Энэ сарын 4-нд Баянзүрх дүүргийн 15 хороо Бөхийн өргөөний зүүн талд байрлах IV байрны орцноос цустай зүү тариур, мансууруулах төрлийн байж болзошгүй эм тариа олдсон. Бид иргэдээс ирсэн гомдлын дагуу газар дээрээс нь мэдээллийг дамжуулан хүргэсэн билээ. Тухайн орцны хамгийн дээд хэсэг буюу лифтний хонгилд аюултай хог хаягдлыг хаясан бөгөөд эх сурвалжууд удаа дараа ийм хог хаягдал тус байрнаас гарсан гэдгийг мэдээлж байв. 

Тэгвэл энэ хэргийг Баянзүрх дүүргийн Цагдаагийн II хэлтэс дээр шалгаж байгаа аж. Энэ талаар холбогдох ажилтнаас тодруулахад "Орцноос аюултай хог хаягдал буюу цустай зүү тариур, капсултай эм, согтууруулах төрлийн ундааны хог хаягдал олдсон талаарх дуудлага мэдээллийн дагуу газар дээр нь ажилласан. Одоогийн байдлаар шалгалтын ажиллагаа үргэлжилж байна. Аюултай хог хаягдлыг Шүүхийн шинжилгээний газарт шалгуулж байгаа. Одоогоор хариу нь гараагүй байна. Мөн холбогдох этгээдүүдийг илрүүлээгүй" гэх тайлбарыг өглөө.