Төр нийгмийн зүтгэлтэн С.Зориг агсны амыг хөнөөсөн хэрэгт буруутгагдаж гурван шатны шүүхээс 20-25 жилийн хорих ял сонссон Б.Содномдаржаа, Т.Чимгээ нар батлан даалтад гараад дөрвөн сар болж байна. Шинэ нөхцөл байдал үүссэний улмаас хэргийг нэмэлт мөрдөн байцаалтад буцааж, тэднийг батлан даалтад гаргасан юм. Ингэснээр гурван шатны шүүхийн шийдвэр хүчингүй болж Т.Чимгээ, Б.Содномдаржаа нарт холбогдох хэргийг дахин шалгах юм.

                Өнгөрсөн тавдугаар сард Засгийн газрын 100 хоногийн тайлан танилцуулж, Ерөнхий сайд Л.Оюун-Эрдэнэ, ЗГХЭГ-ын дарга Ц.Нямдорж нар маш ноцтой мэдэгдэл хийсэн юм. Тодруулбал, ЗГХЭГ-ын дарга Ц.Нямдорж “С.Зоригийн хэргийн захиалагч нь Э.Бат-Үүл” хэмээн мэдэгдсэн. Тэрбээр “Би 2016 оноос хойш С.Зориг агсны хэрэгт хэлмэгдсэн хүмүүсийн хойноос хөөцөлдөж байна. Монголд шударга ёс, хууль байдгийг үзэх гэж зургаан жил болж байна. 2016 онд С.Зоригийн хэргийг мөрдсөн хүмүүс захиалагчийг нь тогтоож чадаагүй хэрнэ, захиалгаар хүн хөнөөсөн гээд Б.Содномдаржаа, Т.Чимгээ нарт ял оноосон. Иргэн Ц.Амгаланбаатарын мэдүүлгээр Э.Бат-Үүлийг энэ хэргийн захиалагч хэмээн шалгасан. “Нотлогдож байгаа тул” гэсэн үгтэйгээр шалгаж эхэлсэн хэдий ч 20 хоногийн дараа "Нотлогдоогүй" гэсэн тайлбараар яллагдагчаар татсан тогтоолыг хүчингүй болгосон. 2016 онд иргэн Ц.Амгаланбаатарын мэдүүлгээр Э.Бат-Үүлийг энэ хэргийн захиалагч хэмээн шалгасан. “Нотлогдож байгаа тул” гэсэн үгтэйгээр шалгаж эхэлсэн хэдий ч 20 хоногийн дараа "Нотлогдоогүй" гэсэн тайлбараар яллагдагчаар татсан тогтоолыг хүчингүй болгосон. Ц.Амгаланбаатар 2014 оноос хойш Э.Бат-Үүлийн талаар ярьсан. Гэвч Э.Бат-Үүлээс ямар ч байцаалт аваагүй. Тиймээс би энэ хэрэгт хүн хэлмэгдсэн гэж тууштай үзэж байгаа" хэмээн мэдээлсэн юм. Ц.Амгаланбаатар 2014 оноос хойш Э.Бат-Үүлийн талаар ярьсан. Гэвч Э.Бат-Үүлээс ямар ч байцаалт аваагүй” гэсэн юм.

         Харин тус мэдэгдлийн хариуд Э.Бат-Үүл “Хэрвээ намайг С.Зоригийн хэргийн захиалагч гэж байгаа бол барь, хориод хариуцлага тооцох ёстой биз дээ. Би энд байж л байна шүү дээ” гэх тайлбар өгсөн байдаг.          

         Мөн Т.Чимгээг батлан даалтад гарах үеэр түүний ах Т.Хүрэлбаатар “Миний дүү хэзээ ч хэрэг хийх хүн биш. Өнгөрсөн зургаан жилийн хугацаанд би дүүгийнхээ төлөө тэмцэл хийлээ. Энэ бүх хугацаанд бидэнд тусалсан хүмүүст баярлалаа. Бидний зовлонг өөрийн зовлон шиг хамт үүрэлцэж, зургаан жил хамт зүтгэсэн өмгөөлөгч С.Оюунцэцэгтээ баярлалаa. Гурван хүний амийг аварлаа. Хэрэв энэ хэрэг үнэн зөвөөр шийдэгдээгүй бол миний дүү болон Б.Содномдаржаа нар хорих ангидаа бурхан болох байлаа. Энэ хэрэг нууц байхад Т.Чимгээ хэлж байсан. “Захиалагчийн нэр гэдэгт Э.Бат-Үүл гэж хүний нэр байсан. Ц.Нямдорж гэж нэр байгаагүй” гэж хэлж байсан” хэмээсэн юм.   

