Эргэлт.мн мэдээллийн сайт өнгөрч буй долоо хоногт болсон онцлох үйл явдлуудыг тоймлон хүргэж байна.

Шүүгчдийн ёс зүйгүй бичлэг дуулиан тарилаа

Өнгөрч буй долоо хамгийн шуугиан, дуулиантай мэдээлэл бол шүүгчидтэй холбоотой ёс зүйгүй гэх бичлэг олон нийтэд ил болсон асуудал байлаа. Сүхбаатар, Чингэлтэй, Баянзүрх дүүргийн эрүүгийн хэргийн шүүгч Х.Идэр, З.Болдбаатар, Булган аймгийн шүүгч Д.Отгонбаатар, өмгөөлөгч Б.Баасанцогт, АТГ-ын ажилтан П.Чулуунбаатар зэрэг нэр бүхий  хууль хяналтын байгууллагад ажилладаг хүмүүс Баянзүрх дүүргийн 26 дугаар хороонд байрлах “Parkview” хотхоны 752 дугаар байрны ... тоотод цугларчээ. Мөн тэдний байгаа орон сууц руу 20 гаруй насны охид, эмэгтэйчүүд ар араасаа цувран ирж, орсон хяналтын камерийн дүрс  бичлэг хоёрдугаар сарын 20-нд олон нийтийн сүлжээнд ил болсон юм.

Улмаар хууль, хяналтын байгууллагын ажилчдын ёс зүй, дээрх шүүгчдэд хариуцлага тооцох эсэх асуудал яригдаж эхэлсэн. Тэгвэл Шүүхийн ёс зүйн хорооны Ажлын албаны дарга Н.Ганбаатар “Шүүгчидтэй холбоотой гомдол ирээгүй учир хариуцлага тооцох боломжгүй” хэмээн мэдэгдэж, дээрх шүүгчдийг хууль, хяналтын байгууллагад ажилладаг эсэхийг мэдэхгүй, танихгүй хэмээн мэдээлсэн юм.Үүний дараа биеэ үнэдсэн гэгдэж байгаа эмэгтэйчүүдийн өмгөөлөгч Б.Баттулга хэвлэлд мэдээлэл өгч “Бичлэгт нэр дурдагдсан нэр бүхий шүүгч, албан тушаалтнуудыг прокурорын зөвшөөрөлгүйгээр цагдаагийн байгууллагаас дагасан, тагнасан, мөрдсөн байж болзошгүй байна” хэмээсэн.  

Удалгүй тэдгээр эмэгтэй Тагнуулын ерөнхий газарт цагдаагийн байгууллагын холбогдох албан тушаалтнууд бичлэгт дурдагдсан шүүгч нар болон эрх бүхий албан тушаалтнуудыг хууль бусаар дагасан, тагнасан, мөрдөн мөшгисөн, гүйцэтгэх ажлын хууль зөрчсөн гэмт хэрэг үйлдсэн байж болзошгүй. Цаашлаад дээрх бичлэгийг цахим орчинд байршуулж, зохион байгуулалттайгаар тарааж байгаа үйл явдалд хамтран оролцсон байж болзошгүй нөхцөл байдал байгаа тул харьяаллын дагуу дээрх гэмт хэргийг шалгуулахаар гомдол гаргасан юм. Өөрөөр хэлбэл, шүүгчдэд биеэ үнэлсэн гэх эмэгтэйчүүдээс байцаалт авсан цагдаа нарыг Нийслэлийн прокурорын газраас шалгахаар болсон гэсэн үг. Мөн бичлэгтэй холбоотойгоор мэдэгдэл гаргаж, хүлцэл өчсөн "Parkview” хотхоны СӨХ болох “Биг кастел” ХХК-ийн дарга Н.Долгорсүрэнг оршин суугчынхаа бичлэгийг хууль бусаар бусдад өгсөн гэх үндэслэлээр цагдаагийн байгууллагад шалгуулахаар гомдол гаргаад байгаа. Ингэснээр Нийслэлийн прокурорын газраас дээрх эмэгтэйчүүдээс байцаалт авсан цагдаа нарыг шалгаж эхлээд байгаа юм.

Улсын хэмжээнд амьдралын ХЭВИЙН ГОРИМД шилжлээ

Улсын онцгой комисс хоёрдугаар сарын 20 буюу өнгөрсөн бямба гарагт хуралдаж, сар шинийн баяртай холбоотойгоор арав хоногийн хугацаанд тогтоогоод байсан хөл хориог цуцалж, хоёрдугаар сарын 23-наас амьдралын хэвийн горимд шилжинэ гэдгийг олон нийтэд мэдээлэв. Ингэснээр эдийн засгаа чөлөөлөх зорилгоор аж ахуйн нэгж байгууллагын 95 хүртэлх хувийн үйл ажиллагааг нээж, танхимын хичээлийг гуравдугаар сарын 10, гадаадаас иргэдээ татан авах ажлыг гуравдугаар сарын 1-нээс үе шаттайгаар эхлүүлэхээр болов. Түүнчлэн Алтанбулаг боомтын үйл ажиллагааг хэвийн ажиллуулахаар болсон юм.

