Авлигатай тэмцэх газраас Солонгосын хоёр иргэнийг баривчлан саатуулсан байдаг. Тодруулбал, баривчлагдсан хүмүүс нь "Тэнүүн-Огоо" компани, БНСУ-ын "Дэүбас" компанитай хамтран ажиллахад тэдний дунд зуучлагч компаниар гэрээлэн ажилласан гэх. Тэднийг цагдан хорих 461 дүгээр ангид саатуулаад байгаа юм.

Тэгвэл автобусны асуудлаар саатуулагдсан БНСУ-ын хоёр иргэн мэдүүлэг өгч, ам нээж эхэлжээ. Тэд “Тэнүүн-Огоо" компани, БНСУ-ын "Дэүбас" компани руу автобус захиалахдаа Евро-2 стандартыг захиалсан. Захиалагч тал захиалгын дагуу автобуснуудыг үйлдвэрлэсэн. Үйлдвэрлэсэн автобусыг ирэх үед “Тэнүүн-Огоо" компанийн захирал А.Ганхуяг Евро-5 стандарт гэсэн бичиг наа гэж хэлсэн юм билээ. Энэ асуудлыг "Иктае" гэх компани болон “Тэнүүн-Огоо” ХХК хамтарч хийсэн. Энэ хууль бус ажиллагааг нь бид мэдэхгүй. Зөвхөн стандартын дагуу үйлдвэрлэсэн” гэжээ.

Өөрөөр хэлбэл, “Тэнүүн-Огоо” ХХК-ийн захирал А.Ганхуягийг Евро-2 стандартыг автобусанд Евро-5 гэсэн бичиг наахыг даалгасан гэж мэдүүлжээ.

Ташрамд дурдахад, Ногоон автобусны хэрэгт холбогдуулж, аравдугаар сарын 1-нд дөрвөн хүнийг албадан саатуулсан. Одоо мөрдөн шалгах ажиллагаа эхэлж байгаа гэдгийг Ерөнхий прокурор Б.Жаргалсайхан мэдээлсэн. Тодруулбал, "Тэнүүн-Огоо" компанийн А.Ганхуяг, компанийн захирал асан Ж.Эрдэнэбат, нийслэлийн Худалдан авах ажиллагааны газрын дарга Б.Түмэнжаргал, нийслэлийн Худалдан авах ажиллагааны газрын Худалдан авах ажиллагааны хэлтсийн мэргэжилтэн Ш.Баярсүх нарын дөрвөн хүнийг хуулийн байгууллагаас саатуулсан юм.