     Харин ЗГХЭГ-ын дарга, Хууль зүй, дотоод хэргийн сайд асан Ц.Нямдорж С.Зориг агсны амийг хөнөөсөн хэргийн талаар өнгөрсөн дөрөвдүгээр сард мэдээлэл өгсөн юм. Тэрбээр "Энэ хэрэгт Т.Чимгээ, Б.Содномдаржаа нарыг хэлмэгдүүлсэн. Ингэхдээ тэднийг эрүүдэн шүүж, яргалсан. Гүйцэтгэх ажиллагааны тогтоолд Г.Эрдэнэбат өөрөө гарын үсэг зурж баталгаажуулсан.

      Эрүүдэн шүүлт явахад би Хууль зүй, дотоод хэргийн сайд байгаагүй. Эрүүгийн байцаан шийдэх хуулийн 41 дэх заалтад шинээр хэргийг задлан үзэх гэж байдаг. Үүний дагуу прокурор хүсэлт бичээд эрүүдэн шүүсэн гэдгээр нь суллуулах боломжтой. Намайг ажлаа авах үед Т.Чимгээ, Б.Содномдаржаа нар "Тахир соёотод" хоригдож байсан. Энэ бол суллах боломжгүй хорьдог газар. Жил орчим тэнд хорьсныг нь би авч ирсэн. Би эднийг хэлмэгдсэн гэдгийг нь хамгийн сайн мэдэж байсан учраас гэр бүлийнхнээс нь уучлалт гуйсан. Э.Булган гурван удаа мэдүүлэг өгөхдөө наад хоёр хүн чинь биш гэж хэлсэн байдаг" гэсэн юм. Одоогоор Б.Содномдаржаа, Т.Чимгээ нарыг дахин шалгаж эхэлсэн эсэх талаар тэдний гэр бүлийнхнээс тодруулсан юм.

      Б.Содномдаржаагийн ээж Б.Жавзмаа хэлэхдээ” Хүүгийн минь бие батлан даалтад гарснаас хойш таагүй байгаа. Олон хүнтэй газар байх дургүй, дотор нь давчдаад байж чаддаггүй юм. Тийм болохоор гадуур салхилж, уул, хадаар явдаг. Хүүг минь хэзээ ирээд дахин баривчлаад явахыг хэлж мэдэхгүй байна. Энэ тухай бодохоос л дотор харанхуйлах юм. Хүүг минь нэг бүр сулласан байсан бол үлдсэн амьдралаа бодож, ажил төрөл хиймээр л байна. Би хүүгийнхээ төлөө санаа зовж сууна. Хүү минь хорихоос их айдастай гарч ирсэн. Тийм болохоор хашааны хаалга дуугарахад л айж түгшдэг юм шиг байна лээ” гэсэн юм.

          Харин Т.Чимгээгийн ээж Ц.Марууштай холбогдож охинтойгоо уулзсан эсэх талаар тодруулсан юм. Тэрбээр “Охин минь ирж 20-аад хонож, хэдхэн хоногийн өмнө Улаанбаатар руу буцсан. Охинтойгоо уулзаад их сайхан байлаа. Охины минь бөөр, нуруу, зүрх гээд өвдөөгүй эрхтэн байхгүй, эмчилгээ хийлгэдэг. Даралт нь ихсэж, багасдаг юм шиг байна лээ. Охиныг минь бүр мөсөн суллачихсан бол хэчнээн сайхан бэ гэж бодож суух юм. Хэргийг дахин шалгаж эхлээгүй юм шиг байна лээ. Охин минь энэ талаар юм яриагүй” гэлээ.