Хэдий амьдралын хэвийн горимд шилжсэн ч коронавирусийн эрсдэл өндөр түвшинд байгаа учир иргэд амны хаалт зүүх, гараа ариутгах, 1.5-2 метрийн зай барих, халдвар хамгааллын дэглэмээ сахих ёстой гэдгийг анхааруулсаар байгаа.

Түүнчлэн коронавирусийн далд байгаа халдварыг илрүүлж, тархалтыг хумих зорилгоор 12 хоногийн хугацаанд “Нэг хаалга-Нэг шинжилгээ” нэгдсэн арга хэмжээ өрнүүлж, халдварын 33 шинэ голомт, 123 халдвартай иргэнийг илрүүлсэн. Иймд шинээр голомтот бүс нутаг буюу хоёр дүүргийн дөрвөн хороо, найман тодорхой объектод үргэлжлүүлэн хөл хорио тогтоогоод байгаа билээ.

Коронавирусийн эсрэг “АстраЗенека” вакцины 150 мянган тунг хүлээн авч, дархлаажуулалтаа эхлүүлэв

Энэтхэг Улсаас буцалтгүй тусламжаар олгож буй “АстраЗенека” вакцины эхний таталт болох 150 мянган тунг хоёрдугаар сарын 22-ны өглөө манай улс хүлээж авав. Тус вакциныг хоёр тунгаар 28 хоногийн хугацаатай, нэг удаагийн тариураар 0.5 мл-ээр тарих юм. Эдийн засгаа чөлөөлж, хөл хориог цуцалсан өдөр буюу хоёрдугаар сарын 23-нд Монгол Улсын Ерөнхий сайд Л.Оюун-Эрдэнэ  Улсын хоёрдугаар төв эмнэлэгт “АстраЗенека” вакцины эхний тунг, удаахыг Эрүүл мэндийн сайд С.Энхболд тариулсан.

Ингэснээр манай улс дархлаажуулалтын ажлыг албан ёсоор эхлүүлж, зорилтот бүлэг буюу халдварын голомтод ажиллаж байгаа эмч, сувилагч, эмнэлгийн байгууллагын ажилтан, цагдаа, онцгой байдлын алба хаагчдаа коронавирусийн эсрэг вакцинд хамруулж эхлээд байна.

Одоогийн байдлаар 6808 хүнийг АстраЗенека вакцинаар дархлаажуулаад байгаа бөгөөд нийт 16 байгууллагын 14 мянга 92 хүнийг хамруулахаар төлөвлөөд байгаа юм.

Холбогдох мэргэжлийн хүмүүс вакцин хийлгэхээсээ өмнө эрүүл мэндийн үзлэгт орох, өөр төрлийн вакцин хийлгэхгүй байхыг анхааруулж, коронавирусийн эсрэг вакцин хийлгэсний дараа хариу урвал илэрнэ гэдгийг мэдээлсэн. Тэгвэл дархлаажуулалтад хамрагдсан эмнэлгийн байгууллагын ажилчдад гурав хоногийн дараа халуурах, толгой өвдөх, ядрах, бие арзайх шинж тэмдэг илэрч байгааг Эрүүл мэндийн яамны ахлах шинжээч Д.Нарангэрэл өчигдөр 11:00 цагийн мэдээллийн үеэр хэлсэн юм. Иймд дархлаажуулалтад хамрагдсан иргэд дээрх шинж тэмдэг илэрвэл эрүүл мэндийн байгууллагад хандаж, хариу арга хэмжээ авах нь зүйтэй гэдгийг мэргэжилтнүүд зөвлөж байна.

Түүнчлэн манай улсад Синофарм үйлдвэрийн Веросэл, Файзер, АстраЗенека, Спутник-V гэсэн дөрвөн төрлийн вакцин оруулж ирэх бөгөөд АстраЗенека вакцины 150 мянга, Веросэл вакцины 300 мянган тун вакциныг авч ирээд байгаа. Тэгвэл Спутник-V вакциныг өнөөдөр хүлээж авах юм.

Өмнөговь аймагт хаврын АНХНЫ БОРОО орлоо

Өмнөговь аймгийн Номгон сумын Хөрх уулсын зүүн үзүүр, Номгон, Баян-Овоо сумын заагт орших Өндөр богд хайрханы орчимд хоёрдугаар сарын 26-нд буюу өчигдөр хаврын анхны бороо орсон билээ. Энэ талаар тус аймгийн Цаг уур, орчны шинжилгээний газрын Мэдээлэл, үйлчилгээний хэлтсийн дарга Б.Сугирмаа “Гашуунсухайт боомт орчмын нутаг дэвсгэрт газрын хөрс борлуулсан, бага зэргийн буюу мэргэжлийн хэллэгээр 0 мм-ийн бороо орсон.  Өөрөөр хэлбэл, энэ жилийн анхны бороо орсон гэсэн үг. Өнөөдөр Өмнөговь аймгийн нийт нутгаар 8-13 хэм дулаан, салхи, шуургатай байна” гэж хэлсэн юм.