Л.Оюун-Эрдэнэ Ерөнхий сайдаар томилогдож, танхимаа бүрдүүлж, тангаргаа өргөснийхөө дараа буюу 2021 оны нэгдүгээр сарын 29-нд УИХ-ын чуулганы индэр дээрээс “...Миний бие өнөөдөр чихэр мэт сайхан зүйл ярихгүй. Манай Засгийн газар “КОВИД-19” цар тахлыг даван туулах чиглэлд цогц төлөвлөгөө боловсруулж, шуурхай ажиллах болно. Хүн амаа вакцинжуулах нь бидний нэн тэргүүний зорилт байх болно. Цар тахлын голомтод ажиллаж буй ажилтан, албан хаагчид, эрсдэлтэй бүлгийнхэн, цаашлаад нийт иргэдээ ДЭМБ-ын зөвшөөрсөн вакцинд үе шаттай хамруулах ажлыг Засгийн газар өөрийн эхний 100 хоногт багтаан зохион байгуулахын тулд бүхий л нөөц боломжоо дайчлан ажиллах болно...” хэмээж байлаа.

 

Ингэж мэдэгдсэнээсээ хойш 25 хоногийн дараа буюу хоёрдугаар сарын 23-нд Ерөнхий сайд Л.Оюун-Эрдэнэ "Астра зенека" вакцины анхны тунг өөрөө хийлгэж, аюулгүй гэдгийг нь харуулж, албан ёсоор вакцинжуулалт эхэлснийг зарлаж байлаа. Тэрбээр, тэр үед "Өнгөрсөн хугацаанд манай Засгийн газар олон улсын шилдэг туршлагад үндэслэсэн, өнөөгийн нийгэм, эдийн засгийн нөхцөл байдалд тохирсон, шуурхай, шийдэмгий, шинэ бодлого дэвшүүлж амжилттай ажиллалаа. Вакцинжуулалт өнөөдрөөс эхэллээ. Монгол Улс вакцинжуулалтаа эхэлсэн Ази тивийн эхний улсуудын нэг болж чадлаа. Оюун санааны хөрш Энэтхэгийн ард түмэн, Засгийн газарт  монголчуудынхаа өмнөөс  гүн талархал илэрхийлье. Цаашид вакцин нийлүүлэх хандивын болон худалдааны хэлцэл хийж байгаа  ОХУ, БНХАУ, Европын Холбоо, БНСУ, Япон Улсын Засгийн газарт талархаж байгаагаа илэрхийлье. Монгол Улсын Засгийн газар хүн амынхаа 60 хувь буюу 18-аас дээш настай иргэдээ вакцинд богино хугацаанд, шуурхай хамруулна" хэмээн мэдэгдэж байв. 

 

Ийнхүү Монгол Улс "КОВИД-19" цар тахлын эсрэг вакцинд нийт хүн амаа хамруулж эхэлснээс хойш даруй 70 гаруй хоног өнгөрчээ. Ерөнхий сайд Л.Оюун-Эрдэнийн нийт хүн амыг цар тахлын эсрэг вакцинд хамруулах эхний болон хоёр дахь амлалтууд биелэлээ олж байна. 

Тухайлбал, Монгол Улс 2021 оны дөрөвдүгээр сарын 29-ний байдлаар вакцинжуулалтаараа Азид тэргүүлж эхэлснийг "Our World in Data"-д зарласан байна. Оксфордын их сургуулиас гаргадаг статистик мэдээллийн Our World In Data порталд Монгол Улсад хэрэгжиж байгаа "КОВИД-19" цар тахлын эсрэг дархлаажуулалтын хөтөлбөрийн явцыг дэлхийн бусад улс орнуудынхтай дараах байдлаар харьцуулжээ. 

 

График 1. Тавдугаар сарын 1-ний байдлаар нийт тарьсан вакцины тунг 100 хүн тутамд оногдох хувиар нь харьцуулсныг харуулж байна.

График 2. Тавдугаар сарын 1-ний байдлаар вакцины эхний тунгаа тариулсан хүмүүсийн нийт хүн амд эзлэх хувиар харьцуулсныг харуулж байна.

График 3. Тавдугаар сарын 1-ний байдлаар бүрэн дархлаажсан (вакцины хоёр тунгаа тариулсан) хүмүүсийн нийт хүн амд эзлэх хувиар харьцуулсныг харуулж байна.

 

 

Манай улс гуравдугаар сарын дунд гэхэд Лаос, Тайланд, Сингапур, Филиппин улсаас доогуур түвшинд явж байсан. Харин дөрөвдүгээр сарын дундаас улсынхаа иргэдийн 30 орчим хувийг вакцинжуулсан Сингапурыг гүйцэж түрүүлсэн нь энэхүү статистик мэдээллээс харагдаж байгаа юм. 

 

        Түүнчлэн сүүлийн үед дэлхий дахинд "КОВИД-19" цар тахлын тархалт, хохирол огцом нэмэгдэж, 3,4 дэх давлагаа эхлээд байна. Энэтхэгт үүсээд буй нөхцөл байдал, нас баралтыг харахад л "КОВИД-19" цар тахал ямар аюултай, ямар их хор хохирол учруулдаг вэ гэдгийг төвөггүй ойлгож болохоор байгаа. Монголд ч энэ цар тахлын тархалт гаарч, 100 гаруй иргэнээ аюулт цар тахлын халдвараар алдчихлаа. Одоо хүн төрөлхтөнд энэ цар тахлыг давах туулах ердөө хоёр зам л байна. Энэ бол вакцинжуулалт, бас хөл хорио гэдгийг мэргэжилтнүүд хэлсээр байна. Вакцины олдоц тааруу, дэлхий дахинд "вакцины дайн" өрнөж буйг дэлхийн мэдээллийн агентлагууд онцолсоор байна. Аз болж бидэнд одоо вакцин байна. Манай улсын Засгийн газар вакцин захиалах, татан авах ажлыг шүүмжлэлтэй боловч аль чадхаараа хийж байна. Засгийн газраас Энэтхэг, Орос, Хятад, Солонгост үйлдвэрлэсэн нийт 8.8 сая тун вакциныг худалдан авах гэрээ байгуулсныг харвал хичээж ажиллаж байгаа нь тодорхой харагдах биз ээ.