Хотын дарга Х.Нямбаатар гэр хорооллын 32 мянган айлд зуух зээлээр тараахаар болсон. Тэгэхдээ төсвийн 28 тэрбум төгрөгөөр 32 мянган зуух тендерээр худалдаж авна, түүнийгээ гэр хорооллын айлуудад зээлээр тараах гэнэ.

Хотын дээгүүр хөхөрч хөшилдсөн, хорт хавдар болж бугшсан утаанд үе үеийн Хотын дарга нар, Засгийн тэргүүнүүд дур, дурын оношоо тавьж ирсэн. Тэгээд өөрсдөдөө ашигтай аргыг “эмчилгээ” гэж бидэнд итгүүлдэг. Тэртээ 2010 онд Г.Мөнхбаярыг Хотын дарга байх үед “Асуудал зуухандаа байна” гэдэг онош тогтоогдоод, одоогийн “MCS”-ийнхэн “утаагүй” гэх тодотголтой зуухыг Улаанбаатар даяар тарааж байлаа. Зуухаа сольсон ч утаа гэх хорт хавдар эмчлэгдээгүй тул 2018 онд “Асуудал түлшиндээ байна” гэсэн шинэ онош тавиад, “Тавантолгой түлш” ХХК-ийг байгуулж, “MCS”-ийн нийлүүлсэн мидлингээр “утаагүй” гэх сайжруулсан шахмал түлшийг үйлдвэрлэж эхэлсэн.

     Ингээд өнгөрсөн зургаан жил өнөөх “утаагүй” зуухандаа, “утаагүй” түлшээ түлж үзлээ. Утаа бас л буурсангүй. Гэтэл одоо Х.Нямбаатар “Асуудал зуухандаа л байсан юм байна” гэж дахиж оношлоод, 32 мянган зуух тараахаар болчихлоо. Зуух, түлш хоёроо ээлжилж солисоор байтал зуурдаар одогсдынхоо тоог тоолж дийлэхээ болих нь.  

Ийнхүү нэгэнт зуухтайгаа дахин зууралдаж эхэлснийх, 2010-2016 онд зургаан жил үргэлжилсэн “утаагүй” гэх зуух тараалтыг “MCS”-ийнхэн охин компаниудаараа халхавчлан, хэчнээн тэрбум төгрөгөөр хэрхэн гүйцэтгэж байсныг эргэн сануулъя.

Байгаль орчны яамны тайлан, ҮАГ-ын дүгнэлтээр, 2010-2013 онд АНУ-ын Мянганы сорилтын сангийн “Цэвэр агаар” төслийн 33.8 сая ам.долларын санхүүжилтээр 98 мянган зуух, 2013-2016 онд Засгийн газар ба Дэлхийн банкны хамтарсан “Улаанбаатар-Цэвэр агаар” төслийн 4.5 сая ам.долларын санхүүжилтээр 40 мянган зуух, нийт 140 мянган зуух тараасан. Нэмээд, 2011-2015 онд Засгийн газрын харьяа “Цэвэр агаар” сангаас 32 тэрбум төгрөгийг зууханд зарцуулсан. Нэгтгэж тооцвол, “Цэвэр агаар” гэх нэг нэрийн доор, гурван өөр эх үүсвэрээр, зургаан жилийн хугацаанд нийт 160 гаруй тэрбум төгрөгөөр 140 мянган зуух тараасан гэсэн үг.

     Тэгвэл дээрх 160 гаруй тэрбум төгрөгийн 140 мянган зуухыг “Сэлэнгэ констракшн” ХХК болон “Рояал өүшн” ХХК гэх хоёр компани нийлүүлж, тараасан байдаг.

АНУ-ын Мянганы сорилтын сангийн “Цэвэр агаар” төсөл: 97 мянган зуух- 33.8 сая ам.доллар

     АНУ-ын Мянганы сорилтын сангаас Улаанбаатарын утааг бууруулах зорилгоор 2010 оноос 2012 оны арванхоёрдугаар сар хүртэл 33.8 сая ам.долларын санхүүжилтээр “Цэвэр агаар” нэртэй зуух тараах төслийг хэрэгжүүлсэн. Энэхүү “Цэвэр агаар” зуухны төслийг хэрэгжүүлэгчээр “Сэлэнгэ констракшн” ХХК болон “Рояал өүшн” ХХК ажилласан. Ингэхдээ “Сэлэнгэ констракшн” ХХК нь Өлзий, Хас нэртэй зуухыг Туркээс, “Рояал өүшн” ХХК нь Дөл, Голомт нэртэй зуухыг Хятадаас оруулж ирсэн. Ингээд Өлзий, Хас, Дөл, Голомт нэртэй нийт 98 мянган зуух оруулж ирж тараасан байдаг. Тухайн 98 мянган зуухнаас 75 мянган зуухыг нь “Сэлэнгэ констракшн” ХХК, үлдсэнийг нь “Рояал өүшн” ХХК нь нийлүүлсэн гэх тоо бий.

