Сонгуулийн синдром эхлэх цаг буюу яахаас ч буцахгүй НАМУУД

Б. Бадралмаа:
Улс төр- Тоймчийн үг

2021-02-20, 744

-МОНГОЛЫН ТӨР ЕРӨНХИЙЛӨГЧ, ЗАСГИЙН ГАЗРААР БУС, ХАР ПИ-АР, ЦАХИМ ТРОЛЛЧДООР УДИРДУУЛДАГ БОЛЧИХ ВИЙ-

Ерөнхийлөгчийн ээлжит сонгууль болоход дөрвөн сар гаруйн хугацаа үлджээ. Цагаан сар өнгөрөөгөөд л сонгуулийн синдром эхэлнэ. Уг нь хуулийн зохицуулалтаараа энэ удаагийн Ерөнхийлөгчийн сонгуульд дөрвөн нам өрсөлдөх эрхтэй. Харин иргэдийн дунд Ерөнхийлөгчийн сонгуулиар МАН, АН хоёр л өрсөлдөх нь гэх хүлээлт байна. Эрх баригч нам 100 жилийн ойгоороо “Монгол Улсын Ерөнхийлөгчийн суудлыг авна” гэсэн том зорилго тавьчихсан бол Ардчилсан намынхан “Ерөнхийлөгчийн суудлаа алдчихвал МАН-ын ноёрхолд бүрэн орно” гэх айдастай байна. Тиймээс л аль аль нь Ерөнхийлөгчийн сонгуульд ялахын тулд байж болох сайн, муу бүх аргаа хэрэглэх нь тодорхой боллоо.

Гол нь хүч тэнцүү шударга өрсөлдөөн байвал эрүүл, зөв тогтолцоо байхсан. Харамсалтай нь, аль ч сонгуулийн үед хар пи-ар хэрээс хэтэрч, улстөрчид биенээ намнадаг буруу жишиг тогтчихсон. Энэ хавар ч энэ жишгээр явах нь тодорхой бололтой. Он гарснаас хойш улс төрийн хүрээнд хэд хэдэн томоохон үйл явдал өрнөж, олны дунд нэлээн бужигнаан үүсэв. Нийгэмд үүссэн санаатай, санамсаргүй эл үйлдлийг сонгуультай холбох, нөлөө бүхий улстөрчид рүү асуудлыг нялзаах гэсэн оролдогууд ч явсаар байгаа юм. Зарим нь ямар ч асуудлыг овжиноор ашиглаж, өөртөө ашигтайгаар эргүүлэх явдал ч гарсаар байна. Гэвч төрийн эрх барьж буй улс орны манлайлагчид бие бие рүүгээ дайрч давшлах нь олон улсад Монгол Улсыг муухай харагдуулж байгааг тэд мэдэх болов уу.

Хамгийн сүүлд гэхэд л У.Хүрэлсүх Ерөнхий сайдын суудлаа хүлээлгэх өгөхдөө улсынхаа төрийн тэргүүн рүү илт давшилж, “Жагсаал цуглаан зохион байгуулсан хүн нь Монгол Улсын Ерөнхийлөгч” хэмээн удаа дараа мэдэгдсэн. Үүний дараа Ерөнхийлөгч “Энэ бүх хагарал бутралыг УИХ-ын гишүүн Сү.Батболд зохион байгуулж байгаа” гээд л бие бие рүүгээ халуун чулуу шиг үг хайр гамгүй “шидэж” сонсогдсон. Угтаа бол халдашгүй дархан гэх эрхтэй төрийн өндөр дээд албан тушаалнууд биенээ ийн гүтгэх нь Монгол төрийг ямар ч дархлаагүй болж байгааг харуулсан үйлдэл болов.

Нэг үгээр хэлбэл, амаржсан эхийг эмнэлэг хооронд шилжүүлэхдээ тухайн амаржих газрын асрагч, сувилагчдын сэтгэлгүй, хүн чанаргүй хариуцлагагүй үйлдлийнх нь төлөө бүхэл бүтэн улсын Ерөнхий сайд нь танхимраа огцорчихдог хэврэг төртэй улс болчихжээ. Монголын төр салхинд хийссэн хамхуул аятай хар пи-ар, цахим троллуудын үгээр удирдуулдаг боллоо гэхэд хилсдэхээргүй үйл явдлууд өрнөж байна.

Үүний тод жишээ хэдхэн хоногийн өмнө өрнөсөн харамсалтай үйл явдлаар нотлогдох шиг. Төв талбайд 34 настай эрэгтэй өөрөө дээрээ шатахуун асгаж, амиа алдсан харамсалтай үйл явдал өрнөж, талийгаач сүүлийн амьсгалаа бүрэн татаж амжаагүй шахам байхад түүний үхлийг улс төртэй хольж, хутгах гэсэн ордолгууд улаан цайм явсан. “Төмөр замын ажилчин цалингаа авч чадалгүй амиа егүүтгэчихлээ” гэх мэдээг иргэдийн дунд түймэр адил түгээж, цахим троллууд Ерөнхийлөгчийг харлуулах, гүтгэх ажлаа даалгавар цэргүүд авсан шиг гүйцэтгэж, хаа сайгүй цацаж орхилоо. Гэвч талийгаач амьдралын төлөө тэмцэж явсан жирийн л нэг хувиараа хөдөлмөр эрхлэгч байж таарсан. Ийн цахим “пи-ар”-чдад жижигхэн сэжүүр өгөхөд л улс орныг хаашаа ч эргүүлж мэдэхээр байна.

Сонгууль угтсан “шоу”-ны золиосонд энгийн иргэд хохироод үлдэх вий. Сар шинийн баярын дараа сонгуулийн синдром эхэлж, улс төрийн жинхэнэ тулаан өрнөх биз ээ. Магадгүй энэ бүх дуулианыг хэрсүү сонгогч ялгавал дараагийн Ерөнхийлөгч жинхэнэ улс төрийн манлайлагч байх нь дамжиггүй.

Сонгуулийн синдром эхлэх цаг буюу яахаас ч буцахгүй НАМУУД

Шинэ мэдээ

Нийтлэлчид