Ерөнхий сайд У.Хүрэлсүх Засгийн газар нэгдмэл зорилгоор, бүх хүчээ дайчлан ажиллана гэдгээ мэдэгдэж байсан. Түүнчлэн Д.Сумъяабазарыг УИХ-ын гишүүнээс нь буулгаж, хотын даргын албан тушаалд томилсон нь ч илүү их ажиллаж чадна хэмээн итгэл хүлээлгэснийх биз. Гэтэл Ерөнхий сайдын танхимын сайд, дарга нар өнгөрсөн хугацаанд хоорондоо учраа олж ажиллаж чадахгүй байх шиг. Хэдийгээр цар тахал, хөл хорио гээд амаргүй нөхцөлд ажиллаж байгаа ч мэргэжлийн хүмүүс бол харин ч ийм үед хөл алдахгүй байх учиртай. Гэтэл гаргасан шийдвэр нь хоорондоо зөрчилдөж, Засгийн газраасаа давсан шийдвэр гаргаж өнөөх нь иргэдэд нэмэр гэхээсээ нэрмээс болж байна. Ерөнхий сайд танхимаа бүрдүүлсэн өдрөө “Задарсныг засагладаг, ядарсныг хайрладаг төртэй байна” хэмээн хэлж байв. Тэгвэл Ерөнхий сайдын хэлсэнчлэн түүний бүрдүүлсэн танхим ядарсныг хайрлаж чадаж байгаа бил үү. Харин ч хөлөө олохгүй цэрэг шиг хөгөө чирсээр байна. Тухайлбал, Оны өмнө Ерөнхий сайд У.Хүрэлсүх “Эрдэнэт үйлдвэр”-ээс 650 тэрбум төгрөг гаргаж, бүх өрхийн цахилгаан, дулаан, усны мөнгийг тэглэх түүхэн шийдвэр гаргаснаа сүр дуулиантайгаар зарласан. Гэвч түүхэн шийдвэр нь ямар ч тооцоо судалгаагаагүй, “түүхий” шийдвэр байсныг бид хоёр хоногийн дотор харсан билээ. Хаа сайгүй сүлжээнд гэмтэл гарч, харин ч нийтээрээ цахилгааны хязгаарлалтад орох дөхсөн. Гэтэл Эрчим хүчний сайд Н.Тавинбэх хэзээ хойно нь “Цахилгааны үнийг тэглэх тухай огт яриагүй” хэмээн Засгийн газрынхаа шийдвэрийг үгүйсгээд сууж байна. Хэрвээ та мэргэжлийн сайд юм бол “Эрчим хүчний доголдол гарна шүү” гээд эртхэн Ерөнхий сайддаа анхааруулахгүй яасан юм бэ. Гэтэл өнгөрсөн хойно нь “Ачааллаа дийлэхгүй байна” гээд ард түмнээрээ тоглоом хийж суух юм. 

 

      Түүнчлэн хөл хорионы үед хүмүүсийг бужигнуулж болохгүй гэж УОК-оос шийдвэр гаргачихаад байхад Хүнс хөдөө аж ахуйн сайд З.Мэндсайхан нөөцийн мах борлуулж хүмүүсийг бөөгнөрүүлээд авсан билээ. Мөн Боловсролын сайд Л.Цэдэвсүрэн хөл хорионы үед сурагчдад давтлага өгч болох тухай тушаал гаргаж, олны дургүйцлийг хүргээд авсан. Ингээд сайдын тушаалаа цуцалсан байдаг. Халдварт өвчин газар авчихаад байгаа аюултай энэ үед хэн ч хүүхдээ гадуур явуулж, давтлагад суулгахыг хүсэхгүй нь лавтай. 

      Энэ Засгийн газрын “давхар дээл”-тэй дөрвийн нэг нь Хуульзүйн сайд Х.Нямбаатар. Хөл хорио, цар тахал хэмээн хүмүүсийг бужигнаж байх хооронд Эрүүгийн хуульд нэмэлт өөрчлөлт оруулах замаар иргэдийн үг хэлэх, үзэл бодлоо илэрхийлэх, сэтгүүлчдийн хэвлэн нийтлэх эрх чөлөөг хязгаарлах хуулийн төсөл бэлдчихээд сууж байсан нь ил болсон билээ. 

