-Айл, өрхийн тоолуурын самбарт тасарсан автоматыг эргүүлэн залгах, гал хамгаалагч болон кабелийн үзүүр сэргээх зэрэг ахуйн үйлчилгээг үнэ төлбөргүй хийж байна-

           Эрчим хүчний бодлогын хэрэгжилтийг зохицуулах газрын дарга Д.Батзоригоос Бүх нийтийн бэлэн байдлын зэрэгт шилжсэнтэй холбоотой эрчим хүчний салбар ямар арга хэмжээ авч ажиллаж буй талаар тодрууллаа. 

-Бүх нийтийн бэлэн байдлын зэрэгт шилжсэнтэй холбоотой эрчим хүчний салбар ямар арга хэмжээнүүдийг авч ажиллаж байна вэ?

-Эрчим хүчний салбар өндөржүүлсэн бэлэн байдлын горимд шилжсэн. Эрчим хүчний яам болон харьяа үйлдвэр, компаниуд хариуцлагатай жижүүрийг 24 цагаар ажиллуулж байна. Эрчим хүчний сайд цахим хурлыг өдөрт 2-3 удаа хийж, компанийн удирдлагуудад тухай бүрт нь үүрэг, даалгавар өгч ажиллаж  байна.

-Эрчим хүчний зарим үйлчилгээг бэлэн байдлын хугацаанд үнэ төлбөргүй үзүүлнэ гэсэн. Ямар үйлчилгээ үзүүлж байгаа вэ?

-Айл, өрхийн тоолуурын самбарт тасарсан автоматыг эргүүлэн залгах, гал хамгаалагч болон кабелийн үзүүр сэргээх зэрэг ахуйн үйлчилгээг хангаж, хөл хорионы хугацаанд энэ төрлийн үйлчилгээг үнэ төлбөргүй хийж байна.

-Энэ үед цахилгаан, дулааны хэрэглээг түдгэлзүүлэхгүй гэсэн. Энэ талаар дэлгэрэнгүй мэдээлэл өгнө үү?

-Цахилгаан хэрэглэсэн бол төлбөрөө төлнө. Хол хорионы хугацаанд цахилгаан таслахгүй. Бид цахилгаан таслахгүй найдвартай байдлыг хангаж ажиллаж байна. Гэхдээ иргэд цахилгаан, дулааны  төлбөрөө заавал төлөх ёстой.

-Танай салбарт тээврийн хэрэгслийн хүндрэл гарч байна уу. Ямар зохицуулалт хийгдэж байна вэ?

-Нийслэлийн Онцгой байдлын комиссоос ажлын үнэмлэхээ үзүүлээд зорчихыг зөвшөөрсөн. Энэ тал дээр асуудал гараагүй.

-Ард, иргэддээ хандаж уриалга хэлэх үү?

-Улсын Онцгой комиссоос гарч буй зөвлөмжийг сайтар биелүүлж, дулаан, цахилгааны төлбөрөө заавал төлөөрэй. Банкууд ажиллахгүй байсан ч цахим банкаар үйлчлүүлж, төлбөрөө хугацаанд нь төлөхийг уриалж байна.