Шадар сайд С.Амарсайхан бүх нийтийн бэлэн байдлын зэрэгт шилжсэн энэ өдрүүдэд 24 цагаар ээлжлэн үүрэг гүйцэтгэж байгаа ажилтан, алба хаагчдыг хэрхэн дэмжиж урамшуулж байгаа талаар тайлбар хийлээ. 

Тэрбээр "Манай төрийн албан хаагчид, ялангуяа эрүүл мэндийн салбарын эмч ажилчид, онцгой байдал, цагдаа, гааль, дотоодын цэргийн алба хаагчид 24 цагаар, хэд хэдэн ээлжээр үүрэг гүйцэтгэж байгаа. Ядарч, сульдаж, хүн хүч дутагдаж байна. Гэсэн ч нэг хүнийг ч болов эмчлэхийн төлөө, халдвар авхуулахгүйн төлөө бүх хүч, нөөцөө дайчлан ажиллаж байна. Цар тахлын хүнд цаг үед нойр, хоолгүй үүргээ гүйцэтгэж байгаа ажилтан албан хаагчдын илүү цаг, утас, хоол хүнс, унааны зардлыг шийдвэрлэж ажиллахаар холбогдох яам, агентлагын удирдлагуудад нь төсвийн зохицуулалтаа хийх чиглэл өгсөн. Өөр яаж дэмжих вэ гэдэг дээр судалгаа, тооцоонууд хийж байна. Илүү цагийн мөнгийг зарим байгууллагууд нь олгоод, зарим нь олгохгүй байна гэдэг шүүмжлэл явж байгаа. Үүнд УОК-ийн зүгээс тодорхой үүрэг, чиглэл өгөөд ажиллаж байна" гэлээ.