-ЖОЛООЧ ХАЙХРАМЖГҮЙ БАЙДЛААСАА БОЛЖ БӨХИЙН ДУГУЙЛАНД ЯВЖ  БАЙСАН ДҮҮГ МИНЬ АВТОМАШИНААРАА МӨРГӨЖ, АМИЙГ НЬ ХӨНӨӨСӨН-

     Дархан-Уул аймгийн Дархан сумын “Монгол алт”-ны  уулзварт энэ сарын 16-нд зам тээврийн ноцтой осол гарсан. Тодруулбал, том оврын автомашины жолооч 44 настай эрэгтэй Ц 13 настай эрэгтэй Г-г дайрч амийг нь хохироосон харамсалтай хэрэг гарсан билээ. Зам тээврийн ослоор амиа алдсан 13 настай талийгаачийн ах Г-тэй холбогдож, зарим зүйлийг тодрууллаа.

-Танай гэр бүлийнхэнд гүн эмгэнэл илэрхийлье. Та дүүгийнхээ амь эрстсэн шалтгаан, нөхцөлийг хэрхэн таамаглаж байгаа вэ?

        -Энэ сарын 16-ны 15:10 цагийн үед 13 настай дүү минь зуурдаар буюу зам тээврийн ослоор нас барсан харамсалтай хэрэг гарсан. Дүүг минь дайрч, амийг нь хохироосон жолооч тухайн үед гар утсаараа оролдож байсан юм билээ. Ослын үеийн камерын бичлэг цахим орчинд цацагдсан боловч тус бичлэгийг устгасан байсан. Тиймээс бид жолоочийг баримтаа устгаж байна гэж хардаж байгаа. Ослын үеийн бичлэгийг үзсэн олон хүн бий.

-Та жолоочийг ослын үеийн бичлэгийг устгасан гэж хардаж байгаа  гэлээ. Тус осолд ямар нэгэн гаднын нөлөө байх магадлалтай юу?

          -Би хувьдаа шүүх хуралд ямар нэгэн гаднын орж болзошгүй гэж хардаж байна. Задлан шинжилгээний мөрдөн байцаалт үргэлжилж байгаа. Дүүг минь автомашинаар дайрч, хөнөөсөн жолоочоос согтууруулах болон мансууруулах төрлийн бодис илрээгүй.

-Дүү нь өмнө нь тэр гарцаар гардаг байсан уу. Тухайн үед ямар ажлаар хаашаа явж байсан  бэ?

        -Дүү минь бөхийн дугуйланд явдаг байсан юм. Осол гардаг өдөр талийгаач гэрээсээ эрт гараад бэлтгэл рүүгээ алхсан юм билээ. Дүүгийн бэлтгэл 15:05 цагт эхэлдэг. Тэгээд 15:10 цагийн үед осолдсон байсан.

-Дүү нь гарцаар гарахдаа ганцаараа явж байсан уу?

           -Дүү минь гарцаар гарахдаа ганцаараа явж байсан юм билээ. Бүх автомашиныг явж дууссаны дараа ногоон гэрлээр гарч байхад нь хажуу талаас нь тойрч орж ирсэн автомашины жолооч дайрчихсан камерын бичлэг олон нийтийн сүлжээгээр цацагдсан. Жолооч утсаар оролдож байхдаа буюу анхаарал болгоомжгүй үедээ гэрлэн дохио асахаас өмнө гарах гэж  яарч байгаад дүүг минь дайрсан гэдэг нь камерын бичлэгт тод бий.

-Та бүхэн жолоочтой уулзсан уу. Жолоочийг таньдаг уу?

        -Биднийг жолоочтой уулзуулаагүй. Цагдаа нар дүүг минь дайрч, амийг нь хөнөөсөн жолоочоос байцаалт авч байгаа байх. Гэвч тус жолооч гадуур чөлөөтэй явж байгаа. Жолооч тухайн үед ганцаараа явж байсан гэсэн. Бид тус жолоочийг сайн танихгүй ч сураг гаргачихаар хүн байна лээ. Манай гэр бүлийнхнээс одоогийн байдлаар байцаалт өгсөн хүн байхгүй.

-Дүү нь осолдсон үедээ эмнэлэгт хүргэгдэж амжсан уу?

        -Дүү эмнэлэгт хүргэгдэж амжаагүй. Газар дээрээ амьсгал хураасан байсан. Талийгаачийн ажил явдал дуусаагүй байгаа учир үүнээс өөр дэлгэрэнгүй мэдээлэл өгөх боломжгүй байна. Шүүх хурал дууссаны  дараа бид мэдээлэл өгөх боломжтой.

-Та замын хөдөлгөөнд оролцож буй зорчигч, жолооч нарт юу хэлэх вэ?

         -Сүүлчийн үед зам тээврийн осол нэмэгдэж, хүний амь эрсдэх боллоо. Тиймээс замын хөдөлгөөнд оролцож буй жолооч нар дүрмийн дагуу зорчиж, гар утас болон анхаарал сааруулах зүйл хэрэглэхгүй байх нь чухал. Таны болоод бусдын амь, амьдрал таны гарт бий гэдгийг мартаж болохгүй гэж хэлмээр байна.