Ерөнхий сайд Л.Оюун-Эрдэнийн Засгийн газрын “ойчих” бүх тохироо нь бүрдэх шиг боллоо. Цагаан “туг”-аа өргөх нь харин цаг хугацааны мэдэлд очив бололтой. Уг нь тэр Засгийн газраа урт “настай” байлгахыг мөн их хүссэн. Очсон уулзалт, уулзсан хүн бүрдээ шахуу ганц үүнийг л ярьж явсан. Гэвч У.Хүрэлсүх ба МАН доторх “акул”-ууд харин эс хүссэн юм уу даа.
Улс төрд өрнөж буй үйл явдлуудыг нэгтгэж харвал, бүх зүйл Л.Оюун-Эрдэнийн эсрэг байна. Бүр ганцаардаад, гарах гарцгүй буланд шахагдчихсан ч гэмээр. Ажиглавал түүний Засгийн газрыг ард түмнээр унагаалгах түгээмэл бус арга хэрэглэж буй бололтой юм. У.Хүрэлсүх өөрийнхөө өмнөх Ж.Эрдэнэбатын Засгийн газрыг УИХ-ын гишүүдээр гарын үсэг зуруулж, шахалт үзүүлэх аргаар огцруулж байлаа. Өөрөө харин бусдын өмнөөс хариуцлага үүрч огцрох арга хэрэглэсэн. Л.Оюун-Эрдэнийг бол ард түмнээр унагаалгах нь. Засгийн газраа огцруулах аргаа давхцуулахгүй байх, өөрөө өөрсдийгөө огцруулдаг гэдгээ мэдэгдүүлэхгүй байхаа харин ч нэг мэдэх юм, МАН-ынхан.
Л.Оюун-Эрдэнийн Засгийн газарт МАН-ынхан өөрсдөө зориудаар огцрох шалтаг бэлдэж өгөөд, ард түмнээр унагаалгах гэж байгаа гэж хардах лавтай хоёр том шалтгаан байна.
Тухайлбал,
Цар тахлаар хоногт 2000 хүн халдварлаж, 15 хүн нас барж, үндэстэн даяар үхлийн аюул заналхийлж байхад Ерөнхий сайд Л.Оюун-Эрдэнийн Засгийн газар цахим наадам хийхээр шийдвэрлэсэн. “Ард түмнээ вакцинжуулж, аюулт цар тахлын даван туулах нь манай Засгийн газрын нэн түрүүний зорилго” гэж “мачийж” байсан атлаа цахим наадам нэрээр 12 мянган хүнийг хүй мандлын дэнжид цуглуулах шийдвэр гаргасан нь бүр гайхмаар. Тэгээд болоогүй, морь, бөхөд хөл алдах нь байтугай монгол дээл ч тоотой өмсдөг Л.Оюун-Эрдэнэ наадам хийх шийдвэрээ цуцлалгүй гүрийж, ард түмэн “NoNaadam” гэж жагстал нь бат зогссон нь бүр ч гайхмаар. "Төөрч яваад төөргөөр учирсан төрсөн ах минь тэрбум төгрөгөөр наадам найруулж, төрсөн дүүгийнхээ өндөр албан тушаалд байгаа дээр төр нэг удаа болов эрхлэг” гэж бодоогүй юм бол наадам хийх шийдвэр толгой мэдэн гаргаагүй байх. Харин У.Хүрэлсүх тэргүүтэй МАН-ын “ах” нар нь түүний Засгийн газрын огцрох шалтгааныг бэлдэж өгөх гэсэндээ зориудаар шахаж ийм шийдвэр гаргуулсан байж болох шүү дээ. Дээсэн дөрөөн дээр дэнжгэнэж яваа Л.Оюун-Эрдэнэд эсэргүүцэх чадал байгаагүй ч юм бил үү.
Хэрвээ ингэж харвал дараах зохиолоор явсан байж таарна.
МАН-ынхан өөрсдөө Ерөнхий сайд Л.Оюун-Эрдэнэдээ шахалт үзүүлж, наадам хийх шийдвэр гаргуулна. “Цар тахалтай ид тэмцэж байх ёстой Засгийн газар цадигаа алдаж, цахимаар наадам хийж, баячуудыг баясгах нь” гэж иргэд эсэргүүцнэ. Эсэргүүцлийг нь сошиал ертөнцөд “сэвж” өгөөд, болж өгвөл төв талбай руу хэдэн морьтой залуус оруулж, Засгийн газар иргэдээ хагалан бутаргаж байна гэж харуулна. Ингээд эцсийн мөчид Засгийн газар шийдвэрээ цуцалж, наадмыг бүтэн жилээр хойшлуулна. Энэ зуурт уяач нэртэй зарим нэг “сагсуурагчид” нь энд тэндгүй сунгаа, үсэргээ хийгээд хэд хэдэн унаач хүүхдийн амиар хэдийнэ “наадчихсан” байна. Бас хүй долоод худагт урлагийн голдуу 3000 хүн хэд хоног байрлаад, нээлтийн “клип”-нийхээ талаас илүүг дүрсжүүлчихсэн байна. Алс аймгийн уяач нар морьдоо ачиж багадаа 1000 киломерт туулж ирээд, хүй долоон худагт уяагаа зоочихсон байна. Гэтэл Засгийн газар наадам хийх шийдвэрээ цуцалснаар энэ олон хүний ажил, хөлс хүч, мөнгө салхинд хийснэ. Үр дүнд нь түүний Засгийн газар муухай харагдаж, огцрох шалтгаан нь нэгээр нэмэгдэнэ.
