СОНГУУЛИЙН ДАРААХ Х.БАТТУЛГА

Б. Цогтбаяр:
Улс төр- Анхаарлын төвд

2021-05-07, 873

Ерөнхийлөгч Х.Баттулга Их тэнгэрийн ордноосоо нүүхэд ганцхан сарын хугацаа үлдлээ. Тэгвэл тэр Их тэнгэрээс нүүгээд хаачих вэ. Нүүж очих газар нь Их тэнгэр шиг биш юм гэхэд ядаж дөхөж очих хэмжээний хамгаалалтай газар л биш бол Х.Баттулга баларч мэдэхээр байгаа.

Наанадаж л, Ерөнхийлөгч болохын тулд оффшор ярьж, олон хүний халаасанд гар дүрж, дургүйг нь хүргэсэн, Ерөнхийлөгч болсныхоо дараа шүүхээр нөлөөлж, олон арван хүний хөл гарыг тушсан, У.Хүрэлсүхтэй ид нөхөрлөж байхдаа МАН-ын хамаг лидерүүдийг шоронд илгээхэд нь тусалсан гэх мэтээр нь тэр өөрөө өөртөө хамгийн олон өстөн бэлдсэн Ерөнхийлөгчөөр нэрлэгдэж буй. Тиймээс түүнд нэн түрүүнд аюулгүй хоргодох газар хэрэгтэй. Тэгэхгүй бол төрийн тэргүүний эрх мэдэлтэй нь байхад нь халдаж зүрхлээгүй өстнүүд нь сэнтийгээсээ буусных нь дараа “нар үзүүлэхгүй” л байх болов уу. Дээрээс нь Сингапур дахь өөрийнх нь оффшор гэх мэт хэргүүд нь АТГ-т очих нь гарцаагүй.

Уг нь тэр Ерөнхийлөгчөөрөө үлдэж, ирэх зургаан жил айх аюулгүй байхын тулд сүүлийн зургаан сар “нойргүй” хонож буй. Даанч У.Хүрэлсүх түүнээс хүчтэй байгаа учраас бүх гарцыг нь хаасаар, тэр эцэстээ буланд шахагдчихлаа. Уг нь түүнд хоёр арга байсан. Эхнийх нь Үндсэн хуулийн цэцийн асуудлыг өөрт ашигтайгаар шийдүүлж, Ерөнхийлөгчийн суудлын төлөө дахин нэг үзээд алдах. Гэвч тэр Үндсэн хуулийн цэцийг яаж чадаагүй. Хоёр дахь нь АН-ыг гартаа оруулж, Н.Алтанхуягийг өмнөөсөө ялуулах. Гэтэл бас л Сонгуулийн ерөнхий хороог яаж ч чадахгүй байсаар эцсийн найдвар нь тасарч байна.

Түүний өмнөх дөрвөн Ерөнхийлөгчийн хоёр нь тэргүүнээсээ буумагцаа л АТГ, хууль хяналтынхан ээрэгдсэн бол хоёр нь төрийн тэргүүн байхдаа төрд шургуулсан дүү нарынхаа буянд хууль хяналтынхнаас холуур өнгөрч, тэр ч байтугай эд хөрөнгө, эрх мэдлийн “худаг”-тай болцгоосон.

Тухайлбал,

Анхны Ерөнхийлөгч П.Очирбат Ерөнхийлөгчийн суудлаасаа буумагцаа хоёр сарын дараа буюу 1997 оны наймдугаар сард өөрийнхөө “Очирбат сан”-гийн удирдах зөвлөлийн дарга болж байв. Улмаар хоёр жил гаруйн дараа ШУТИС-ийн “Экологи-тогтвортой хөгжлийн төв”-ийн захирлаар томилогдсон. Таван жилийн дараа Үндсэн хуулийн цэцийн гишүүн болж дэвшсэн. Тухайн үедээ Үндсэн хуулийг өөрийн талд ашигласан, “ММС” гэх нууц компанийг удирддаг гэх олон асуудалд орооцолдож байсан ч хууль хяналтынханд ээрэгдээгүй.

Хоёр дахь Ерөнхийлөгч Н.Багабандийн хувьд Ерөнхийлөгчийн сэнтийгээс буусныхаа дараа титэм үгээ тэрлэж эхэлсэн. Жил орчмын дараа намын гишүүнчлэлээ сэргээсэн боловч улс төрд хөл тавиагүй. Титэм үгээ бичиж, таван жил орчим суусныхаа дараа буюу 2010 онд “Оюутолгой”-н ТУЗ-д сонгогдож, өдийг хүртэл монголын хамгийн өндөр цалинтай, хамгийн “шуналтай” эрхмүүдийн нэгээр нэрлэгдэж яваа билээ.

Түүнтэй холбоотой олон хэргүүд сөхөгдөж байсан ч тэр 10 жил "Оюутолгой"-н ТУЗ-өөс алхам холдоогүй.

