Өнгөрсөн 2016 оны гуравдугаар сард Засгийн газар шийдвэр гаргаж “Эрдэнэт үйлдвэр”, “Монголросцветмет”-ийн 49 хувийг төр мэдэлдээ авсан билээ. Ингэснээр “Эрдэнэт” үйлдвэр 100 хувь төрийн өмчит үйлдвэрийн газар боллоо хэмээн мэдэгдэж байсан. Харин ОХУ-ын талд байсан 49 хувийг худалдаж авсан “Монголын зэс корпораци”-ийнхан Засгийн газрын дээрх шийдвэрийг хууль бус хэмээн үзэж удаа дараа шүүхэд хандаад байгаа юм. Шүүхийн маргаан өнөөдрийг хүртэл үргэлжилсээр байгаа. Тэгвэл “Монголын зэс корпораци” Засгийн газрыг олон улсын Арбитрын шүүхэд өгөхөөр болсон гэх мэдээлэл байна. Хэрвээ тус корпораци Арбитрын шүүхэд хандвал “Эрдэнэт” үйлдвэрийн 49 хувийг худалдаж авахад гаргасан зардал болон түүнээс хойших ногдол ашиг болон алдагдлыг Засгийн газраас нэхэмжлэх юм байна. Ойролцоогоор 210 сая ам.долларыг Засгийн газраас нэхэмжлэх тооцоо гаргасан аж. Тэд хоорондоо ойлголцол, хэлэлцээрт хүрч чадахгүй бол Засгийн газар олон улсын Арбитрын шүүхэд дуудагдах бололтой.