Тухайн үед “Сэлэнгэ констракшн” ХХК нь Өлзий зуухыг 352 мянган төгрөгөөр, Хас зуухыг 480 мянган төгрөгөөр, “Рояал өүшн” ХХК нь Дөл зуухыг 378 мянган төгрөгөөр, Голомт зуухыг 330 мянган төгрөгөөр оруулж ирж байв.

Засгийн газар ба Дэлхийн банкны “Улаанбаатар-Цэвэр агаар” төсөл- 40 мянган зуух- 4.5 сая ам.доллар

Дээр дурдсан АНУ-ын Мянганы сорилтын сангийн санхүүжилттэй 33.8 сая ам.долларын санхүүжилттэй 98 мянган зуухны “Цэвэр агаар” төсөл хэрэгжиж дууссаны дараа Засгийн газраас дахиад 40 мянган зуух тараах шаардлагатай гэж үзсэн. Ингээд Засгийн газар, Дэлхийн банкны хамтарсан 4.5 сая ам.долларын санхүүжилттэй, “Улаанбаатар-Цэвэр агаар” нэртэй, 40 мянган зуухны хөтөлбөрийг 2013 оны есдүгээр сард эхлүүлсэн.

Энэхүү “Улаанбаатар-Цэвэр агаар” төслийг дахиад л “Сэлэнгэ констракшн” ХХК болон “Рояал өүшн” ХХК гүйцэтгэж, өнөөх Өлзий, Хас, Дөл, Голомт нэртэй зуухнуудаа оруулж ирж тараасан. Мөн нэмэлтээр “Элмеко” ХХК Талст зуух, “Их тэнгэрийн хүч” ХХК Бекас нэртэй зуухнууд оруулж ирж, хамжигчаар оролцжээ.

Ийнхүү “Сэлэнгэ констракшн” ХХК болон “Рояал өүшн” ХХК гэх хоёрхон компанийн Турк, Хятадаас оруулж ирсэн Өлзий, Хас, Дөл, Голомт гэх дөрвөн төрлийн зууханд АНУ-ын Мянганы сорилтын сангийн 33.8 сая ам.доллар, Засгийн газар, Дэлхийн банкны 4.5 сая ам.доллар, Засгийн газрын харьяа “Цэвэр агаар” сангийн 32.2 тэрбум төгрөг буюу одоогийн ханшаар 160 гаруй тэрбум төгрөг зарцуулагджээ.

Тэгвэл Улаанбаатарт зургаан жил зуух тараасан “Сэлэнгэ констракшн” ХХК болон “Рояал өүшн” ХХК-ийн эзэд нь одоо “MCS”-ийн Ж.Оджаргалын “цэрэг”-үүд.

Тухайлбал, “Сэлэнгэ констракшн” ХХК-ийг Лувсандашийн Мягмаржав гэх хүн эзэмшиж байгаад татан буулгасан. Тэгвэл Л.Мягмаржав нь 2002 оноос Ж.Оджаргалын “MCS” группийн харьяа “Зүүн хараа трейд” ХХК-ийн гүйцэтгэх захирлаар, 2004-2014 онд Ж.Оджаргалын “М Си Эс кокакола” ХХК-ийн гүйцэтгэх захирлаар, 2014-2015 онд “MCS” группийн Дэд ерөнхийлөгчөөр, 2015 оноос хойш одоог хүртэл “М Си Эс кокакола” ХХК-ийн гүйцэтгэх захирлаар ажиллаж байгаа нэгэн.

 “Рояал өүшн” ХХК нь одоог хүртэл  Очирбатын Эрдэнэжаргал гэгчийн нэр дээр байдаг. Тэгвэл О.Эрдэнэжаргал нь Ж.Оджаргалын “М Си Эс инвестмент” ХХК болон “М банк” ХХК-ийн Бүтээгдэхүүн хариуцсан менежерээр ажилладаг ажээ.

Товчхондоо, “MCS”-ийнхэн “Сэлэнгэ констракшн” ХХК болон “Рояал өүшн” ХХК гэх хоёр компаниар халхавчлан, Мянганы сорилтын сангийн, Дэлхийн банкны, Засгийн газрын гээд зуухны санхүүжилтүүдийг хуу хамчихсан гэсэн үг. Хоржоонтой нь, өдгөө “MCS”-ийнхэн “Тавантолгой түлш” ХХК-ийн сайжруулсан шахмал түлшний найрлагийн 95 хувийг бүрдүүлдэг мидлинг буюу баяжуулсан нүүрсний нийлүүлэгчээр ажиллаж байгаа. Өөрөөр бол, гэр хорооллын айлууд “MCS”-ийн нийлүүлсэн зууханд, “MCS”-ийн нийлүүлсэн нүүрсийг түлж байгаа гэсэн үг.