Гурав дахь Ерөнхийлөгч Н.Энхбаяр Ерөнхийлөгчөөсөө буугаад хамгийн их “турсан”, “туйлдсан” нэгэн. Тэрбээр, төрийн тэргүүний албаа өгмөгцөө эхлээд бизнесийн зөвлөгөө өгдөг компани байгуулсан гэдэг. Дараа нь намын харьяаллаа сэргээх гэсэн боловч хүлээж авахгүй байсаар 2010 оны арваннэгдүгээр сард МАХН нэрээ МАН болгож өөрчилсөн. Улмаар Н.Энхбаяр 2011 оны нэгдүгээр сард хуучин МАХН-ыг сэргээн байгуулж, даргаар нь сонгогдож байлаа. Гэвч 2012 оны дөрөвдүгээр сард АТГ-аас түүнийг цагдан хоригдож, төрийн тэргүүний албан тушаалаа урвуулан ашигласан хэргээр шүүхээс хоёр жил зургаан сарын ял сонссон. Ингээд алдарт 120 хоногийн өлсгөлөнгөө зарлаж байж, 2013 оны наймдугаар сард Ц.Элбэгдоржийн уучлалаар суллагдаж байв. Түүнээс хойш саарал ордон руу орохоор хэд хэдэн удаа оролдсон боловч чадаагүй. Эхнэр, хүүхдээ оруулах гээд ч бүтэлгүйтсэн. Эцэст нь, МАН-тай буцаж нэгдэж, энэ удаагийн Ерөнхийлөгчийн сонгуульд хамтран оролцох гэж байна. Олны яриагаар бол Ерөнхийлөгчийн сонгуулийн дараа том шагнал хүртэнэ гэх.

Дөрөв дэх Ерөнхийлөгч Ц.Элбэгдоржийг Ерөнхийлөгчийн суудлаасаа буугаад хаачихыг нь монголчууд хамгийн их сонирхож байлаа. Тухайн үед түүнийг Ерөнхийлөгчөөсөө буугаад АН-д буцаж элсээд улс төрд дахин хүч үзнэ, НҮБ-т ажиллана, гадаадын их сургуульд багшилна гэх зэргээр ярьж байв. Гэвч Ц.Элбэгдорж Ерөнхийлөгчийн суудлаасаа буугаад хоёр сарыг дараа Олон улсын ирээдүйн Монгол судлаачдыг дэмжих “EBI” гэх хөтөлбөрийг санаачлан эхлүүлж, гардан хэрэгжүүлж байв. Гэвч 2019 оноос эхлэн түүнийг АТГ-аас шалгаж эхэлсэн билээ.

Түүнээс хойш Ц.Элбэгдорж АТГ-ын дуудахад гутлаа тослоод, зангиагаа зүүгээд очдог нэгэн болсон

Харин тав дахь Ерөнхийлөгч Х.Баттулга тэдний хэнийх нь замналаар явах вэ гэдэг л одоо асуулт болж байна. Өөрөөр хэлбэл, тэр П.Очирбат шиг “Баттулга сан” байгуулаад захирал нь болох уу, Н.Энхбаяр шиг шоронд явж өлсгөлөн зарлах уу, эсвэл Н.Багабанди шиг төрийн компанийн толгойд “хадагдах” уу. Үгүй бол Ц.Элбэгдорж шиг АТГ-аас хааяа нэг дуудахад нь гутлаа тосолж очсоор, зав чөлөөгөөрөө монгол бичгээ үргэлжлүүлэн заасаар байх уу. Эс бөгөөс зүгээр л Баянгол зочид буудалд оффистой хэдэн компанийн захирал болоод амар жимэр амьдрах уу. Ерөнхийлөгч Х.Баттулга төрийн тэргүүний сэнтийгээсээ буугаад хаачих вэ гэдэг асуулт одоо ч хариултгүй байна. Ядаж таамаг ч алга байна.

СОНГУУЛИЙН ДАРААХ Х.БАТТУЛГА

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 2

Сэтгэгдэл үлдээсэн: 2021-05-07 15:49:01

Зочин: Баттулгад ӨХНӨ -р дахин нэр дэвшин сонгогдож 6 жил үгүй дээ гэхэд 2 жил үргэлжлүүлж хийх боломж байсан ч тэр боломжийг ашиглаж чадаагүй хэд хэдэн алдаа гаргасан 1..ЕТГ н даргаар Зи.Энхболдыг томиосон 2.зөвлөхүүдээрээ шивэгчингүүд авсан, 3.намтайгаа ажиллах нь бүү хэл хагралдуулсан ,4.улсстөр эдийн засгийн өрнөн мэдлэгтэы дадлага туршлагтай нөхдүүдээсээ хөнлийрсөн 5..ерөнхийлөгчийн иниституудыг мафи болгосон ккккк
Сэтгэгдэл үлдээсэн: 2021-05-07 09:09:37

Баттулгыг: Энэ нөхрийг бүрэн эрх нь дуусангуут төмөр замын болон бусад идсэн уусан бүх юмыг нь шалгаж хорих байхаа

Шинэ мэдээ

Нийтлэлчид