Манай улсад коронавирусийн халдвар илэрч улс даяар хатуу хөл хорионд орж,  улсын эдийн засаг, бизнес эрхлэгчдэд хүндрэл үүсээд байна. Өнгөрсөн онд нийгэм, эдийн засгийн нөхцөл байдалдаа дүгнэлт хийж, энэ жил шинээр хийх ажлаа нарийн төлөвлөдөг. 2020 онд хийхээр төлөвлөсөн бүтээн байгуулалтуудын талаар тоймлон хүргэж байна. 

Монгол Улсад 2.512.7 тэрбум төгрөгийн бүтээн байгуулалт хийхээр төлөвлөжээ

      Энэ жил төсвийн зарлагад нийт 13.872.6 тэрбум төсөвлөсөн байсан. Үүнээс барилга байгууламж, бүтээн байгуулалт, их засвар, тоног төхөөрөмж, стратегийн нөөц хөрөнгөд зарцуулахаар 3.806.1 тэрбум төгрөг төсөвлөсөн байна. Энэхүү санхүүжилтэд улсын төсвийн хөрөнгө оруулалт, концесс, орон нутгийн хөрөнгө оруулалт, стратегийн нөөц, гадаадын зээл, тусламжаар хэрэгжих хөрөнгө оруулалтын төслүүд хамаарагддаг. Уг хөрөнгийн зардлаас 2.512.7 тэрбумыг нь барилга байгууламж, бүтээн байгуулалтын ажилд, 157.6 тэрбум төгрөгийг их засварын ажилд зарцуулах юм. Харин “Барих-шилжүүлэх” концессын эргэн төлөлтөд 323.6 тэрбум төгрөгийг төсөвлөөд байна. Өнгөрөгч онд 12 төсөлд 144.7 тэрбумыг олгож байсан бол 2020 онд санхүүжилт гурав дахин нэмэгдсэн байна.

 Орон нутагт нийт 894.1 тэрбум төгрөгийн төсөв бүхий 1005 төсөл, арга хэмжээг хэрэгжүүлэхээр төлөвлөөд байна. 21 аймагт нийтдээ 93 сургууль, 72 цэцэрлэг баригдах бөгөөд эмнэлэг, инженерийн шугам сүлжээ, авто зам, соёл, спортын цогцолборууд зэрэг нийгэмд тулгамдаж байгаа асуудлыг шийдэх бүтээн байгуулалтын ажлууд өрнөх юм

Улсын төсвөөр хийгдэх бүтээн байгуулалтууд

    Энэ жилд улсын төсвийн хөрөнгө оруулалтаар нийгмийн хэрэгцээ шаардлагад нийцсэн, орон нутаг болон салбаруудад тулгамдаж буй асуудлыг шийдвэрлэхэд чиглэсэн нийгмийн ач холбогдол, эдийн засгийн үр ашиг бүхий төслүүдийг хэрэгжүүлэхээр төлөвлөсөн байна. Энэ жилийн төсөв нь өмнөх оноос 17.7 хувиар өссөн бөгөөд 1.828.9 тэрбум төгрөгийн хөрөнгө оруулалтаар 1427 төсөл, арга хэмжээ, барилга байгууламжийг барих юм. Улсын төсвийн хөрөнгө оруулалтын 68 орчим хувь нь бүтээн байгуулалтын төслүүд бол үлдсэн 32 хувь нь их засвар хийх, тоног төхөөрөмж худалдан авах, ТЭЗҮ, зураг төсөл боловсруулахад шаардлагатай санхүүжилт байна. 

Улсын төсвөөр орон нутагт хийгдэх бүтээн байгуулалтад 894,1 тэрбум төгрөг зарцуулна

    Орон нутагт нийт 894.1 тэрбум төгрөгийн төсөв бүхий 1005 төсөл, арга хэмжээг хэрэгжүүлэхээр төлөвлөөд байна. 21 аймагт нийтдээ 93 сургууль, 72 цэцэрлэг баригдах бөгөөд эмнэлэг, инженерийн шугам сүлжээ, авто зам, соёл, спортын цогцолборууд зэрэг нийгэмд тулгамдаж байгаа асуудлыг шийдэх бүтээн байгуулалтын ажлууд өрнөх юм. 

     Харин нийслэлд өмнөх онд 544.6 тэрбумын хөрөнгө оруулалтаар 372 төслийг хэрэгжүүлсэн бол энэ жил 584.5 тэрбум төгрөгийн 382 төсөл хэрэгжинэ. Сургууль, цэцэрлэгийн хүртээмжийг сайжруулах тал дээр үргэлжлүүлэн ажиллаж 38 цэцэрлэг, 28 сургууль, 13 сургууль, цэцэрлэгийн цогцолбор барихаар төлөвлөсөн байна. Мөн дэд бүтцийн салбарт 74.4 тэрбумын 63 төслийн ажил өрнөхөөр байгаа юм. Тухайлбал, 15 инженерийн шугам сүлжээ барих, 26 авто зам шинээр тавих зэрэг нийслэлд тулгамдаж байгаа асуудлыг шийдэх бүтээн байгуулалтын ажлууд эхлэх болно.  

      Мөн Азийн хөгжлийн банкны зээл, тусламжаар 35 төслийг хэрэгжүүлнэ. Эдгээр төслөөс онцлон дурдвал, “Хотын гэр хорооллыг хөгжүүлэх төсөл”, “10 мянган өрхийн ногоон орон сууц ба дасан зохицох чадвар бүхий хотын шинэчлэл төсөл”, “Сэргээгдэх эрчим хүчийг дэмжих төсөл” гэх мэт олон төсөл хөтөлбөр хэрэгжих юм. 

     Түүнчлэн Монгол Улсын хөгжлийг дэмжих зорилгоор гадаад улс болон улсын байгууллагууд засгийн газарт буцалтгүй тусламж, хөнгөлөлттэй зээл олгодог. Тэгвэл энэ жил гадаадын зээл тусламжаар сургууль, цэцэрлэг, эмнэлгийн үйлчилгээг сайжруулах ажилд 180.6 тэрбумын зээл, 25.1 тэрбумын тусламж нийт 205.7 тэрбум төгрөгийн санхүүжилт олгогдохоор болоод байна. Түүнчлэн цэвэрлэх байгууламжийн шинэчлэл, дэд бүтцийг сайжруулах тал дээр тодорхой зээл, тусламж  олгогдох байжээ.

Өнгөрөгч онд 12 төсөлд 144.7 тэрбумыг олгож байсан бол 2020 онд санхүүжилт гурав дахин нэмэгдсэн байна