сумын эмч, эмнэлгийн ажилчид ослын газар очиж, гэмтсэн цэргүүдийг зөөвөрлөж авчирсан. Мөн аймгаас нарийн мэргэжлийн дөрвөн эмч ирж, осолдсон иргэдэд анхан шатны тусламж үзүүлж, үзлэг шинжилгээ хийсэн. Эмч нарын үзлэгээр цэрэгт татагдаж буй хоёр залуугийн толгой гэмтсэн байсан учир оёдол тавьсан.Тэднийг өнөөдөр аймгийн нэгдсэн эмнэлэг рүү шилжүүлсэн. Мөн ослын газраас Дөрвөлжин сум руу гар нь хугарсан нэг ахлагч, толгой нь гэмтсэн нэг залуу өөрсдийн хүсэлтээр явсан. Тэдний биеийн байдал ямар байгааг мэдэхгүй байна. Өнөөдөр 06:00 цагт бэртэлгүй цэргүүдийг Баян-Өлгий аймаг дахь зэвсэгт хүчний 340 дүгээр анги руу тээвэрлэсэн” гэлээ.