 

         Өнөөдөр коронавирусийн халдварыг барьж дийлэхээргүй хэмжээнд алдчихаад байж мэдэх нөхцөл байдал үүсчихээд байна. Эх үүсвэр нь тодорхойгүй хоёр ч голомт бий болчихсон талаар Эрүүл мэндийн сайд Т.Мөнхсайхан мэдээлж байна. Магад хөл хориог дахиад ч сунгах талаар Засгийн газар хуралдах байх. Гэтэл Монголын ард түмний амь нас, эрүүл мэндийг хариуцаж байгаа ЭМЯ, ХӨСҮТ нь хоёр тийшээ харж суучихаад хоорондоо хамтарч ажиллаж чадахгүй байгаа талаар оны өмнө нэлээд шуугив. Өнөөх мэргэжлийн хэмээх тодотголтой сайд Т.Мөнхсайхан салбар, газруудаа базаад ажиллах хэмжээний  чадварыг харуулж чадахгүй л байгаа. “Өрх бүрээс шинжилгээ авна” хэмээн өвлийн хүйтэнд хүмүүсийг хэдэн өдөр бужигнуулсан. Гэтэл “Өрх бүрийн нэг иргэнээс шинжилгээ авах ажил үр дүнгүй байсан” хэмээн өмнөх хийсэн ажлаа өөрөө үгүйсгээд сууж байна. 

 

 

      Түүнчлэн хотын дарга Д.Сумъяабазар УОК-ын дарга, Шадар сайд Я.Содбаатарын үгнээс зөрсөн шийдвэр удаа дараа гаргасан. Жишээ нь, “Нийтийн тээврээр яв гээд иргэдийн хувийн машиныг хорьчихсон.“Харин ч ийм үед хувийн машинаараа явбал аюулгүй юм биш үү” гэж иргэд хэлээд ч тусыг эс олов. Автомашинуудад QR зөвшөөрөл олгоно гээд иргэдэд чирэгдэл учруулж баахан бужигнуулсан. Үүнээсээ тун удалгүй “Нийтийн тээвэр эрсдэлтэй байсан юм байна” гэж хэлээд хүмүүсийг бухимдуулав. Шадар сайд нь ч өөрийгөө хамгаалж “Би нийтийн тээврээр яв гэж хэлээгүй” гээд бултчихсан. УОК, НОК хоёрын энэ мэт уялдаа холбоогүй шийдвэр үүгээр дуусахгүй. Өнгөрсөн арванхоёрдугаар сарын эхээр орон нутгийн иргэдийг хот руу оруулж, гаргах ажлыг зохион байгуулахдаа ч тэд алдаа гаргасан. Хүмүүсийг бужигнуулж, хэдэн өдөр хүйтэнд дааруулж зогсоочихоод сүүлдээ шинжилгээний хариуг нь ч үзэлгүй хүмүүсийг хотоос гаргасан билээ. Иргэд уг нь өнгөрсөн хугацаанд УОК, НОК-ын шийдвэрийг үг дуугүй биелүүлж ирсэн. Гэтэл тэдний энэ мэт уялдаагүй шийдвэрээс болж 22-ын товчоон дээр хүний амь нас эндсэн харамсалтай тохиолдол ч гарсан. Засгийн газрын тэргүүн үүнд уучлал гуйгаад л өнгөрсөн. Гэвч цаана нь өчнөөн хүний амь, амьдрал УОК, НОК-ын шийдвэрээс шалгаалж эрсдэлд орж, элдэв хохирол учирч байгааг барагцаалах боломжгүй. Гэтэл сайд, дарга нар “Бид чадлаараа ажиллаж байна” хэмээн ялархаад сууж байгааг иргэд мартахгүй л байх. 

 

      Ерөнхий сайд олон нийтэд мэдэгдэл хийх үеэрээ албатуудаа зандарч, загнаж байгаа харагддаг. Үнэхээр тэгж загнуулснаараа сайн ажилладаг бол танхимын сайд нар тус, тусдаа том толгойтой шийдвэр гаргаад явахгүй л байлтай. Гэтэл олны нүдэн дээр загнаж, загначихаад өрөөндөө ороод аргадаад байдаг юм уу гэмээр сайд, дарга нарынх нь шийдвэр байнга зөрчилдөж, хоорондоо толхилцож байгаад ямар хариуцлага тооцож, арга хэмжээ авах вэ, Ерөнхий сайд аа.

 

     Цар тахлын тун хүнд энэ цаг үед таны албатууд нэгдэн нийлж, ард иргэдэд чирэгдэл, хүнд сурталгүй ончтой шийдвэрийг цаг алдалгүй гаргах нь чухал болохоос биш, дөрвийн дөрвөн сар тоонд алхчихаад хөлөө олж чадаагүй будлиу цэрэг шиг хөгөө чирээд байж болохгүй биз дээ.