Түүнчлэн, Замын-Үүдийн боомтод ачаа тээвэр саатаж, түгжрэл гацаа үүссэн асуудал өнгөрсөн долоо хоногоос хүчээ авав. Хятадын тал манай талын боомтуудыг “халдвартай” хэмээн эргэлзэж, оруулж гаргах автомашиныхаа тоонд хязгаарлалт тогтоосноор Зам-Үүд боомтын нөхцөл байдал хүндэрсэн. Хоногт 350 машин гардаг байсан бол одоо 100 машин чүү чамай гарч байгаа гэх. Арга ядахдаа Ерөнхий сайд Л.Оюун-Эрдэнэ өөрөө биечлэн Замын-Үүдэд очив. Хэлхэж гагнасан төмөрт сэмэрхий брезент тохчихсон, өнөөхийгөө ариутгалын хаалга хэмээн нэрлээд, жишим ч үгүй “Хятадууд манайхыг халдвар хамгаалал муутай гээд байгаагаас болж ачаа тээвэр гацаад байгаа юм” гээд сууцгааж байгааг нүдээрээ харсан Л.Оюун-Эрдэнэ эрхгүй “Ийм байхад аргагүй шүү дээ...” гэж дуу алдсан. Хариуцлагаа умартаж, төрийн ажилд сэтгэлгүй хандсан дарга нарт 30 хоногийн хугацаа өгөөд буцаж ирэв. Зам тээврийн хөгжлийн сайд Л.Халтар, МХЕГ-ын дарга Т.Гантулга, ГЕГ-ын дарга Б.Асралт гээд “дээгүүр” танилтай хариуцсан дарга нар нь сэтгэлгүй байсны төлөө Л.Оюун-Эрдэнэ нийтэд бас л үзэн ядагдав. Хэрвээ тэд Л.Оюун-Эрдэнийн Засгийн газрыг албаар “муухай” харагдуулж, ажлыг нь хойш татах гээгүй л юм бол 300 машины орж гарах ариутгалын хаалгыг хятадуудад гологдохооргүй хийчихмээр л санагдах.
Энэ мэтээр Л.Оюун-Эрдэнийн Засгийн газрыг “ойчуулах” бүх тохироог “гаднын нөлөө”-тэйгөөр зохион байгуулаад, эцэст нь иргэдээр унагаалгах гэж байгаа дүр зураг харагдаад байгаа юм.
Мэдээж, Л.Оюун-Эрдэнэд нэрлэвэл Ерөнхий сайдад тэнцэхгүй байх дутагдлууд олон бий. Удирдах ур чадвар дутсан, улс төрд ужгирсан “хурган” дарга нарт хэт зөөлдсөн, Гүйцэтгэх засаглалын тэргүүний хувиар гав шав хийсэн шийдвэр гаргалгүй хэт бөөрөнхийлсөн гэх мэт. Үүнийх нь балгаар эмнэлгийн тусламж авах гэж хоёр эмнэлгийн хооронд цаг шахам гүйгээд арга тасарсан иргэн эмнэлгийн гадна харамсалтайгаар амьсгал хураасан. Дарханы зам “Дакар ралли”-гийн зам болж, ачаа тээврийн автомашинууд шаварт “хонодог” болсон. Вакцинжуулалтаа үр дүнд хүргэж чадалгүй, нийтээр нь халдварын эрсдэлд оруулсан. Хүүхэд, хөгшид, хөл хүнд эмэгтэйчүүд голдуу нас барах болсон. Эдгээр бол Л.Оюун-Эрдэнийн Засгийн газрын ноцтой дутагдлууд бий. Гэхдээ одоо бүрдчихээд байгаа огцрох шалтгаанууд нь зориуд бий болгосон буюу “Бөхийсөн дээр нь түлхэж, бүдэрсэн дээр нь нудрах” тактик л гэж харагдаад байна.
Л.Оюун-Эрдэнийн Засгийн газрын “ойчих” шалтгааныг МАН-ынхан зохиомлоор бүрдүүлсэн үү |
|